Avdet

Синдикация материалов
Адрес: http://avdet.org
Обновлено: 12 часа 28 минуты назад

Qırımtatar ressamları Qazanda milliy adetler aqqında tarif etti

Вс, 23/07/2017 - 20:45

Qırımtatar ressamları İrfan Nafiyev ve Elzara Kursaitova Yelabuga devlet müzey-qoruğında (Qazan) keçirilgen zemaneviy sanat «Urf-adetler» Halqara art-simpoziumında Qırımnı temsil ettiler.

Ressamlıq dünyasında brend merasimi olğan, 10 kün devam etken leyhada müzey-qoruğınıñ fond kollektsiyasına 6 devletten (Rusiye, Macaristan, Qazahistan, Türkmenistan, Türkiye, Ukraina – ğıyabiy) ve Rusiyeniñ on cumhuriyetinden 49 ressamnıñ 87 unikal işi qoşuldı.

Yaş ressam Elzara Kursaitova Avdetke añlattı ki, bugünki künde o, çeşit sergilerde iştirak ete, bularnıñ birinde Yelabugada keçirilmesi planlaştırılğan simpozium aqqında haber aldı.

Belli ressam İrfan Nafiyev ile beraberlikte olar halqınıñ bayram ve diger merasimlerine bağışlanğan qırımtatar urf-adetlerini aks etken bediiy interpetatsiyalarnı taqdim ettiler.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Foto: Elzara Kursaitova

SONY DSC

Aqyarda yedinci qat penceresinden 2 yaşındaki bala yıqıldı

Сб, 22/07/2017 - 16:45

İyül 21-de Aqyarda (Sevastopol) yedinci qattaki daire penceresinden 1 yıl 11 aylıq qız yıqıldı.

Bu aqta Rusiye Federatsiyası Aqyar boyunca Taqiqat komitetiniñ matbuat hızmeti bildire.

Vaqia boyunca teşkerüv alıp barıla.

«Belgilendi ki, Gagarin rayonında Geroyev Stalingrada soqağında yerleşken yedinci qattaki daireniñ penceresinden 1 yıl 11 aylıq bala yıqıldı», – dep bildirdi matbuat hızmeti.

Qorantanıñ dört kiçik balası bar. Bu, hayırlı bir aile.

Çoq balalı ananıñ taqiqatçılarğa añlatqanına köre, gece balalar yaramay yuqladı ve sabağa yaqın o, boldurıp, yuqlap qaldı. Kiçik qızı açıq pencerege barıp çıqtı.

Bala açıq asfaltqa yıqılıp, eki ayağını ve köpürçik kemigini sındırdı. Qız hastahanede stabil alda buluna.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Ahtem Seytablayev «Yıldızlarnen oyunlar» leyhasınıñ iştirakçisi olacaq

Сб, 22/07/2017 - 15:06

Belli rejissör ve aktör Ahtem Seytablayev ukrain «1+1» telekanalında «Tantsi z zirkamı» («Yıldızlarnen oyunlar») populâr leyhasında iştirak etecegi aqqında ilân etti.

O, bu künleri «Vremâ i Steklo» gruppasınıñ iştirakçisi ve «Golos. Diti-4» («Ses. Balalar-4») idmancısı Nadâ Dorofeyevadan #танціззіркамиchallenge davetini qabul etti.

Ahtem Seytablayev Facebook saifesinde paylaşqan video muracaatında añlattı ki, qızları içün oynamağa ögrenecek ve «Karmen» spektaklinden bir qaç pa icra etti.

«Er keske güzel Almatı şeerinden selâmlar olsun! Dostlar, men Nadâ Dorofeyevadan #танціззіркамиchallenge davetini aldım – men onı qabul etem. Ve memleketniñ baş oyun şousı olğan «Tantsi z zirkamı» leyhasınıñ iştirakçisi olacam, çünki bir vaqıt qızlarım Nazlı ve Sofiyağa söz berdim ki, babası bir kün güzel oynamağa ögrenecek», – dep ayttı rejissör.

Aynı vaqıtta populâr aktör ve rejissör #танціззіркамиchallenge davetini belli ruhiyatçı Natalya Holodenkoğa yolladı.

Bir qaç afta devamında bütün Ukraina #танціззіркамиchallenge közete, onıñ neticesinde «1+1» telekanalında «Tantsi z zirkamı» yañı leyhası iştirakçileriniñ adları belli ola.

Ahtem Seytablayev «Haytarma» birinci qırımtatar filminiñ rejissörı ve baş rolüniñ icracısı ola. 2017 senesi Ekinci cian cenki vaqtında Qırım almanlar tarafından zapt etilgende aman-aman yüz yeudi balasını qurtarıp saqlağan qırımtatar qadını Sayde Arifova aqqında onıñ «Başqasınıñ duası» yañı filminiñ taqdimi olıp keçti.

Avdetniñ evel bildirgenine köre, bu sene fevral ayında Ahtem Seytablayev «Qırım evi» devlet müessisesiniñ reisi oldı.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Qırım Nazirler şurasınıñ memurı maşnanen «KamAZ»ğa urulıp, elâk oldı

Сб, 22/07/2017 - 13:35

İyül 22-de, gece tahminen saat ekide Aqmescitte (Simferopol) Sevastopolskaya ve Danilova soqaqlarınıñ çatışmasında Lexus avtomobili, saatta eñ azdan 120 kilometr suratınen ketip, KamAZ maşnasına uruldı.

Bu aqta içtimaiy ağlarda vaqia şaatları bildire.

Olarnıñ sözlerine köre, Lexus başqa yolaqqa keçmege istedi, amma sağ taraftan turıp burulmağa azırlanğan KamAZğa uruldı.

Yengil maşnanıñ aydayıcısı birden elâk oldı. Onıñ yolcusı, – aydayıcı yanında oturğan bala, – sağ qaldı.

Elde etilgen bazı malümatlarğa binaen, Lexus maşnası «Qurucılıqta ve qurucılıq malzemeleri sanayında fiyat qoyma regional merkezi» müessisesiniñ müdiri Aleksandr Yakubovskiyge berilgen. Dümen başında memurnıñ özü edi.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Aqmescit Merkez bazarında turaqlar tek qışta donatılacaq

Пт, 21/07/2017 - 18:46

Aqmescit (Simferopol) Merkez bazarı yanındaki tamir etilgen meydanda cemaat naqliyesi içün turaqlarnıñ donatılması boyunca işler tek qışta yekünlenecek.

Şeer memuriyeti yolbaşçısı Gennadiy Baharevniñ sözlerine köre, meydanda üç «aqıllı» turaqnıñ qoyulması planlaştırıla. Şimdiki vaqıtta asfalt qoyulması, kontakt ağınıñ keçirilmesine para ayırıla.

«Bu, noyabr-dekabr ayından evel olmaz, yani sene soñuna qadar olur. Azırlanmaq, işler alıp barmaq kerek, ekspertiza endi yapıldı», – зdep işandırdı Baharev.

Onıñ sözlerine köre, donatma işleri aman-aman yekünlenecek.

Hatırlatamız ki, Merkez bazarı yanındaki meydan tamir etilgeni munasebeti ile Aqmescitte iyün 10-dan avgust 1-ge qadar «Merkez bazarı» cemaat naqliyesi turağında yolcularnıñ minme ve enmesi yasaq etildi.

Avdetniñ evel bildirgenine köre, Qırım paytahtınıñ Merkez bazarı yanındaki meydannıñ tamirlenüvi aman-aman yekünlendi.

Foto: Avdet

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Hansaray mektüp pullarında peyda oldı

Пт, 21/07/2017 - 16:36

Qırım poçtası Bağçasaray tarihiy-medeniy ve arheologik müzey-qoruğınıñ 100 yıllığına bağışlanğan poçta blokunı tamğaladı.

2017 senesi «Hansaray» qırımtatarlarnıñ tarihı ve medeniyeti milliy müzeyiniñ teşkil etilgenine 100 yıl tola.

Bu munasebet ile «Marka» şirketi tarafından Hansaray manzarasınen poçta bloku basıldı. Markanıñ fiyatı 100 ruble, o, 70 000 nushada derc etildi.

Hatırlatamız ki, ükümetniñ söz bergenine köre, Bağçasarayda yerleşken, 16 binadan ibaret olğan Hansaray kompleksine 1,7 milliard ruble sarf etilecek. Tamir işleri yıl devamında yapılsın dep, Qırımnıñ eñ belli abidesiniñ baş binası üstüne büyük çadır qoyulacaq.

Avdetniñ evel bildirgenine köre, Qırım sakinleri Hansaraynıñ bozulayatqan binaları meselesinden endi çoqtan qasevetlenip başladı. Mimarcılıq abidesi elektrikanen teminlenmey, binalar içinde qaranlıq ve dımlılıq, dam bozulıp başlay. Bina çoqtan tamirge muhtac. Bunen beraber, bu yerge kiriş biletleriniñ fiyatları yıl-yıldan arta. Keçken sene dekabr ayında fotograf İldar İbragimov Qırım müftiyatı, müzey reberleri ve cumhuriyet ükümetine Hansaray vaziyetine diqqat etmek talabınen muracaat etti.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Putin belli uquq qoruyıcığa Kezlev manzarasınen gravüranı ediye etti

Пт, 21/07/2017 - 11:10

Tünevin, iyül 20-de, sovet ve rusiyeli uquq qoruyıcı, Moskva Helsinka gruppasınıñ yolbaşçısı Lüdmila Alekseyeva 90 yıllığını qayd etti.

Onı yübiley munasebeti ile Rusiye prezidenti Vladimir Putin hayırladı.

O, Lüdmila Alekseyevağa çiçekler ve qadınnıñ kiçik vatanı olğan Kezlev (Yevpatoriya) manzarasınen gravüranı ediye etti.

Kremlniñ matbuat hızmeti bildirdi ki, çoq Rusiye vatandaşı uquq qoruyıcığa «adamlar içün yaşağan ömrü» içün minnetdar olğanı aqqında Putinniñ sözlerine cevap berip, şaqalaştı ki, bu, «adamnıñ, bir şey yapmayıp, ürmet qazanğanı siyrek olğan bir şeydir».

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Qırım parlamentiniñ depupatı 10 yılğa apiske qapatıldı

Пт, 21/07/2017 - 10:25

Saq rayon mahkemesi Qırım parlamentiniñ deputatı Valeriy Grineviçni 10 yılğa qattı nizam koloniyasına qapatmaq qararını çıqardı. Grineviç büyük dolandırıcılıq yapqanınen, dolandırıcılıq yapma ıntıluv ve öldürüv aqqında qorquzma yapqanınen qabaatlandı.

Bu aqta «Krıminform», mahkeme temsilcisiniñ malümatına esaslanıp, bildire.

«Grineviç qattı nizam koloniyasına qapatıluvınen 10 yılğa azatlıqtan marum etile. Qabaatlav tarafı deputat içün hususan böyle cezanı talap etken edi», – dep bildirdi mahkeme hadimi.

Haber etilgenine köre, taqiqat belgiledi ki, Grineviç Qart Biy (Ştormovoye) köyünde topraq damartılarını almağa ve politsiya tarafından teşkerüvlerni toqtatmağa yardım etmege söz bergeni içün, yalan vastasınen, dollar parasınen 6 million rubleni elde etti.

Avdetniñ evel bildirgenine köre, iyül 19-da Qırım mahkemesi Keriç şeer memuriyetiniñ sabıq yolbaşçısı Sergey Pisarevni sekiz yılğa azatlıqtan marum etti, bunen beraber, 6,4 million ruble para cöremesinen cezaladı. O, qabar alğanınen qabaatlandı. Bundan da ğayrıi, Aqyar (Sevastopol) devlet uquq ve kadastr qayd etüvi idaresi bölüginiñ müdiresi yedi yılğa apiske qapatıldı. O, Rusiye Federatsiyası Cinaiy kodeksiniñ 30-cı maddesi 3-ci qısmı ve 290-cı maddesi 6-cı qısmı boyunca aracı vastasınen resmiy şahıs tarafından qabar almağa ıntıluv etkeninen qabaatlandı.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Türkiyede zelzele yüz berdi

Пт, 21/07/2017 - 09:38

6,7 magnitudalı zelzele cuma künü Türkiyeniñ ğarbiy yalısında yüz berdi.

Bu aqta Avropa Aq deñiz seysmologik merkezi (EMSC) bildirdi.

Müessiseniñ malümatına binaen, zelzele yerli vaqıtnen saat 01:31-de yüz berdi. Teprenüvniñ ortası populâr Bodrum (Mugla vilâyeti) kurortından cenüp tarafına 12 kilometr uzaqlığında, bunen beraber, Kos yunan adasından 16 kilometr ve Rodos adasından 90 kilometr uzaqlığında oldı. Zelzele ocağı 10 km terenliginde edi.

Reuters agentliginiñ malümatına binaen, vaqia neticesinde Kos adasında eñ azdan eki kişi elâk oldı. 120-den ziyade adam zararlandı, dep bildire Associated Press agentligi. Bunen beraber haber etile ki, Kos adasında çoq bina bozuldı.

Aynı vaqıtta türkiyeli vilâyette zelzele o qadar ciddiy aqibetler ketirmedi, dep bildire Reuters, yerli ükümet temsilcileriniñ malümatına esaslanıp.

Amma NTV telekanalınıñ ilân etkenine köre, endi tahminen 70 adam Bodrum hastahanelerine muracaat etti.

Mugla şeer yolbaşçısı bildirdi ki, zelzele neticesinde vilâyetniñ bazı qısımlarında elektrikanen teminlev toqtatıldı. Bodrum şeer başınıñ haber etkenine köre, vaqia neticesinde eski binalarnıñ bazılarında çatlaqlar peyda oldı.

Bunen beraber bildirile ki, zelzeleden furtuna peyda oldı. Britaniyalı The Daily Mail gazetasınıñ malümatına binaen, furtuna neticesinde Marmaris kurort şeeriniñ yalısında yerleşken otellerniñ bazılarını suv bastı.

Evel haber etilgen edi ki, iyül 18-de Qırım devlet seysmologik havfqa qıymet kesme ve zelzele tahmini boyunca ekspert şurasınıñ müdiri Yulian Burıy bildirdi ki, yaqın künde yarımadanıñ cenübinde büyük zelzele beklenile.

Qırım seysmologik taraftan havflı bir region sayıla, bunıñ içün bu yerde zelzeleler ola bile.

Foto: Kostoday.gr via AP

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Cebbar Akimovnen bağlı hatıralar

Чт, 20/07/2017 - 17:20

Cebbar ağa Akimovnen 1962 senesinden berli tanış edim. O, qırımtatar milliy areketiniñ faal tesisçilerinden biri edi ve halqnıñ tarihiy Vatanına, Qırımğa, avdeti içün küreşe edi.

Biz, Taşkent teşebbüs gruppası, bu insannen pek bağlı edik ve bütün bu yıllar devamında aqqımız içün küreşip, adalet bar olğanına inana edik.

Milliy areketniñ bütün merasimleri Cebbar ağa Akimovniñ iştiragi ile keçirile edi. Cumhuriyet körüşüvlerini keçirmezden evel, biz vilâyet toplaşuvlarını keçire edik, o yerde esas körüşüvde muzakere etilecek meseleler belgilene edi.

O, körüşüvlerde sözde bulunğan adamlarnıñ tekliflerinden netice çıqarmaq, fikirlerni birge ketirmek, olarnı talil etmekniñ ustası edi. Bunen er kesni birleştire edi.

Vatandaşlar onı seve, ürmet ete ve onıñ qıymetini bile edi, onıñ duşmanı yoq edi.

Taşkent vilâyet gruppasınıñ terkibine 200-den ziyade adam kire edi. Olardan 20 kişi böyle adlandırılğan Merkezni teşkil ete edi. Merkezniñ başı yoq edi. Bütün azalar meseleler muzakere etilgende bir seviyede edi. Olar, kimni ve ne vaqıt Moskva, Kiyev, Aqmescitke (Simferopol) ve ilâhre yollamaq kerek olğanını belgiley edi. Amma Mustafa Selimov, Cebbar Akimov ve Bekir Osmanovnıñ teklifleri al etici edi.

Cebbar ağa aqıl ve insaniy hususiyetleri ile ürmetimizni qazana edi, em de o, bizden büyük edi.

O, Taşkent onkologik hastahanesinde yatqanda, biz ğayrı resmiy şekilde, onı tedaviylegen ekimnen añlaşıp, er künlük ziyaretler ve nevbetçilikni teşkil ettik. Bularnıñ arasında bu adamlar oldı: Mustafa Halilov, Suleyman Veli, Şefika Veli, Halil Çalbaş, Edem Halilov, Ablâmit Ümerov, Hatice Dobra, Gülsum Mihalöva, İzzet Hairov, Refat Göcenov, İzzet İzedinov, Osman Mustafayev, Amza Ablayev, Ruslan Eminov, Enfer Kalafatov, Eskender Fazıl, Şevket Kaybulla, Reşat Ablayev, Ramis Kubedinov, Sinaver Kadırov, Reşat Cemilev ve digerler.

Yahşı, açıq insan munasebetleri oña küç-quvet ve ümüt bergen edi. O, saatlarca biznen laf etken edi, ve onıñ boldurğan betinde tebessüm peyda olğan edi.

O, hatıramızda küleryüzlü, sögüş ve duşmanlıq bilmegen insan olıp qaldı, ve biz er kesni ürmetli oca ve ustazımızğa, iç olmasa, biraz oşamağa çağıramız. Onıñ açıq sıfatı, yengil yürüşi ve yüzündeki tebessümi yüreklerimizde yaşay. O, biznen!

Refat GÖCEN

Qırım mahkemesi «Hizb ut-Tahrir» işi boyunca Bağçasarayda yaqalanğan kişilerni apiste qaldırdı

Чт, 20/07/2017 - 16:35

İyül 19-20 künleri Qırım Yuqarı mahkemesi «Hizb ut-Tahrir» işi boyunca Bağçasarayda yaqalanğan Zevri Abseitov, Rustem Abiltarov, Enver Mamutov ve Remzi Memetovnıñ şikâyet arizalarını red etti ve olarnı apiste qaldırdı.

Bu aqta «Qırım.Aqiqat» bildire.

«Mahküm etilgenler toplaşuvdan ketmege istedi, çünki o, qapalı şekilde keçirilgen edi, amma mahkeme olarnıñ apaylarına qarar seslendirilgende bu yerde bulunmaq içün razılıq bergen soñ qaldılar», – dep añlattı «Radio Svoboda» mühbiri Anton Naumlük.

Adliyeciler bildire ki, aprel ayında Sankt-Peterburg şeerindeki metroda patlav yüz bergen soñ «Hizb ut-Tahrir» işi boyunca yaqalanğanlarnıñ davaları baqılğan bütün toplaşuvlar qapalı şekilde keçirile. Adliyecilerniñ sözlerine köre, böyle areketler qanunsızdır.

İyül başında Qırım Yuqarı mahkemesi «Hizb ut-Tahrir» işi boyunca Bağçasarayda yaqalanğan kişilerniñ apiste bulunma müddetini sentâbr 12-ge qadar devam ettirdi.

Avdetniñ bildirgenine köre, 2016 senesi mayıs 12-de Bağçasarayda rusiyeli uquq qoruyıcılar musulmanlarnıñ evlerinde, bunen beraber, yerli «Salaçıq» qavehanesinde bir sıra tintüvler keçirdi. Neticede Zevri Abseitov, Remzi Memetov, Rustem Abiltarov ve Enver Mamutov yaqalandı. Olar, Rusiyede terroristik tanılğan «Hizb ut-Tahrir» teşkilâtınen bağlı olğanında şeklenile.

«Hizb ut-Tahrir» işi boyunca yaqalanğan, davaları daa devam etken qırımtatarlar, mahkeme qararnı daa çıqarmağanına baqmadan, terrorist ve ekstremistler cedveline kirsetildi.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Qırımda «Millet» telekanalınıñ yañı müdiri tayinlendi

Чт, 20/07/2017 - 11:30

«Millet» telekanalınıñ yañı baş müdiri vazifesine 28 yaşındaki Ervin Musayev tayinlendi.

Bu aqta Qırım milletlerara munasebetler ve sürgün etilgen vatandaşlarnıñ meseleleri boyunca Devlet komitetiniñ matbuat hızmeti bildire.

Beyanatqa köre, «Millet» telekanalınıñ sabıq müdiri Seyran Mambetov öz isteginen istifağa çıqmaq içün ariza berdi. O, 2015 senesi sentâbr ayından başlap, telekanalnıñ başı edi.

Ervin Musayev iqtisadiyat ilimleri namzeti ola, bundan evel o, Qırım Cumhuriyeti İçki siyaset, malümat ve alâqa nazirliginiñ içki siyaset idaresiniñ müdir muavini edi.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Aqmescitteki «Bötke – Livadki» yolunıñ dörtte bir qısmı qoyuldı

Чт, 20/07/2017 - 10:50

Aqmescitteki «Bötke – Livadki» («Dubki – Levadki») aylançıq yolu quruluvınıñ tahminen 25 faizi yapıldı.

Bugünki künge qadar Qırımğa Rusiyeden ketirilip qurulğan asfalt-beton zavodınıñ donatmaları qoyuldı, zavod bir saat içinde 200-ge qadar tonna asfalt çıqara bile. Şimdiki vaqıtta qurucılar elektrikanen teminlev ağlarınen oğraşa, avgust ayında ise, zavod işke tüşürilecek, dep bildirdi qurucılıqnı yapqan «Sibavtoban» Novosibirsk şirketiniñ matbuat hızmeti.

Şirkette qayd ettiler ki, yañı yol gece-kündüz, iş cedveli boyunca, qurula. Sene soñuna qadar 4 kilometr yolğa asfalt qoyulması planlaştırıla.

Yolnı 220 yol-quruv tehnikası ve 300-den ziyade yol işçisi qura.

Aqmescit civarında «Bötke – Livadki» dört yolaqlı aylançıq yolunıñ qoyulması bu sene fevral ayında başlandı. B-1 kategoriyalı yolnıñ uzunlığı 9,1 kilometrni teşkil etecek. Añlaşmağa binaen, yol 2018 senesi avgust 31-ge qadar qoyulmaq kerek. Onıñ fiyatı 6,14 milliard rubleni teşkil etecek. İşni ömürge keçirgen şirket, avans olaraq, endi bir milliard ruble aldı. Qırım ükümetiniñ qıymet keskenine köre, işlerniñ dörtte bir qısmı endi yapıldı.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Eki Qırım memurı 8 ve 7 yılğa apiske qapatıldı

Чт, 20/07/2017 - 09:40

İyül 19-da, çarşenbe künü, mahkeme Keriç şeer memuriyetiniñ sabıq yolbaşçısı Sergey Pisarevge nisbeten üküm çıqardı. O, qabar alğanınen qabaatlandı.

«Taqiqat ve mahkeme belgiledi ki, 2016 senesi iyün 21-de aqşam qabaatlanğan kişi Keriç şeer memuriyeti tarafından topraq damartılarını kirağa aluv ve alış-veriş yapuv boyunca añlaşmalarnıñ tizilmesi içün vatandaştan 50 biñ dollar (3 208 500 ruble) miqdarında qabar aldı», – dep aytıla Qırım taqiqat komiteti matbuat hızmetiniñ beyanatında.

Para berilgen soñ, qabaatlanğan kişi FSB hadimleri tarafından yaqalandı.

Mahkeme, taqiqatnıñ delillerini köz ögüne alıp, onı sekiz yılğa azatlıqtan marum etti, bunen beraber, 6,4 million ruble para cöremesinen cezaladı.

Bundan da ğayrı, tünevin belli oldı ki, Aqyar (Sevastopol) devlet uquq ve kadastr qayd etüvi idaresi bölüginiñ müdiresi yedi yılğa apiske qapatıla.

O, Rusiye Federatsiyası Cinaiy kodeksiniñ 30-cı maddesi 3-ci qısmı ve 290-cı maddesi 6-cı qısmı boyunca aracı vastasınen resmiy şahıs tarafından qabar almağa ıntıluv etkeninen qabaatlandı.

Qadın devlet hızmetinde ya da yerli öz-özüni idare etüv organlarında çalışmaq aqqından 3 yılğa marum etildi.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Qırım sakinleri Qurban bayramı munasebeti ile bir qoşma kün raatlanacaq

Ср, 19/07/2017 - 14:04

Sentâbr 4 künü Qırımda «Qurban bayramı qayd etilecegi munasebetinen» raatlıq künü olacağı ilân etildi.

Aksönovnıñ alâqalı fermanı yarımada ükümetiniñ saytında yerleştirildi.

Qurban bayramı Oraza bayramından 70 kün keçken soñ, yani musulman taqvimi boyunca on ekinci aynıñ onuncı künü, qayd etile. Bu sene bu bayram sentâbr 1-4 künlerine rastkele.

Bayramda musulmanlar Mina vadiysinde qurban çala. Lâkin, er musulmannıñ Mekkege acılıqqa barmaq imkânı olmay, bunıñ içün, islâm qanunlarına köre, qurbannı er angi yerde çalmaq mümkün.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Putin «Taygan» bağçasına kele bile

Ср, 19/07/2017 - 11:14

Rusiye prezidenti Vladimir Putin «Taygan» safari bağçasına kele bile.

Putinniñ «Taygan» bağçasına ola bilecek ziyareti Halqara qaplan kününe bağışlanacaq, dep bildire «Argumentı nedeli – Krım».

Qırım kütleviy haber vastalarınıñ bildirgenlerine köre, aynıñ başında Qırım iş adamı Oleg Zubkovnıñ tarafdarları ve onıñ mülkü olğan «Taygan» safari bağçasınıñ mühlisleri Vladimir Putinge resmiy muracaatnı videoğa çıqardı.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Qırımda «Çiygoznıñ işi» boyunca Konstantinov sorğuğa çekildi

Ср, 19/07/2017 - 10:38

İyül 18-de Qırım Yuqarı mahkemesinde qırımtatar faali Ahtem Çiygoznıñ işi boyunca yarımada parlamentiniñ yolbaşçısı Vladimir Konstantinov sorğuğa çekildi.

Adliyeci Nikolay Polozovnıñ bildirgenine köre, Konstantinov ilân etti ki, 2014 senesi fevral 26-da o, Çiygoznı körmedi ve onıñ areketleri aqqında bir şey aytıp olamay.

«Sorğu başında Konstantinov özüni daa tuta edi, amma üyle teneffüsine yaqın o, siñirlemege başladı. O, işbu sorğunıñ «KVN» («Şenler ve azırcevaplar klubu», – Avdet) olğanını ayttı ve «ondan nasıldır ariflerni tüşünip tapmağa talap etkenlerinden» açuvlandı. Umumen olaraq, bundan evel sorğuğa çekilgen şaatlardan Konstantinovnıñ sözde bulunması senator Kovitidiniñ sözde bulunmasına oşay: duyğulı, ekspressiv ve qattı siyasiy üslüpte», – dep qayd etti Polozov.

Bundan da ğayrı, toplaşuvda imaye tarafı  Qırım müftisi Emirali Ablayevniñ sorğuğa çekilmesi aqqında dörtünci sefer şefaat arizasını berdi, lâkin mahkeme bunı red etti ve bildirdi ki, imaye tarafı müftiniñ o vaqialarnen bağlı olğanını belgilegen yeterli qadar delil ketirmedi.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Aqmescitte gece yürgen trolleybus-ekspress peyda oldı

Ср, 19/07/2017 - 09:45

Aqmescitte (Simferopol) yañı 20 sanlı trolleybus marşrutı peyda oldı, o, Aqmescit halqara ava limanından demiryol vokzalına qadar yüre.

Bu aqta «Sputnik v Krımu» radiosınıñ yayınında «Krımtrolleybus» müessisesiniñ müdir muavini Larisa Lisovskaya ayttı.

Ekspressler eki tarafqa gece yüre: saat 20:00-den 5:00-ke qadar, aralarında 20 daqqa bar.

«Ekspress iyül 15-ten çalışıp başladı, şimdilik çoq yolcu bar, dep aytıp olamaymız, amma eminmiz ki, adamlar bu aqta bilecek ve bu marşrut pek kerekli olur. Ekspress biletiniñ fiyatı 42 ruble», – dep bildirdi Larisa Lisovskaya.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Qırımtatar kişi içtimaiy ağlarda beyanatlar içün mahküm etildi

Ср, 19/07/2017 - 09:10

Curçı (Pervomayskoye) rayon mahkemesi Emil Minasovnı ekstremizm aqqında madde boyunca 1 yıl 3 ayğa azatlıqtan marum etmek qararını çıqardı.

Bu aqta iyül 18-de «Krıminform», Rusiye Federal havfsızlıq hızmetiniñ (FSB) haberine esaslanıp, bildirdi.

FSB-niñ malümatına köre, 2016 senesi mart ayından oktâbrge qadar «Minasov içtimaiy ağlarda bir qaç sefer ekstremistik malümatlarnı paylaşqan edi». Müessisede hususan qaysı beyanatlar aqqında laf ketkenini bildirmediler.

Haber etilgenine köre, taqiqatçılar Rusiye Cinaiy kodeksiniñ 282 maddesi 1-ci qısmında belgilengen cinayet alâmetleri («Halq ögünde nefret ya da duşmanlıqqa çağıruv, demek, adamnı aşalav») boyunca altı cinaiy işni açtı ve taqiq etti. Mahkeme qararı işke tüşürildi.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Qırımda yaqın künde büyük zelzele beklenile

Втр, 18/07/2017 - 16:45

Qırımda yaqın künde yarımadanıñ cenübinde büyük zelzele beklenile, dep bildirdi Qırım devlet seysmologik havfqa qıymet kesme ve zelzele tahmini boyunca ekspert şurasınıñ müdiri Yulian Burım.

«Zelzele yaqın künde beklenile. Alâmetlerden biri bar. Konkret raqamlarnı sizge aytmam. Elbet, küçlü, duyulacaq bir zelzele. Amma onıñ olmaması da mümkün», — dep qayd etti o.

Seysmologlarnıñ tahminlerine köre, zelzele Qırım Cenübiy yalısından 30-50 km uzaqlığında Qara deñizde 2017 senesi iyül 18-den başlap kün devamında yüz bere bile.

Mütehassıslar bulut alâmetlerini körip zelzele havfı aqqında haber etti, dep bildire «İzvestiya».

Bunen beraber, Fevqulade vaziyetler nazirliginiñ Qırım boyunca idaresinde işbu malümatnı tasdıqlamadılar.

«Yarımadada seysmologik stantsiyalar ağları bar ki, olar, seysmologik faaliyette normadan nasıldır uzaqlaşmasını körmegenini ilân etti», – dep bildirdi FVN Qırım boyunca idaresiniñ müdir yardımcısı Vladimir İvanov.

Bunen beraber, o, hatırlattı ki, Qırım seysmologik taraftan havflı bir region sayıla, bunıñ içün bu yerde zelzeleler ola bile, dep bildire «RİA-Krım».

İçtimaiy ağlarda Facebook, VkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.