Gençler Türkiyege oqumağa kettiler

Gençler Türkiyege oqumağa kettiler

Türkiye Cumhuriyet sınavlarından (TSS) aprel ayında keçken qırımtatar gençleri sentâbr 24 künü Türkiyege oqumağa kettiler. Aqmescitniñ aeroportında yaşlarnı Türkiyege ozğarğan “Maarifçi” birleşmesi teftiş komissiyasınıñ reisi Beyye İlyasova, mesül kâtip Münire Ablayeva, ana-babalar, cemaatçılıqnen ve yaşlarnen bağ tutqan bölüklerniñ reberleri Nuriye Ğafarova, Elvira Boriyeva ve ana-babalar hayırlı yollar tilep, dualar oqudılar. Milliy Meclis medeniyet ve maarif idaresiniñ reberi Safure Ka­cametova bildirgenine köre, talebeler Aqmescitten doğru İstanbulğa uçtılar. İstanbulda olarnı Türkiye Tasil nazirliginiñ vekilleri ve Türkiyede oquğan talebelerimiz qarşılap aldılar ve Bursa şeerine ozğardılar. Bu sene TSS sınavında 20 talebemiz (13 oğlan ve 7 qız) oqumağa stipendiya qazandı.
Ankara universiteti yanındaki TÖMER merkeziniñ Bursa şeer bölügine çet elden kelgen studentlernen bir sırada 2009-2010 oquv yılınıñ devamında talebelerimiz türk tilini ögrenecekler, soñra ise çeşit universitetlerde aliy tasil alıp başlaycaqlar. Qayd etmeli ki, TÖMER merkezleri Türkiyeniñ bir sıra şeerlerinde bar. Er sene olğanı kibi, bu sene de gençlerimiz Bursa şeerinde oquycaqlar. Bursadaki qırımtatar derneginiñ başı Adnan Süyen talebelerimizni sentâbr 24 gecesi dernek azalarınen beraberlikte samimiy qarşılap aldı ve şu yerde balalarnı yataqhanege yerleştirip, registratsiya meselesinen oğraşıp başladı. Talebeler sentâbr 30 künü oquvnı başladılar.
Bu sene talebelerni öz vaqtında yollağanımız içün olarnıñ oquv yılı da öz vaqtında yekünlenecek ve yaşlar Qırımğa yaz tatiline öz vaqtında kelecekler.

“Maarif-inform”

Powered by Drupal, an open source content management system