Ramazan bayramı mektepte

RAMAZAN BAYRAMI MEKTEPTE

İslâmnıñ eñ büyük bayramlarından biri ol­ğan Ramazan bayramı tedbiri Aqmescitniñ Bavurçı (Kamenka) qasabasındaki 42-nci umumtasil mektebinde de qayd etildi.
Başlanğıç sınıf talebelerini Meclis, “Maarifçi” birleşmesi, Bütünukrain “Al-Raid” asotsiatsiyasınıñ Qırımdaki bölügi, yerli din cemiyeti ve cemaatçılıq hayırlamaq içün mektepke teşrif buyurdılar.
Mubarek Ramazan ayında metepliler arasında oraza tutqanlarnıñ sayısı yıl-yıldan öse. Bayram künleri musulmanlar, adet üzre, dost-doğmuşlarına barıp biri-birini bayramnen hayırlap, qartana-qartbabalarnıñ qolunı alalar.
Balalar bayram künü qasabanıñ mektebine teşrif buyurğan ihtiyarlarnıñ qolunı alıp, bayram şerifinen hayırladılar. Büyükler ise, adetlerimizge köre, balalarnı bahşışlarnen quvandırdılar.
Başlanğıç mektepte ötkerilgen bayram tedbirinde talebeler Ramazan bayramı, dinimiz, tilimiz ve aziz Vatanımızğa bağışlanğan şiirler oqu­dılar. Milliy Meclis medeniyet ve maarif idaresiniñ başı Safure Kacametovanıñ teşebbüsi ile tantanalı sürette ötkerilgen bu tedbirde kencetaylarnı yerli cami yanındaki “Bavurçı” din cemiyetiniñ azaları, yerli meclis reisi İsmet Smailov, mektep müdiri Nariman Ahmedov, “Maarifçi” birleşmesi teftiş komissiyasınıñ reisi Beyye İlyasova hayırladılar. Qırım müftiyatınen birlikte çalışqan Bütünukrain “Al-Raid” assotsiatsiyası Qırım bölüginiñ reisi Mohammad Taha, onıñ muavinleri Amin Al-Qasım ve Seyran Arifov tedbirde bulunaraq, balalarğa bayram müitini teşkil ettiler. Mohammad Taha qasabanıñ başlanğıç mektebinde qırımtatar balalarınen beraber oquğan diger millet vekilleriniñ balalarına da Ramazan bayramı künü, din mensüpligini ayırmay, er bir talebege ediye bağışladı. Bu – İslâm dini büyükliginiñ isbatıdır.
Bütünukrain “Al-Raid” assotsiatsiyasınıñ Qırımdaki bölügi mektepniñ 300 talebesine bayram quvançını bağışladı.
 
Meclisniñ matbuat hızmeti

 

Powered by Drupal, an open source content management system