Avdet

Syndicate content
Updated: 23 hours 22 min ago

Qarasuvbazarda belli olmağanlar, qırımtatar faaliniñ evini ateşke tuttılar

Thu, 16/11/2017 - 21:34

16 noyabr künü Qarasuvbazar (Belogorsk) rayonınıñ Qışlav (Kurskoye) köyünde belli olmağanlar qırımtatar faali Cafer Ametovnıñ evini ateşke tuttılar.

Bu aqta, Zair Smedlâyevniñ Facebook saifesinde yayınlanğan video haberde, evniñ saibi aytıp bere.

«Biz endi yuqlamağa yatqan edik, bir darbe sesi eşittik, sanki araba qapı qapaldı. Çıqıp baqtıq, araba qapılar qapalı. Bir çetke baqsaq araba yerinden köçti, amma kim olğanını şayda bilmedik», – dep ayttı Ametov.

Evniñ saibi polis çağırdı, protokol tizildi.

Ametovnıñ aytqanlarına köre, bu işni kim yapqanını bilmey, çünki onıñ kimseden çatışuvları yoq edi.

İçtimaiy ağlarda FacebookVkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

 

İçki rayonında qırımtatarlarnıñ evinde tintüvler keçti

Thu, 16/11/2017 - 21:06

Cumaaqşamı, 16 noyabr künü, İçki (Sovetskoye) rayonınıñ Eseninki (Puşkino) köyünde Mustafa ve Lenara Mustafayevalarnıñ evinde tintüv keçti.

Bu aqta, özüniñ Facebook saifesinde “Krımskaya solidarnost” haber ete.

Tintüvden soñ Mustafa Mustafayevnı Aqyarğa alıp kettiler. Onıñ anası ve oğlu artından kettiler. Mustafayevniñ oğlu aytqanına köre, tintüv daa saba saat 8 başlağan edi.

Birazdan, Mustafa Mustafayevniñ anasını evinde de tintüv keçirilgeni belli oldı.

Tintüv sebepleri daa belli degil.

İçtimaiy ağlarda FacebookVkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Nasıl etip Qırımda alman istilâsi başladı

Thu, 16/11/2017 - 20:55

O vaqıttan berli 76 yıl keçti. Almanlılar Aqmescitke 1941 senesiniñ 2 noyabr künü kirip kelgen edi. Sovet arbiyleri Qırımdan ketecekleri belli olğan soñ, şeer sakinleriniñ tahliyesi başladı. Amma tahliyege er kes tüşmedi.

İmtiyazlar aldına yazıcılar ayleleri tüşe edi. Anam mennen beraber akimiyetke barıp kirgende, onı apis etilgen Eşref Şemi – zadeniñ arayi, dep quvıp yiberdiler. Biz, Lenina adına Bulvarında yerleşken evimizden, Subhi (şimdi Krılova) soqağında yaşağan Anife bitamızğa köçtik. Men bu künlerni yahşı eslep qaldım. Aqmescit içinde patlavlar eşitile edi, bu aviya bombalar ve sanayı işhaneler patlay edi. Şeerde erzaq mağazlarnıñ, zavodlarnıñ ve çeşit kombinatlarnıñ talamaları keçe edi. Amma bu yağmalar aqqında yaramay, dep yazmaq pek doğru olmaz.

Bu künler aqqında, qısqa hatıralarım «Mavı mustanglar» romanımda aks olunğandır. Şimdi, anda da qısqa bir parça ketirecem: «Deşetli patlamalar, bombalamalar ve yanğınlar içinde talamalar kete edi. Bu öyle bir yağmalar edi ki, mında muvafaqiyetli şeerli öz dostuna, ya da qomşusına: – Bugün yağ zavodında talama yaptıq. Men yarım qopqa yağ ve bir kesek yağ qabuqları aldım. Ve qomşusı, ya da dostu bu haberden ayrette qalmaz edi, aksine  pahıllıqtan ahıldar edi, ya da quvanıp özü un kombinatına itştirak etken yağması ve andan evine çıqarıp ketirgen bir çuval unı aqqında aytıp bere edi. Endi eki künden berli şeer boylap güdürdi sesleri kele edi, bu mahsus tertip etilgen qafile, erzaq, silâ mağazlarnı, silâ taşığan trenlerni patlata ediler. Bazen patlatuv işlerine komandanlıq yapqanlar, mahsus tek isar ve araba qapılarnı patlatıp, mağazlarnı qaldıra ediler, o zaman adamlar talamalarğa başlay ediler. Ne içün bu areketlerge tilimizde, talama, ya da yağma, dep aytqanlar, bilmeyim. Bu areketke başqa söz tapmaq kerek edi, çünki, cenk ile baş – başına qalğan halq neler yapmaq kerek edi, sovetler bu yerlerni taşlap kete ediler, insanlar aç ve çıplaq edi. Taşlap ketkenler ise, erzaq ambarlarnı bile yaqa ediler… Gecesi şeerde patlavlar devam ete edi, bazıda yük maşnalarnıñ sesleri, ya da askerlerniñ qayğılı yırlağanları eşitile edi: – İ na Ti – hom o – ki – ya – ne svoy zako – nçili po – hod… Kerseten de, tap Tınç okeanğa qadar qaçacaq oldılar yoqsa? Üç ay devamında bu qadar topraqlarnı berip qoydılar… Kelecek künü, qapılar ögünden, qırmızı ordunıñ  daa bir qaç otrâdları keçe edi, olarnı öpkeli, ya da acınıqlı nazarlarnen qadınlar ve ballar ozğara ediler. Bizim qayğılı askerlerimiz Aqyar tarafqa kete ediler, çünki Or Qapı endi almanlılar tarafından alınğan edi. Olar ketkeninen şeerge balaban sukünet tüştü… Aqşam üstü, daa açıq yerlerde yarıq olğanda, terekler kölge bergen yerlerge ise,  qaranlıq tüşkende, şeer sakinlerine tanış olmağan bir araba sesleri eşitildi. Başqa iç bir türlü ses yoq edi, tek araba sesleri, de peyda ola ediler, de yoq olıp kete ediler. Amma bu ses qorqutıcı edi… Buruluştan yolğa, biri – biri artından kolâskalı eki mototsikl çıqa edi. Er bir mototsikl üstünde, biri dümen başında, ekincisi kolâska içinde asker otura edi. Bizimkiler degil. Gimnastörkaları qaz kübresi renkinde, omuzlıqları tar, yeñleri ise, köterilgen edi. Öglerinde avtomatları asılı tura edi. Bizim avtomatlar degil – bularda, bizimkinden farqı olaraq, tomalaq diskniñ yerine, patronlar turğan rojok bar edi. Askerlerniñ kaskaları başqa şekilde edi, olarnıñ üstünde yıldız yerine qanatlarnı açqan qartal şekili tura edi. Mototsikllar yavaş kete edi, yat askerleri tebessüm ete ediler, kolâskada oturğanları ellerini sallay ediler. Bu eki mototsikl keçip ketkeninen bir daa sükünet basa edi, amma köşe başından bir çift daa peyda ola edi. Qapıları yanında bala – çağa ve apaylar tura edi. Askerler ep ellerini sallay ve tebessüm ete ediler. Amma, bir balaçıq, eñ kiçkene olsa bile, olarğa qarşılıq olıp elini kötermedi, selâmlarına cevap bermedi… böyleliknen istilâ yılları başladı…».

Aydın Şemi – zade

Müellifniñ tüşünceleri, muarririyet fikirinen doğru kelmemesi mümkün

Birleşik Devletler Teşkilâtında Qırımda insan aqları boyunca yañartılğan rezolütsiya leyhasını qabul ettiler

Wed, 15/11/2017 - 21:31

14 noyabr künü Nyü – Yorkta, BDT General assambleyasınıñ Üçünci komitet toplaşuvında, Qırımda insan aqları boyunca yañartılğan rezolütsiya leyhasını qabul ettiler.

Rey berüv vaqtında 71 devlet, bu vesiqanı qabul olunmasına razılıq kösterdiler, 25 – qarşı çıqtı, 77 devlet bitaraf oldılar. Qarşı çıqqanlar arasında Belorus, Venesuela ve diger ükümetlerde bar edi.

Rusiye temsilcisi, vesiqanı «kerçeklikten qopuq», dep adlandırdı ve bu vesiqa Ukrainanı «referendumda Qırım halqınıñ qabul etken qararına qarşı çıqıp», Qırımnıñ statusını deñiştirmege istegenini ayttı.

Rusiyeniñ memleketlerara işleri boyunca federatsiya Şurası komitetiniñ başı Konstantin Kosaçev, Nyü – Yorkta keçirilgen rey berüvlerini, Ukrainanıñ «intiqam» alması, dep adlandırdı ve BDTğa, «ğarpnı ve Kiyevni Qırımğa qarşı yapqan işlerine» baqmasını teklif etti.

Senatornıñ fikirine köre, Nyü –Yorkta olıp keçken rey berüvler «Qırımğa ve onıñ sakinlerine yardım köstermek degil de, aksine olardan ve Rusiyeden intiqam almaq isteklerinen bağlıdır», dey.

Qırımdaki insan aqları boyunca yañılanğan rezolütsiyanı Ukraina, BDTniñ Üçünci komitetine 2017 senesiniñ oktâbr ayında bergen edi. Bu vesiqada, BDTniñ Halqara mahkemesinde alınğan qararlarnı, Rusiyeni yerine ketirmesi talap etile. Talaplar sırasında, Qırımda qırımtatarlarnıñ milliy Meclisine (Rusiyede ekstremistik teşkilât, dep tanılğan) qoyulğan yasaqnı alıp taşlanması, ukrain ve qırımtatar tillerine dersler keçirilmesi kibi, şartlar bardır.

İçtimaiy ağlarda FacebookVkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Rusiye, yolcu trenlerini Ukrainanı çetten aylanıp keçken yolnen yürsetip başladı

Wed, 15/11/2017 - 21:02

Bugün, 15 noyabr künü, RJD, Ukrainanı çet yollarnen aylanıp keçken yolcu trenini yürsetip başladı. Bu yol boyunca yük keçirmeleri daa sentâbr ayında başlanğan edi.

Juravka – Millerovo yolunıñ uzunlığı 140 kilometrdir. Bu yol Voronej ve Rostov vilâyetleriniñ yerlerinden keçedir. Yañı marşrut boyunca Moskva ve Sankt – Peterburgdan, Kislovodsk, Anapa, Nazran, Novorossiysk, Adler şeerlerine baracaq trenler yürecek.

Eki yolaqlı, elektrik ağınen yürülecek, Juravka – Millerovo yolunı 2014 senesi qurıp başladılar. Avgust ayında bütün qurucılıq işleri bitirilgen edi.

Ondan evel, Rusiyeden kelgen yük trenleri, Ukrainadan çet yollardan regulâr şekilde qatnay edi. RJD haber etkenine köre, birinci yük trenleri demir külçesi, boğday ve qurucılıq madenleri alıp keçtiler.

İçtimaiy ağlarda FacebookVkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Aqyar yalısına kelgen suvlar kiselge oşap qaldı

Tue, 14/11/2017 - 23:11

Qara deñizniñ Balaqlava yalısında alevkeler istilâsı yüz berdi. Suvda cılavuqlarnıñ çoqluğı sebebinden o, kiselge oşap qaldı.

Qara deñiz içün böyle adiseler siyrek degil, amma yalılarda alevkeler baar mevsiminde çoqlaşa turğan. Yerli sakinlerniñ fikirlerine köre, bu sefer cılavuqlarnıñ çoqlaşması, yaqınlarda olıp keçken furtunanen bağlıdır.

İçtimaiy ağlarda FacebookVkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Bağçasaray rayonında qurtarıcılar ve faaller bir qaç saat kiçik qırımtatarını qıdırdılar

Tue, 14/11/2017 - 16:24

Bağçasaray rayonında, 13 noyabr künü, 8 yaşna Eskender Zahidinov ğayıp oldı. Oğlançıq autizm hastalığını çeke eken. Üç saat qıdırğan soñ, oğlançıqnı tapalar ve ana – babasına teslim eteler.

Qırımda çalışqan fevqulâde nizirliginiñ matbuat hızmetinde bildirgenlerine köre, tünevin saat 15:50, qurtarıcı hızmetine, 2009 senesi doğğan oğlançıqnıñ ğayıp olğanı aqqında haber kele. Oğlançıq eki saat evelsi kezmege kete ve qaytıp kelmey. Coyulğan balaçıqnıñ qıdıruvına «Krım – Spas» teşkilâtınıñ hadimleri, göñüliler ve kinologlar çıqtılar.

Üç saat soñra, qaranlıqta, coyulğan balanı, yaşağan yerinden sekiz kilometr uzaqlığında, Glubokiy Yar köyüniñ bağçasında tapalar. Bala zarar körmegen edi. Onı anasına teslim eteler. Olıp keçken vaqiyanıñ sebeplerini polis hadimleri ögreneler.

Özüniñ Facebook saifesinde Seytumer Seytumerov haber etkenine köre, balanıñ qıdırmasında 300 yaqın adam iştirak etti. Balanı, Bağçasaray sakinleri Osman ve Rustem taptılar.

Hatırlatamız, 4 mart künü Qarasuvbazar (Belogorsk) rayonınıñ Köktaş (Sinekamenka) köyünde, ormanda 3 yaşna Ablâkim Ablâkimov coyulğan edi. Balanı bütün köy qıdıra edi, birazdan bu qıdıruvlarğa bütün yarımadadan toplanğan bir çoq qırımtatarı qoşuldı. Ormanda Ablâkim 17 saatke qadar keçirdi, onı saba saat 5-te, evinden bir qaç kilometr uzaqlığında taptılar. Birazdan, balanı «artqaç suvuq aldı» diagnozınen hastahanege yolladılar.

İçtimaiy ağlarda FacebookVkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

 

Bağçasarayda cenk iştirakçisi Reşat Sadredinov vefat etti

Tue, 14/11/2017 - 16:04

Bugün, 14 noyabr künü, 96 yaşında cenk iştirakçisi, Ekinci cian cenkiniñ veteranı, Bağçasaray şeeriniñ ürmetli sakini, istifada polkovnik Reşat Sadredinov vefat etti.

Qırımtatar askeriniñ cenazesi saat 13.00 Bağçasaray şeerinde, Lomonosov soqağında, 61 evde keçecek.

Reşat Zevadinoviç Sadredinov 1922 senesi Qarasuvbazarda, belli küreşçi Sadredin Tamalınıñ aylesinde dünyağa keldi. Belli olğanı kibi, 1928 senesi Sadredin Tamalı Veli İbraimovnıñ işi boyunca repressiya olıp, on yıl apiske atılğan edi. 1937 senesi, Reşat Sadredinov qırımtatar orta mektebini bitirip, Aqmescitte (Simferopol) yerleşken, Frunze adına Qırım devlet pedagogika institutına oqumağa kire. Üçünci kurstan başlap, qırımtatar tili ve edebiyatı fakultetindeki oquvını, «Yaş Quvet» gazetasında korrektorlıq işinen birleştire edi. Amma instituttan mezun olmağa ve barışıq ayat başlamağa cenk keder etti.

Cenk başlağanından bir aydan soñ, onı bir çoq studentler sırasında, Aqyardaki zenit – artilleriya oquv yurtuna yolladılar.

Cebede al ep fenalaşa edi, onıñ içün kursantlarnı Ufağa evakuatsiya ettiler. Anda Reşat, kiçik leytenant rutbesini aldı ve cebege yollanıldı. Yigirmi yaşlı leytenant, Tula şeeri yanında yerleşken 1362 zenit artilleriya polkınıñ 4 batareyasına komandan olaraq tayin etildi.

1943senesi, diviziyanı Kursk rayonına yollaylar, ileride o yerlerde neticeli bir uruş olıp keçe. Üyken leytenantnıñ komandanlığınıñ altında bulunğan batareya, duşmannıñ bir çoq uçağını urıp tüşüre, amma duşman öz silâsınen Sadredinovnıñ askerlerini ve toplarını yoq ete. Tanklar kelgen vaqtında ise, komandir ve sağ qalğan askerler yıqıq blindaj tübünde saqlana ediler.

Köstergen cesürligi ve qurtarğan askerleri içün Reşat Sadredinovnı «Za otvagu» degen medalnen mukâfatlandıralar.

Ondan soñ, bir daa toplanğan batareya, Oröl şeerinde, Belgorod uruşlarında, Ukrainanı, Kiyevni azat etilmesinde iştirak ete. Kiyevni azat etken soñ, Sadredinovnı Qızı yıldız ordeninen mukâfatlandıralar ve Çehoslovakiyada yerleşken general Svobodanıñ korpusına instruktor olaraq yollaylar.

1944 senesiniñ noyabr ayında Sambor şeeri içün keçirilgen uruşlarda, onıñ batareyası daa eki uçaqnı urıp tüşüre, ve bu çatışmada ayırılğanlarğa Cenkaver Qızıl Sancaq ordeninen mukâfatlandırılalar. Bu mukâfatqa batareyniñ komandanını da teklif eteler, amma millet mensüpligi içün mukâfatnı bermeyler. O zaman Reşat Sadredinov deportatsiya aqqında haberi ola. Ondan soñ, uruşlar Lehistan, Almaniya, Çehoslovakiya yerlerinde keçe. Cenk bitkeninden soñ, diviziyanı Avstriyada dağıttılar, ve tek o zaman o, soy – sopını ziyaret etmege izin aldı.

Trenden Aqmescitke kelip, qırımtatarlarnıñ episini sürgün etkenleri aqqında, cebeden vatanına qaytıp kelgen bir çoq qırımtatar ofitserleriniñ, Qarasuvbazarda, Aq Qaya tübünde qurşunğa tizilgenleri aqqında ögrendi. Soy – sopı aqqında malümat alıp olamadı ve Moskvağa yol aldı. Mudafaa nazirligine muracaat etken soñ, aylesi Özbekistanğa sürgün etilgeni aqqında ögrendi. Olarnı Bekabadta taptı. Özüniñ ofitser paralarına Ferğana şeerinde evçik aldı ve aylesini anda köçürdi. Ondan soñ, askerlikke mecbur olğanı sebebinden arbiy qısmına qayta. Reşat ağa 1946 senesi, gvardiya kapitanı unvanında ordudan demobilizatsiya ola. Cenkte, Reşat Sadredinov batareya komandanı, 17 duşman uçağı urıp tüşürgen, I ve II derecede Ulu Vatan cenki nişanınen, Bogdan Hmelnitskiy ordenınen (Ukrainanı azat etkeni içün), «Qaramanlığı içünr» ve «Cenk yararlıqları içün» medallernen  mukâfatlanğan bir insan edi.

Sürgünlik yerlerine, soy – sopı arasına qaytıp kelgen Reşçat Sadredinov, komendaturağa qayd etüvge tura. Mında gvardiya kapitanınıñ bütün mukâfatlarını tartıp almağa istediler ve er ay qayd etilüvge kelmesini istediler. Soñradan, cebe ofitserini, vilâyete tibbiy teminatnıñ idarecisi olıp tain eteler, 1948 senesi ise, teşkerüv – teftiş idaresiniñ başlığı eteler. Bu vazifede, o 1984 senesine qadar çalıştı.

1990 senesi Reşat Sadredinovnıñ aylesi Qırımğa qaytıp keldi. 1993 senesinden berli Reşat ağa, cenk veteranlarınıñ Bağçasaray şurasınıñ azası edi, «Slava trudu» gazetasınıñ ştattan tış mühbiri edi. Bu gazetada Sadredinov bir çoq siyasiy, diniy ve tarihiy mevzulvrğa maqaleler bastırğan edi.

Reşat Zevadinoviçniñ üç balası, beş torunı ve on bir torun balaları qaldı.

İçtimaiy ağlarda FacebookVkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Aqmescitniñ merkezinde bir qaç kün suvnen temin etme meselesinde aqsamalar olacaq

Tue, 14/11/2017 - 16:02

Aqmescit sakinlerini 14 noyabrden 16 noyabrge qadar suv kesilmeleri aqqında haberdar ettiler.

Bu aqta «Voda Krıma» şirketiniñ matbuat hızmetinde haber ettiler.

Böyleliknen, 14 noyabr künü saat 9.00 17.00 qadarsuvuq suv Sevastopolskaya soqağında (Kozlova soqağından D. Ülyanova soqağına qadar), Obyezdnaya, Subhi, Bulvarnaya, Voykova, Lihogo, Zavodskaya, Sakoviça, Tambovskaya, Estonskaya soqaqlarında ve Grenajnaya, Üçebnaya aralıqlarında suv kesilecek.

Ondan da başqa, şeer merkezinde, Samokişa, Gogolâ, Görkogo, Karla Marksa, Üşinskogo, Mayakovskogo, Dolgorukovsköy, Aleksandra Nevskogo, Sevastopolsköy, Serova, Geroyev Acimuşkaya, Lunaçarskogo, Puşkina, Jukovskogo soqaqlarında, Kirova caddesinde, Kolhoznıy, Stepan Razin, Kommunalnıy aralıqlarında ve daa bazı bir soqaqlarda, suv yavaş ve ufaq küçnen berilecek.

Suvnen temin etilmesinde çıqqan meseleler, Tolstogo soqağında keçirilgen tamir işlernen bağlıdır, dep aytalar matbuat hızmetinde.

İçtimaiy ağlarda FacebookVkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Mustafa Cemilev aqqında 10 meraqlı fakt

Mon, 13/11/2017 - 17:24

Bugün 13 noyabr künü, belli qırımtatar siyasetçısı, biñlernen qırımtatarlarnıñ lideri Mustafa Cemilev öz doğğan kününi qayd ete. Çoqusı qırımtatarlar içün, onıñ ayatı – bu tarihiy Vatanımızğa qaytıp kelme oğrundaki küreşnen tedaiylenedir. Onıñ içün bizler de, M. Cemilevniñ tercimeialından eñ meraqlı vaqialarğa diqqat çekmege istedik.

  1. Mustafa Cemilev 1943 senesi 13 noyabr künü Cürçi (Pervomayskoye) rayonınıñ Bozköy köyünde dünyağa keldi. Bu yerlerge Mustafa Cemilevniñ ana – babası Sudaq regionınıñ Ay – Serez (Mejdureçye) köyünden sürgün etilgen ediler.
  2. Özüniñ siyasiy baqışları ve sovet rejimine qarşı yapqan areketleri sebebinden, M. Cemilev aliy oquv yurtundan çıqarılğan ve yedi kere mahkemege çekilgen edi.
  3. Umum olaraq, apiste o, on beş yıl keçirgendir: 1966 – 1967, 1969 – 1972, 1974 – 1975, 1975 – 1976, 1983 – 1986, ve Yakutiyada 1979 – 1982 senelerinde sürgünlikte oldı.
  4. Gülistanda 1959 senesi mektepni bitirgen soñ, Taşkentte aviatsiya zavodında tornacı, çilengir ve elektrika boyunca çilengir olıp çalıştı.
  5. Cemilevni Taşkent köy hocalığı irrigatsiya ve melioratsii injenerler institutından, “XIII – XVIII asırlarda Qırımda türkiy medeniyeti aqqında qısqa tarihiy öçerk”niñ “milletçiligi” olğanı içün ve qırımtatarlarnıñ sürgünliginiñ tenqid etkeni içün çıqarıp taşlağan ediler.
  6. O, sovet ordusında hızmet etmege red etken edi ve onıñ içün 1, 5 yılğa apis etilgen edi.
  7. 1969 senesi Sovetler Birliginde insan aqlarnı qorçalaycı İnitsiativ gruppasınıñ teşebbüsçilerinden biri oldı.
  8. 1979 senesiniñ mart ayından Kolımada, Zirânka qasabasında cezasını keçken vaqtında, oña kelecekte qadını olacaq Safinar kelgen edi. Anda olğanda oğlu Hayser de doğğan edi.
  9. 1983 senesi fevral ayında azat etilgen edi, ve apayı, oğlu ile birlikte, 39 yıl keçken soñ Qırımğa avdet olıp, Saq şeerinde yaşağan tanışlarınıñ evine köçe. Amma üç künden soñ, olar yarımadadan sürgün etileler, olarnı şeer şeerden alıp yüreler. Qırımtatarlarnıñ piketlerinden soñ, Cemilevni azat ettiler ve o, öz aylesinen Özbekistanğa Yangiyül şeerine qaytıp kele. Polis nezareti altında buluna.

10.Cemilev eki kere Nobel mukâfatına namzet etile: 2009 senesi onıñ namzetini Birinci Bütündünya qırımtatar kongressi taqdim ete, 2011 senesi ise, zulum etilgen halqlar Cemiyeti.

Avdet gazetasınıñ muarriyeti Mustafa Cemilevge yollanılğan bir çoq hayırlavlarğa qoşula ve oña qaviy sağlıq, uzun ömür, küç ve Vatanına tez vaqıtta qaytıp kelmesini tiley.

İçtimaiy ağlarda FacebookVkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Aqmescitte Qalğa Sultan sarayınıñ topraqlarında birinci tapılmalar etildi (FOTO, VİDEO)

Mon, 13/11/2017 - 16:51

Qazmalar devamında, Qırım hanlığında, handan soñ emiyeti ve ürmeti boyunca ekinci yerde turğan  Qalğa Sultannıñ sarayı yerleşken topraqlarda birinci tapmalar çıqtı. Alimler bu topraqlarnıñ sıñırlarını belgilemege ve medeniy asabalıq reyestrine kirsetmege isteyler.

Şurflarnıñ birinde, tarihçiler, orta asır qalavını, bir çoq qurucılıq keramikasını, balçıqtan yasalğan suv borularını, çini ve cam savutlarınıñ parçalarını taptılar.

«Bizim çalışqanımız tek eki kün oldı ve şu müddet içinde medeniy qat qalımtılarını tapqanımızğa quvana ve ğururlanamız. Bizler qurucılıq keramikasınıñ qısımçıqlarını taptıq: borular, kiramet, çölmek  ve sırnen qablanğan savut – saba qalımtılarını çıqardıq. Hanlıq devirinden aqçalar da bar», – dep qayd etti Qırımnıñ arheologiya institutınıñ ilmiy hadimi, Qırım müendislik ve pedagogika universiteti tarih kafedrasınıñ müdiri Emil Seydaliyev.

Onıñ aytqanlarına köre, aynı böyle keramik borular, Bağçasaraydaki han sarayda ve Eski Qırımda qazmalar neticesinde tapılğan edi. Borularnıñ  diametrine köre, olar sarayda yerleşken çeşmelerni suvnen temin ete ediler.

«Tapmalar sırasında – Qırım hanlığına ait ve üstlerinde, olarnıñ vaqtında darp etilgen hanlarınıñ adları yazılğan eki para da bar. Olarnıñ yardımı ile, bizler başqa tapmalarnıñ tarihini ögrene bilemiz», – dedi alim.

Saray qalımtıları tapılğan yerde, umumen 10 şurf yapılacaq. Arheologlar noyabrniñ soñuna qadar çalışacaqlar ve, biz eminmiz, olarnı daa bir çoq meraqlı tapmalar bekley. Soñ qazmalar kelecek sene devam etecekler, dep haber ete «Rossiyskaya gazeta».

«Qırım arheologiya institutınıñ» müdiri Vadim Mayko qayd etkenine köre, bu yerlerni araştırma ekspeditsiyası muvafaqiyetli neticelenecek, medeniy qat bulunğanı şimdiden belli oldı, dedi. İşlerniñ birinci qısmı 30 noyabrge qadar yekünlenecek. «Eñ müim meselemiz – medeniy qat olğanını tasdıqlamaqtır. O, eski zamannıñ qurucılıq qalımtılarını tapmağa şansımız bar, bu arheologik sensatsiya olacaqtır. Zemaneviy usullarnen sıñırlarnı belgiley bilemiz ve bu yerlerni medeniy asabalıq reyestrine kirsete bilemiz», dep Maykonı sözlerini ketire KİA.

Qırım musulmanlarını diniy idaresi de, bu yerlerniñ ibadet inşaatları olgşan qısmına iddia ete.

Hatırlatamız, 2015 senesi, Qırım müftisi Emirali Ablayev, Cumhuriyet başı Sergey Aksönov ile keçirgen körüşüvinden soñ, Qalğa Sultannıñ orta asır sarayı kompleksi ve XV asırğa ait, Mengli Giray I tarafından qurdurılğan cami yerleşken topraqlarda qurucılıq işleri toqtatılğan edi.

Avdet bu mevzuğa bağışlanğan bir qaç maqale neşir etken edi. Olarnıñ müellifleri Qırım alimi Nariman Abdulvaap ve bizim “Strana Krım” rubrikamıznı alıp barğan tarihçi Öleksa Gayvoronskiydir.

İçtimaiy ağlarda FacebookVkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

 

Qırım akimiyeti naqliye bergisini arttırmağa ve bir qısım imtiyazlarnı lâğu etmege istey

Mon, 13/11/2017 - 15:46

Qırımda naqliye bergisini eki kerege arttırmağa isteyler.

Munasip leyhanı, Qırım Devlet şurasınıñ baquvına Sergey Aksönov yolladı.

Bu vesiqa boyunca, 150 – 200 at küçü olğan arabalarınıñ bergi derecesi 15 rubleden 30 rublege, 200 – 25- at küçü olğan arabalarnıñ ise, 20 – 75 rublege, 250 ziyade olğan küçüne – 50den 100 rublege qadar artacaqtır.

Ondan da başqa mototsikl ve motorollerge bergilerni köterilmesi planlaştırıla. Bu naqliye saiplerine, 20 at küçüne qadar olğan köçüriciler içün 2 rubleden 4 rublege qadar bergi derecesi köterilecektir. 20den 35 at küçüne qadar olğan mototsikl ve motorollerniñ bergilerini 4 rubleden 6 rublege qadar köterilmesi tahmin etile. 35 küçünden ziyade olğan naqliye çeşitleriniñ bergisini ise, 10 rubleden 15 rublege qadar köterilmesi tahmin etile.

Ondan da başqa, qanun leyhasında avtobus ve yük maşnalarına alınğan bergilerni, er bir at küçüne 5 – 10 ruble qoşulması nazarda tutula.

Vesiqada, 100 at küçünden ziyade olğan yahtalarğa bergi derecesi, 100den 150 rublege qadar köterilecegi aqqında aytıla. 100 at küçüne qadar olğan gidrotsikllarğa fiyat 50 rubleden 100 rublege köterile, 100 küçünen ziyade olsa 100 rubleden 200 rublege qadar ola bile.

Qanun leyhası, bergi ödemesinde, ayırı imtiyazlarnı lâğu etilmesini de nazarda tuta. Qanunnıñ yañı taririnde, arabanıñ çıqma yılına ucuzca bergi berme meselesi, endiden soñ olmaycaq.

İçtimaiy ağlarda FacebookVkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Qırımda tesbit etilgen mahsulat ve hızmetlerniñ fiyatları qaç olğanını sayıp çıqtılar

Mon, 13/11/2017 - 15:43

Tesbit etilgen mahsulat ve hızmetlerniñ fiyatı ve sakinlerniñ satın alma qabiliyetleriniñ teñeştirüvi devamında, 2017 senesiniñ oktâbr ayını, Qırım boyunca, orta qarar, bir insan içün 13693 ruble teşkil etkendir, demek yıl başından 4,4% köterilgendir.

Bu aqta Krımstat bildire.

2017 senesiniñ iyül ayına, bu köstergiç 13880, 40 rubleni teşkil etken edi.

Avgust ayınada, Qırım boyunca minimal mahsulat ve hızmetler fiyatı, bir insan başına, 3844 ruble edi.

İçtimaiy ağlarda FacebookVkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Şahin Gireyniñ nesili ve Nahçıvan

Mon, 13/11/2017 - 14:15

Musa Güliyev – Azerbaycan Milliy ilimler akademiyasınıñ Nahçıvan bölüginiñ tarih, arheologiya ve etnografiya İnstitutınıñ üyken ilmiy hadimi, felsefe ilimler doktorı.

Tarihiy malümatlarğa köre, Qırım hanlarınıñ ecdatları Çingiz hannıñ sülâlesinden kelip çıqadırlar. Gireyler özleri ise, Çingiz hannıñ üyken oğlu Cüçiniñ mirasçıları, dep sayya ediler. Mustaqil Qırım hanldığı XV asırda, Altın ordu yıqılğan soñ meydanğa kelgendir [1, s. 211]. Gireyler (Geray) sülâlesiniñ tarihini ögrengen türk alimi  Halil İnalçik, Qırım devletiniñ birinci hanı Haci Girey ola, o mında 1428 senesinden başlap tahtqa otura, soñki ükümdarı ise, Şahin Gireydir [2, 209 – 210]. 1783 senesi Qırım Rusiye tarafından zapt etilip, istilâ etilgen edi, ve 1784 – 1785 seneleri ükümdarlıq etken Bahadur Girey II ve Şahin Girey II soñki Qırım hanları olğandırlar [3, s. 211 – 212].

1785 senesinden, Qırım hanlığı öz devletçiligini yoq etken soñ, qırımtatarlar içün ağır zamanlar keldi. Olarnıñ bir qısmı, şu sırada Şahin Girey özü de, mecburiy hristianlıqqa keçirile edi. Şahin Gireyniñ nesilinden olğan Akim Pavloviç Şan Girey (1815 – 1883) Nahçıvanda uyezd idaresiniñ başlığı olğandır. Onıñ babası Pavel Petroviç Şan Girey, Şimaliy Kavkazda bir çoq topraqlar saibi edi, anası Mariya Akimovna (1799 – 1875) Akim Hastatovnıñ qızı edi. Onıñ anası Yekaterina, M. Lermontovnıñ ana tarafından bitası  Yelizavetanıñ doğmuş tatası edi. Tata – qardaş, belli Stolıpinler sülâlesine ayit eolıp, pek zengin ediler [4, s. 483].

Yekaterinanıñ “Şelkovoye” ve “Zemnoy ray” çiftlikleri bütün Rusiyege belli edi. 1825 senesi, Lermontovnıñ bitası Yelizavetanıñ tevsiyesine binayen, Şan Girey aylesi Penza vilâyetine, Tarhanğa yaqın olğan Apalihke köçe. Böylelikne, yaqın soy olğan M. Lermontovnıñ ve Akim Şan Gireyniñ balalıqları birlikte keçe. Akim Şan Girey, Peterburgda yerleşken artilleriya oquv yurtunı oqıp bitirdi, orduda hızmet etti ve podporuçik unvanında ordudan ketti [5, 33 – 35],  1844 senesi ise, Lermontovnıñ duelde öldürilgeninden soñ, o Pâtigorsk şeerine köçe.  1845 senesi onı Nahçıvan vilâyetine idare başlığı etip qoyalar [6, 497 – 498], buña, Stolıpinde aqayda olğan Akimniñ tatsı yardım ete.

Bu vazifede çalışqan seneleri Akim Şan Girey irrigatsion işlerinen de oğraşa. O, Şarur okrugında Arpaçay özeni yanında 24 yılğa topraq kiraladı ve Şengiley kanalını qurıp başladı. O zamanki menbalarda, konal qurucılığına yerli ermeniler qarşı çıqıp, keder etkenlerini aqqında haber keçe. Amma bu çatışmalarğa baqmadan, o öz işini toqtatmadı, ve özüne yardımcı olaraq Nahçıvan hanı Kalbalını alğan edi. Akim Şan Girey Nahçıvannen, vazifeden ketken soñ, bile bağlarını coymadı, anda kiralanğan topraqlar meselelerinen oğraşa edi [7, s. 15].

Araştırmacılar arasında, Akim Şan Gireyniñ vefat etken vaqıtı aqqında davalar kete. Ya 1883, ya da 1913 senesi deyler. Bu davalarğa sebep olaraq, 1918 senesine qadar Şarurede yerleşken çiftligine ait olğan vesiqalarnıñ tübünde peyda olğan “Şan Girey” imzası olğanldır. Belli rus alimi ve şarqşınası K. N. Smirnov, özüniñ “Nahiçevannıñ tarihi ve etnografiyası boyunca  materiallar” kitabında “Vilâyetniñ sabıq başı Şan Girey, topraqlar satıp aldı, kanal qurdı ve onıñ oğlu Nahiçevan vilâyetinde büyük çiftlik saibi oldı” [8, s. 53]. Bu araştırmada, 1913 senesine qadar yaşağan Akim Şan Girey , üyken Akim Şan Gireyniñ oğlu olğan, onıñ ası ladı Arim eken, qadını ise, Dorohova soy adı ile, qazaqlardan eken [9]. Kence Akim Şan Girey aqqında malümatnı belli tarihçi, alim Ali Aliyev bermekte, o Şan Girey 1913 senesi, Erivanda, ermeniler tarafından öldürilgeni  aqqında yaza [10, s. 94 – 95]. Kitapta daa, “Şengiley kanalı” 1870 senesinden 1896 senesine qadar qurulğanı qayd etile (11). Üyken Akim Şan Gireyniñ vefatından soñ, 1883 senesi Şengiley kanalınıñ qurucılığını, onıñ oğlu, müendis Akim (Arim) Şan Girey devam ettirdi, amma esas leyhalar onıñ babası tarafından yapılğan edi. Ondan da başqa, üyken Akim Şan Girey, yuqarıda aytıp keçkenimiz Kalbalı hannıñ ricasına binayen Ganlıgel gölüniñ tiklemesini başladı. Bu havuz 1747 senesi nahâıvanlı Geydaroğlu han tarafından, quruqlıq yerlerini suvarmaq içün qurdırılğan edi [12, s. 95].

Üyken A. P. Şan Gİreyniñ qadını Emiliya Aleksandrovna Klingenberg edi (1815 – 1891), olarnıñ eki balası bar edi. Akim ve Yevgeniya, qızları Yevgeniya 1943 senesi vefat etken [13, s. 614]. A. Şan Gireyniñ çiftliginde pek çoq ermeni çalışqanını qayd etmek kerek, belki de onıñ içün qırımtatarı olğan Akimni, çoqusı insanlar ermeni belley ediler. Bir çoq menbalarda Şan Gireyge qarşı, aysorı olğan ve Nahçıvanda mal mülkuni qazanğan Cahan Poladov, iranlı ermenilerden olğan Saaka Yegizarova mahkeme işlerini alıp barğanını belli ete. Bu işler boyunca vesiqalar, kence A. Şahin Gireyge malik edi, şimdi olar NARnıñ Devlet arhivinde saqıl turalar [14].

Kence Akim Şan Girey, Şarurda bağçevanlıqnen oğraşqandır. Özüniñ Peterburgda, 1901 senesi, 20 avgustta derc etilgen “Şarurdaralagezde Bağçevanlıq, yüzüm östürüv, qarpız asravcılıq ve köy hocalığınıñ başqa saaları” kitabında bu yerlerde çeşit şeftali ve qaysı çeşitleriniñ östürüv hususiyetleri tasvir etip [15, s. 215], Şarurskta bağçacılıqnen oğraşmaq kerek olğanını qayd ete edi.

P. Şan Girey, pek cesür adam edim. Onıñ süt anası ve baqıcısı çerkeslerden ediler. O zamanları qırımtatarlar arasında, doğğan ballarnı Kavkazğa, çerkes köylerine yollamaq adeti bar edi, ballar anda arbiy işlerge ögrene ve terbiye ala ediler. Böyleliknen, qırımtatarlar ve Kavkaz milletleri arasında sıqı bağlar peyda ola edi. Onıñ içün, Akim Şan Girey, böyle çerkes aylelerini birinde terbiye alğandır, dep tahmin ete bilemiz [16, s. 197]. Belli olğanı kibi, rus yazıcılarından L. N. Tolstoy, A. S. Puşkin, M. Yu. Lermontovlar, çerkesler ve olarnıñ arbiy hususiyetleri aqqında pek güzel seslene ediler. Meselâ, Lermontov aks etken, Azamat ve Kazbek çerkesler edi [17, s. 209], Kazbiçniñ prototipi ise, kerçekte olğan Gızıl bek edi [18, s. 54 – 62].

O vaqıtlardan berli endi eki asır keçti, amma Qırım hanlarınıñ nesillerinden olğan insanlarnıñ yasağan şeyleri, azerbaycan halqına ale daa hızmet etmektedir.

Edebiyat

  1. Bosvort K.E. Musulmanskiye gimnastii. Moskva, 1971.
  2. Anda.
  3. Anda.
  4. Lermontov M. Yu. Proza i pisma, t. IV. Leningrad, 1981.
  5. A.P. Şan-Girey. M.Yu.Lermontov. V kn.: M.Yu. Lermontov v vospominaniyah sovremennikov.
  6. Anda.
  7. Sagaletov. İravanskaya güberniya i ekonomika Gekçagüla. Tiflis, 1879.
  8. K.N.Smirnov. Materialı ob istorii i etnografii Nahiçevanskaya kraya. Baku, 1999.
  9. Gosudarstvennıy arhiv Nah. A.R f. 23. öpis 1, d. 1188.
  10. Qliyev E. Qlinca yadda§i. Naxgivan, 1914-1922. Baki, 1997.
  11. Anda.
  12. Anda
  13. Lermontov M.Yu. Ukaz rab.
  14. Gosudarstvennıy arhiv Nah. AR. f.1, öpis 1, delo 22/1, f. 27, d. 195.
  15. Babayev S. Naxgivan Muxtar Respublikasinin cografiyasi. Baki, 1999, s. 215.
  16. ASE (Azarbaycan Sovet Ensiklopediyasi).
  17. Lermontov M.Yu. Proza i pisma, t. IV. Leningrad, 1981.
  18. Vinogradov. Gortsı v romane Lermontova “Geroy naşego vremeni”. V kn.: M.Yu. Lermontov. Jizn i tvorçestvo. Orconikidze, 1963.

İbraim Voyennıy

Müellifniñ tüşünceleri, muarririyet fikirinen doğru kelmey bile

İçtimaiy ağlarda FacebookVkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.  

Eñ qaranlıq geceden soñ, bile tañ ata

Sat, 11/11/2017 - 20:05

26 oktâbr künü, üylege qadar, bizge teatrge «Yaşa, Vatanım, yaşa Millet!»  adlı kontsertke barmaq içün eki bilet ediye ettiler. Bu bahşış beklenilmegen oldı, onıñ içün biz memnüniyetliknen onı qabul ettik.

Begengen artisterimizni körecek eyecanımıznen teatrge kete edik, zalga kirgende ise, ayırı bir tantanalı müit is etiik. Er kes köterenki ruhta edi. Soñki vaqıtları milletimizniñ taqdiri öyle, ğaliba, qvanç da, keder de birlikte. Milletimiz parlaq kelecek arzularınen yaşay… Er bir evge ve aylege yetişken quvançlı haber ise, vatandaşlarımızğa öptimizm berdi. Belki de bu sebepten, bu aqşam öyle güzel edi!

Seytabla Memetov, Dilâver Settarov, Emine Cevdetova, Asan Bilâlov kibi artistlerimiz, öz yırlarını acayip icra ete ediler. Oyun taqımları ise, halqımıznıñ eñ meşur oyun avalarımıznı taqdim ettiler. Bütün bu kontsert, Vatanımıznıñ güzelligini köstergen videonen keçe edi. Kontsert alıpbarıcısı Fatime Asanova ise, belli şairlerimizniñ eserlerini oqudı ve müitke ayrı hususiylik qoştı. Çünki bu şiirlerde halqımıznıñ ağır taqdiri ve onıñ Vatanına olğan balaban sevgisi aks olunğan edi.

Böyle şiirlerni diñlep, bütün qıyinçıqlar artta, dep tüşünesiñ. Artistlerimizniñ er bir çıqışını, seyirciler el çırpmalarnen qarşılay ediler. Kontsertniñ soñunda ise, «Yaşa, Vatanım, yaşa Millet!»  yırı yanğırap başlağanınen, episi seyirciler ayak üstüne turıp, artistlerimizge, yıprnıñ maqamını tutıp el çırptılar! Çoqusı insanlar kiçkene ballarını başlarından yuqarı kötere ediler. Mına, çoq beklenilgen! Netice olaraq, men belli halq şairimiz Refat Çaylaqnıñ, finalda yanğırağan, şiirini yazmağa isteyim.

Qırımım, men yaşap

olamam sensiz,

Yanımda şuvuldamasa

deñiz,

Quş-qaya üstünde

uçmasa qartal.

Men içün qızarıp

Al tañlar atmaz.

Kökusümde çalt-çalt

urğanda yüregim

Men Qırımsız,

Qırım mensiz yaşap olamam.

Bu dünyada –

Ana-yurtum öksüz qalmaz!

Mına böyle güzel noqtanen bu acayip aqşam yekünlendi. Sağ olsunlar bizim sevimli artistlerimiz!

İçtimaiy ağlarda FacebookVkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

8 noyabr künü saba, Aqmescitte bir qırımtatar faalinde daa tintüv keçirildi

Thu, 09/11/2017 - 11:40

Saba 8 noyabr künü, Aqmescitte qırımtatar faali Abduraman Mecitovda tintüv keçti. Tintüvden soñ, onı yaqaladılar.

Bu aqta Qırım uquq qoruycısı Rustem Kâmilev haber ete.

Aqmescitniñ Jeleznodorojnıy mahkemesi, Abduraman Mecitovğa 15 kün memuriy tevqif cezası berip, vaqtınca tutqan tevqifhanesine yolladılar, dep haber ete «Qırım.Aqiqat».

Faalni, içtimayi ağlarda qısqa filmçikler yayınlağanında qabaatladılar. Da tafsilâtlıca malümat berilmey.

Avdet haber etkeni kibi, 8 noyabr künü, saba Bağçasarayda, Eski Qırımda, Aqmescit rayonınıñ Zareçnoye köyünde ve Kirovskiyde, Seytumer Seytumerovnıñ, Alimdar Bilâlovnıñ, Eldar Kantemirovnıñ ve Ekrem Abdulvatovnıñ evlerinde tintüvler keçirildi.

İçtimaiy ağlarda FacebookVkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Tahqiqat komiteti, Rusiyeniñ Qırımda çalışqan FAS idaresiniñ başını, özüni öldürüvge qadar alıp barma qabaatı boyunca cinai iş açtı

Thu, 09/11/2017 - 11:35

Rusiyeniñ Qırımda çalışqan Tahqiqat Komiteti, monopoliyağa qarşı çalışqan idareniñ başı Timofey Kurayevnı öz özüni öldürilmesine qadar alıp barma qabaatınen cinai iş açtı.

Bu aqta Tahqiqat Komitetiniñ matbuat hızmetine atıf etip, «Kömmersant» bildire. Bu haberni «RİA Novosti» ve TASS agentlikleri bildire.

«Kömmersant»nıñ bildirgenine köre, Timofey Kurayev 7 noyabr aqşam, işten Aqmescitteki dairesine qaytıp keldi. Apayı ve eki balası yuqlap qalğanını bekledi, vannasına kirip, anda öz özüni astı, dep yaza gazeta.

Neşirde qayd etilgeni kibi, Timofey Kurayev, öz vazifesinde olğanda, Keriç keçitindeki fiyatlarnı yerine ketirdi, Qırım cermay taşıcıları ise, 2017 senesiniñ oktâbr ayında, kartel añlaşması qurğanları içün, 129 million ruble cöreme tolegen ediler.

Hatırlatamız, 8 noyabr künü, Aqmescitte Qırım boyunca çalışqan Rusiyeniñ monopoliyağa qarşı idaresiniñ başı Timofey Kurayev ölü tapılğan edi.

İçtimaiy ağlarda FacebookVkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Avropa Şurası Rusiyeni Minsk añlaşmalarını yerine ketirmekte mesüliyetli, dep tanıdı

Thu, 09/11/2017 - 11:28

Avropa Şurasınıñ nazirler komiteti, Rusiyeni Minsk añlaşmalarını yerine ketirmekte mesüliyetli, dep tanıdı.

Bu qararnı Avropa Şurasınıñ matbuat hızmeti derc etti.

Komitet bu añlaşmalarnı tez ve tolu şekilde yerine ketirilmesine çağırdı.

Şura Ukrainanıñ keçirgen islâatlarında da ilerilemeler olğanını alğışladı. Ukraina prezidenti P. Poroşenko haber etkenine köre, mında söz vekâletniñ merkezden çevrelerge berilmesi, qabarcılıqqa qarşı keçirilgen küreşler, Yuqarı mahkemede yapılğan qanuniy deñişmeler aqqında kete.

Avropa aqiqatı yazğanı kibi, bu qanunğa rey berüvden evel Rusiye öz deñişmelerini kirsetti, amma olarğa iç bir devlet qol tutmadı.

İçtimaiy ağlarda FacebookVkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.