Yalta şeerinde X Cumhuriyet «emşire işi» ihtisası boyunca zenaat ustalıq yarışı (konkurs) olıp keçti. Konkursta Aqmescit, Aqyar, Kezlev, Kerç, Yalta şeerlerinden gençlernen bir sırada Kerçteki G.Petrova adına tibbiyat kölleciniñ 3-nci kurs talebesi Elzara Abdulminova da iştirak etti.
-Qırımnıñ tibbiyat kölleclerinden kelgen yarışnıñ bütün iştirakçileri ciddiy, quvetli, yahşı azırlanğan ediler, - dedi Elzara. - Olar konkursnıñ vazifelerini muvafaqiyetnen becerdiler. Amma menim bilgilerimni jüri eñ yahşı, dep esaplağanına quvanam ve ğururlanam.
Elzara Abdulminova Lenin rayonı Çurbaş (Priozernoye) köyündeki mektepni bitirdi. 2006 senesi Keriç tibbiyat köllecine oqumağa kirdi. Büyük meraqnen bilgilerge ıntıldı. Faal areketçen qıznı birden gruppanıñ reberi (starosta) olaraq sayladılar. Studentlernen beraber çeşit tedbirlerde iştirak ete, kezintilerge bara, amma Elzaranıñ fikirine köre, eñ müimi - oqumaqtır.
İşte, E.Abdulminova üç seneden berli alâ oquy. Er sene emşireler arasında ötkerilgen zenaat ustalıq yarışlarında iştirak ete. Köllec içinde keçirilgen birinci yarıştan başlap Elzara ğalip çıqtı. Soñra oña Bütünqırım konkursqa barmağa teklif ettiler. Qızğa köllecniñ ocaları, direktorı, kursdaşları ruhiy ceetten qoltutmağa tırışalar, mesleat bereler.
İşte, konkursta yaş emşireler testlerden keçtiler, ameliyat (hirurgiya), pediatriya, terapiya boyunca öz bilgilerini kösterdiler. Elzara Abdulminova birincilikni aldı, oña Sağlıqnı saqlav vezirliginiñ fahriy yarlığı, bahşışlar, çeçekler taqdim etildi. Jüri azaları, ocalar, dostları Elzaranı hayırlap, oña muvafaqiyet ve insanlarğa hastalıqlarnen küreşmege yardım etmekni tilediler.
Naciye BATALOVA.
Fikirler
Fikirleriñizni yazıñız