25-27-iyünde Türkiyedeki Sakariya şeerinde 9-ncı Halqara nazm (poeziya) festivali keçmekte. Bu sene tedbir qırımtatar edebiyatına ve muzıkasına bağışlanğan. Festivalde Qırımdan Ablâziz Veliyev, Nariman Abdulvaap, Fera Seferova, Şevket Yunusov, Ayşe Kökiyeva ve başqaları iştirak etecekler. Festival iştirakçileri arasında Makedoniya, Kosovo, Bösniya, Yunanistan, Bulğarıstan, Romaniyadan kelgen alimlerdir.
Bu merasim Medeniyet ve turizm vezirligi, Türkiye işbirlik ve inkişaf idaresi (TİKA), Sakariya şeer memuriyeti qoltutuvı ile teşkil olunğan. «Bu tedbir halqara cemaatçılıqnı qırımtatar edebiyatı ve medeniyetiniñ zenginliginen tanış etecek», - dedi festivalge davet olunğan pedagogika ilimleri namzeti Enise Abibullayeva.
Festivalde üç kün devamında qırımtatar edebiyatınıñ esas yönelişleri, inkişaf basamaqları muzakere etilecek. Plenar toplaşuvlarında filologiya ilimleri namzeti Şevket Yunusovnıñ «19-20 asırlarda qırımtatar edebiyatı», filologiya ilimleri namzeti Fera Seferovanıñ «Qırımtatar edebiyatı repressiyalar ve sürgünlik devirinde», edebiyatşınas Nariman Abdulvaapnıñ «Han devirindeki qırımtatar edebiyatı», yazıcı Ablâziz Veliyevniñ «Qırımtatar edebiyatınıñ kelecegi» mevzusında maruzalar taqdim etilecek.
QHA.
Fikirler
Fikirleriñizni yazıñız