22-iyünde Türkiyeniñ Kocaeli şeerindeki qırımtatar dernegi delegatsiyasınıñ Qırımğa ziyareti yekünlendi. Delegatsiyanıñ maqsadı - 250 qırımtatar oğlanı içün sunnet ve 10 kelin-kiyev içün toy merasimlerini ötkermek edi. Dernek reisi İbraim Ara-ci reberligindeki delegatsiyasında Kocaeli şeeriniñ başı (mer) İbrahim Karaosmanoğlu da bar edi.
17-iyünde, yani ziyaretniñ birin-ci künü, dernek vekilleri Milliy Meclis reisi Mustafa Cemil ile körüştiler. Körüşüvde Bütündünya qırımtatar kongressiniñ prezidenti Refat Çubar, Qırım baş veziriniñ muavini Aziz Abdulla, Meclisniñ tış alâqalar bölüginiñ reberi Ali Hamzin, Meclis azaları, cemaatçılıq vekilleri iştirak ettiler.
Mustafa Cemil muhtac ve çoqbalalı qorantalardan balalarğa sunnet em de nikâh merasimleriniñ para masraflarını öz boynuna alğan Kocaeli derneginiñ vekillerine teşekkür bildirdi.
İşte, 18-20-iyün künleri Qırımda 250 oğlançıqqa sunnet yapıldı, cümleden: Bağçasarayda - 25 bala, Kezlevde - 50 bala, Or-Qapu (Krasnoperekopsk) - 75 bala, Seitler (Nijnegorsk) - 30, Aqmescitte - 40 bala bu merasimden keçti.
19-iyünde Kezlevde Cuma-Camisinde cuma namazından soñra 10 qırımtatar kelin-kiyevi içün nikâh merasimi ötkerildi.
Hatırlatmaq kerek ki, böyle musulman merasimleri Kocaeli dernegi tarafından Qırımda üç seneden berli keçirile. Bıltır 166 balağa sunnet yapıldı ve 7 cemaat toyu teşkil etildi. 2007 senesi 125 balağa sunnet, 5 kelin-kiyevge toy etilgen edi.
Elvida İSLÂMOVA, QHA.
Fikirler
Fikirleriñizni yazıñız