25 Apr 2009 | Siyaset
OBSE Aliy komissarı Knut Vollebeknen körüşüv
Aprel 22 künü Milliy Meclis reisi, Ukraina halq deputatı M. Cemilev azlıqnı teşkil etken milletlerniñ işleri boyunca OBSE Aliy komissarı Knut Vollebek ve onıñ üyken mesleatçısı Klemens Büşer ile körüşti. Körüşüvde Milliy Meclis reisiniñ birinci muavini R. Çubarov, Meclisniñ tış alâqalar bölüginiñ yolbaşçısı A. Hamzin ve Meclisniñ tasil ve medeniyet idaresiniñ başı S. Kacametova iştirak ettiler.
Körüşüv iştirakçileri K. Vollebekniñ teşebbüsinen ağımdaki seneniñ iyül ayında ötkerilecek mahsus «tögerek masa» aqqında fikir paylaştılar. Qırımtatar halqı aq-uquqlarınıñ tiklenilüvi boyunca azırlanayatqan qanunnıñ leyhasına umumiy yanaşuv işlep çıqmaq içün «tögerek masa»ğa Ukraina akimiyeti, Milliy Meclis vekilleri ve halqara ekspertler davet etilecegi közde tutula. R. Çubarov Avropa komissiyası ve Ukraina öz boynuna alğan vazifelerni nasıl eda etkeni boyunca Avropa Şurası Assambleyası parlamenti Mönitoring komitetiniñ vekillerini de davet etmekni teklif etti.
Körüşüv iştirakçileri - Milliy Meclis azaları işbu «tögerek masa» halqara ekspertler, Ukraina devleti ve qırımtatar vekilleriniñ Ukrainada halqımıznıñ problemlerini adaletli çezmek oğrunda umumiy ve sistemli işniñ başlanuvına temel qoyar, degen ümütlerini bildirdiler.
K. Vollebek Milliy Meclis yolbaşçılarınıñ Ukraina ve Qırımdaki içtimaiy-siyasiy vaziyetke dair noqtaiy-nazarlarınen, cümleden, Qırım cemiyetindeki radikal baqışlar ve sabırsızlıqnıñ ifadelenüvinen, Büyük cami etrafında davanıñ çezilüv ketişatınen meraqlandı. M. Cemilev sürgünlikniñ 65 yıllığı arfesinde Qırımdaki Rusiyege meyil bergen küçlerniñ faalleşkenini, bazı matbuat vastalarında qırımtatarlarğa qarşı publikatsiyalar çıqqanını da qayd etti. Bundan ğayrı, Qırım akimiyetiniñ bazı vazifedar şahısları çeşit türlü «rus blok»larında ve saire teşkilâtlardaki cemaat vazifelerinden faydalanaraq, qırımtatar ve ukrainlerge qarşı areketlerge yol bergenlerini de bildirdi.
Körüşüvde tasil meseleleri de baqıldı. S. Kacametova Qırım mekteplerinde «iqtisadiy inqiraz sebebinden» qırımtatar tilli sınıflar qapatılmaq havfı astında qalğanlarını, işbu problem esassız olğanını aytıp, OBSE Aliy komissarına «Tasil» mecmuasınıñ mahsus sanını taqdim etti.
K. Vollebek ana tilinde tasil meselesini izaatlayaraq, yaqın vaqıtta Qırımda OBSE Aliy komissarınıñ teşebbüsinen ilmiy konferentsiya ötkerilecegi ve oña QMC Tasil ve ilim nazirliginiñ vekilleri em de Milliy Meclis tasil ve medeniyet idaresiniñ yolbaşçıları davet etilecegini bildirdi.
Körüşüv iştirakçileri iyül ayında Kiyevde ötkerilecek «tögerek masa»da baqılacaq qanun leyhaları boyunca tekliflernen almaşmaq ve qoşma konsultatsiyalar keçirmek aqqında añlaştılar.
Meclisniñ matbuat hızmeti
Fikirler →
Fikirleriñizni yazıñız