25 Apr 2009 | Siyaset
Aprel 22 künü Qırım Yuqarı Şurasınıñ nevbetteki sessiyası olıp keçti. Sessiyanıñ kün tertibine 32 mesele qoyuldı. Zalda toplanğan 91 deputat bazı bir meseleler boyunca keskin munaqaşa qozğadı.
Deputatlar birinci nevbette Topraq resursları boyunca cumhuriyet komitetiniñ reisi N. Golubevniñ nefaqağa çıquvı munasebetinen onıñ yerine QYŞnıñ Agrar ve topraq meseleleri, ekologiya ve tabiattan ratsional faydalanuv boyunca daimiy komissiyasınıñ sabıq reisi O. Rusetskiyniñ saylanması aqqında meseleni baqtılar ve onıñ namzeti içün 79 sesnen rey berdiler. «Qurultay-Ruh» fraktsiyasınıñ reisi R. İlyasovnıñ bildirgenine köre, bu namzetke bizim fraktsiya da qoltutqan.
- Bu adam bizim halqnen bağlı topraq meselesinen yaqından tanış ve onıñ bizge faydası olur, dep işanamız, - dedi R. İlyasov.
O. Rusetskiy ise, öz nevbetinde, «narazılıq meydanlarınen bağlı problemni tüşünip-taşınıp, qavğa-davasız çezmek kerek, dep sayam» dedi.
Bizim devlette ise qanunlar menfaatdar taraflarnıñ istegine köre, çeşit türlü tarzda telqin etilgenini epimiz pek yahşı bilemiz. Fraktsiyamıznıñ işançını qazanğan O. Rusetskiy de az-buçuq bu qanunlarnı bizim faydamızğa telqin etecegine duacımız.
Qırım deputatları ve şu cümleden «Qurultay-Ruh» fraktsiyası Qırımda «Si-Briz-2009» arbiy talimleriniñ ötkerilmesine ve Ukraina Prezidentiniñ müddetinden evel vazifesinden boşatılması aqqındaki talapqa kesen-kes qarşı çıqtılar. «Qurultay-Ruh» fraktsiyasınıñ reisi R. İlyasovnıñ bildirgenine köre, sessiyanıñ kün tertibine keskin munaqaşalar doğuracaq eki mesele kirsetilmegen.
- «Rus blokı» «Aprel 19 künü Yekaterina II Qırımnı, Taman ve bütün Kuban vilâyetini Rusiye devletiniñ terkibine kirsetmek aqqında Manifest imzalağan kün» olaraq qayd etilmesi ve Aqmescitte Yekaterina II abidesi ğayrıdan tiklenmesi teklifinen çıqqan edi. Sessiyadan aldın men, fraktsiyanıñ reisi olaraq, kün tertibine bu suallerniñ qoyulmasına kesen-kes qarşı çıqtım. Bu meselede maña Prezidium ve Yuqarı Şuranıñ eñ büyük «Regionlar» fraktsiyası qoltutqanları içün teşekkürler bildirmek isteyim, - dedi sessiyanıñ neticelerinden memnün olğan R. İlyasov.
Dinara RUMİYEVA
Fikirler →
Fikirleriñizni yazıñız