Tuvğan tilim! Ana tilim! Kene yaşa! edebiy-bediiy teatrleştirilgen programma seyircilerni tüşüncege daldırdı

Ana tilimiz halqımıznıñ ruhiy baylığıdır. Onıñ inkişafı millet olaraq saqlanıp qalmaq meselesinde esas yer tuta. Şu sebepten ana tili problemi diger müim meselelernen bir sırada tura.

Mart 31 künü Qırımtatar akademik milliy-drama teatrimizde "Tuvğan tilim! Ana tilim! Kene yaşa!" adlı edebiy-bediiy teatrleştirilgen programma olıp keçti. Bu programmanı Milliy Meclisniñ qoltutuvınen "Qardaşlıq" cemaat teşkilâtı, "Maarifçi" birleşmesiniñ yaşlar bölügi, Qırımtatar akademik muzıkalı-drama teatri teşkilâtlandırdı.

Programmada "Qardaşlıq" teşkilâtı azaları, Milliy teatrimiz, "Cemile" balalar ansambli, "Qırım gençleri" ansambli, Aqmescit şeer 42 sanlı mektepniñ 2-nci sınıf talebeleri iştirak ettiler.

Edebiy-bediiy programmada klassik ve zemaneviy şairlerimizniñ tilnen bağlı şiirleri oquldı, "Qırım gençleri" ansambli öz oyunlarınen seyircilerni quvandırdılar. "Cemile" ansambli "Qalaylı qazan", "Salaçıq" ve diger oyunlarnı numayış etti.

42 sanlı mektep talebeleri til aqqında şiirler oqumaqnen bir sırada teatrniñ yaş artisti Niyara Mecitovanen beraber Memet Nuzetniñ "Ana ile bala arasında" şiirini sanalaştırıp oqudılar. Soñra milliy urba kiygen qızçıqlar ellerine qoqlaçıqlar tutıp, "Aynenni" yırladılar.

"Qardaşlıq" azaları ve teatr artistleri beraberlikte tilimizniñ bugünki vaziyeti ve kelecegine ait levhalarnı numayış ettiler. Tilimizni yahşı bilgen yaş yigit tilimizge ecnebiy sözlerni qarıştırıp laf etken dostlarına doğru yapmağanını añlatmaq maqsadınen qarıştırılğan er bir ecnebiy söz içün qutu içine bir kapik taşlamağa talap ete. Bu insan yüzünde tebessüm peyda olmağa sebepçi levha nutqumızğa diqqat etmege çağıra.

Ekinci levhada aradan 65 yıl keçe ve bu eki genç endi qart ola. Olar sanki teleyayın baqalar. Sanada bugünki künümiz ve ümüt berici kelecegimiz aqqında qısqadan videofilm kösterile. Bunı baqıp, yaşlıqta ana tilimizge diqqat etip, nutuqlarını ecnebiy sözlerden temizlegenlerine quvanalar.

Bu tedbirde ana tilimizni unutsaq, oğraycaq faciamız aqqında da levhalar yardımınen söz yürsetile.

Teşkilâtçılar edebiy-bediiy teatrleştirilgen programmada böyle levhalarnı numayış eter ekenler, bizim kelecegimiz bugünki künde özümizni nasıl alıp barsaq, onen sıqı bağlı olğanını köstermege tırışalar, yani eger biz bugünden başlap, milletimizni saqlap qaluvda esas faktor olğan ana tilimizde laf etsek, Qırım bizimki olur, barıp da unutsaq, ecnebiy til üstünlik yapsa, biz İvan ağa Mambetovlarğa çevirilirmiz.

Programmanıñ soñunda "Maarifçi" birleşmesi milliy tasil keñeşiniñ yolbaşçısı QMPU üyken ocası, bir sıra luğatlarnıñ müellifi Seyran Üsein, V Milliy Qurultay teftiş komissiyasınıñ reisi Qurtegen Asan, Milliy Meclis medeniyet ve tasil idaresiniñ reisi Safure Kacamet, Milliy teatrimizniñ iş yürüticisi Reşat Ahtemov ve digerleri çıqışta bulundılar. Olar tilimiz, devletçiligimiz aqqında çoq nasiatlı, güzel sözler ayttılar, istekler bildirdiler.

Bu acayip "Tuvğan tilim! Ana tilim! Kene yaşa!" programmanıñ müellifleri "Maarifçi" birleşmesi yaşlar bölüginiñ reberi Elvira Böriyeva ve "Qardaşlıaq" yaşlar teşkilâtınıñ reisi Zaur Halkeçtir. Sanalaştırmağa ve oynamağa Qırımtatar akademik muzıkalı-drama teatri yardım etti. Bular rejissör Refat Seit-Ablayev, artistler Enver Bilâlov, Zeynep Yağyayeva, Eldar Celilov, Eskender İslâmov, Niyara Mecitovadır.

Milliy teatrniñ bediiy reberi Ukrainada nam qazanğan sanat erbabı Bilâl Bilâlov, leyihanıñ reberi Milliy Meclis medeniyet ve tasil idaresiniñ reisi Safure Kacamet.

Programmanıñ soñunda teşkilâtçılarğa ve icracılarğa "Maarifçi" teşkilâtı tarafından güller taqdim etildi.

Naciye AMETOVA


Qırım gazetasından alındı: http://www.qirim.info/?p=1102

Комментарии

Excellent writing, I am very

Excellent writing, I am very happy to get exceptional and beneficial thoughts from this submit. I've been following your blog for a while now and feature located it quite informative and also exciting and you've very exceptional way of expressing the object, looking for another article. I am running for an online provider providing organization, the intention of the organization on my own makes this one of the best essay writing service. It makes a specialty of patron delight and manufacturing of high first-class papers. Their reliability cannot be wondered with the aid of customers. Their writers constantly have something to offer to their consumer, which is the price for his or her money. Not forgetting writers, they deal with their homework satisfactory.

Работает на Drupal, система с открытым исходным кодом.