Türkşınaslıq ve şarqşınaslıqnıñ müim meseleleri

Şu mevzuda mart 20-23 künleri Tavriya milliy universitetinde keçirilgen IV halqara ilmiy-ameliy konferentsiya  bu sefer  türkşınaslıq ve şarqşınaslıq iliminde büyük itibar qazanğan, qırımtatar tilşınaslığı boyunca birinci ilim doktorı, professor Ayder Memetovnıñ 65 yıllığına bağışlandı.

Konferentsiya arfesinde alim yüksek devlet mukâfatı - Vatan ögünde hızmetleri içün üçünci dereceli ordennen taqdirlengen edi. Konferentsiyanı açqan TMU ilmiy işler boyunca rektor muavini, fizika-matematika ilimleri doktorı, professorı V. Berjanskiy yubilârnıñ ve umumen bu sene açılğanınıñ 90 yıllığını qayd etecek ­şa­rqşınaslıq fakultetiniñ faaliyeti aqqında ikâye etip, keçenlerde türk tili boyunca olimpiadada ğalip çıqqan studentlerge yarlıqlarnı taqdim etti. 

Alimni Tataristan, Qazahistan, Rusiye ve Kiyevdeki zenaatdaşları, bunıñ kibi de QMPU kollektivi samimiy hayırladılar. TMU qırımtatar tilşınaslığı kafedrasınıñ dotsenti L. Aliyeva ve şu kafedra doktorantı, dotsent, filologiya ilimleri namzeti L. Okaz professor Ayder Memetovnıñ ayatiy ve ilmiy yolu aqqında maruza yaptılar. Professornıñ kendisi ise  öz çıqışında  TMUniñ qırımtatar  tasili sistemindeki rolüni aydınlattı.

Milliy areket veteranı S. Memetov alimniñ milliy areketke qoşqan issesi aqqında ayttı. Plenar meclisten soñ  konferentsiya işini  "Qırımtatar tilşınaslığı", "Qırımtatar edebiyatşınaslığı", "Milliy tiller ve olarnıñ özara alâqaları", "Tillerni ögretüvge kulturologik yanaşuv: türk ve şarq tilleri ve edebiyatını ögretüv usulları", "Türkiy ve şarqiy devletlerniñ tarihı ve etnologiyası, tili ve medeniyeti", "Türkiy ve şarqiy tillerniñ tarihı ve bugünki vaziyeti", "Türkiy ve şarqiy tiller ve edebiyatlar" kibi sektsiyalar boyunca devam etti.

Konferentsiyada ğayet meraqlı ve mündericeli çıqışlar yapılıp, türkşınaslıq ve şarqşınaslıqnıñ bugünde-bugün tur­ğan aktual meseleleri muzakere etildi.

Zera BEKİROVA


Yañı Dünya gazetasından alınğan: http://www.yanidunya.org/?p=1678

Drupal tarafından desteklenir. Drupal,açık kaynak kodlu bir içerik yönetim sistemidir