"El-ele" qaytıp kele

2001 senesi mart ayında Krım kanalında kösterilip başlanğan "El-ele" muzıkalı-eglendirici programması seyircilerniñ sevgisini qazanıp, onıñ bir çoq mühlisleri peyda oldı. Yazıq ki, o vaqıt programmanıñ ömrür faqat bir yıl sürdi. Amma keçende yahşı haber aldıq - bu programma yañıdan çıqacaq eken. İşte, bu aqta "El-ele" programmasınıñ müellifi Nureddin Nezir ikâye etmesini rica ettik.

- Bu programma nasıl meydanğa keldi? Böyle ğaye kimden çıqtı?

- Menden er vaqıt: "Bu programmanı yaratqanda böyle ğayeni kimden aldıñ?", - dep soraylar. Kimseden! Umumen men asılında türkim, yani babam ahısqalı, anam sudaqlı. Belki, olar men çetelde bulunıp, anda böyle programmanı körgendirim, dep tüşünedirler. Çünki Türkiyeden alğandırsıñ, dep sora­ğanlar da oldı. Amma men televizorda nasıl programmanı körmege isteyim, milletke eñ faydalı programma angisi olur, dep öz-özümden soradım. Böyle­ce, bu programmanı özüm yarattım.

- Ya ne içün onıñ kösterilüvi toqtaldı?

- Maddiy taraftan yardım kesildi. O vaqıt programma TİKAnıñ yardımınen çıqqan edi. Şimdi de sponsorlarğa muhtacmız. Olarnı 80633851982 telefon nomeri vastasınen biznen bağlanmalarını rica etem.

- "El-ele" yañıdan kösterilip başlanmasınıñ sebepçisi kim ya da ne?

- Halq, halq ve daa bir kere - halq. Programmanı halq begenip baqqan edi ve onı unutmadı.

- O vaqıt bir yıl içinde qaç programma yapıldı?

- Plan boyunca 100 programma azırlaycaq edik. Amma bundan tek 20  programmanı yapıp oldıq. Programmanıñ leyhasında yayınlar kim ile, ne vaqıt yapılacağı, nasıl mevzuda olacağı - episi yazılğan.

- Şimdi ATR telekanalında "El-ele"niñ  eski programmalarınıñ tekrarı kösterile. Ya yañısı ne vaqıt çıqacaq?

-  Eski programmalarnıñ tekrarı bitken soñ, yañısını kösterecekmiz. Yañısı da tahminen bir ya da bir yarım aydan soñ kösterilmesi közde tutula. Şimdi oña azırlanuv kete. Elbet de, maddiy taraftan bizge biraz qıyınca ola, amma inşalla, programma episi bir çıqacaq. Bu programma milletimizniñ ayatınen bağlı çeşit mevzularda ola­caq. Programma şou-programma şekilinde degil de, canlı bir subet şekilinde olmalıdır. Mında qaraman studiyağa, yañı müitke alışmaq kerek ki, onıñ serbest ve raat, eyecanlanmayıp laf etmesi közde tutula.

- Yañı "El-ele"niñ birinci yayınına kim davet etilecek?

- Bu daa belli degil. Amma menimce, eski "El-ele"de iştirak etken bütün musafirler toplanacaq. Çünki olar maña pek yaqın insanlar. Kelecekte programmağa 7 yaştan 70 yaşına qadar adamlar davet etile­cek. Yani yüre bilgen baladan başlap, yüre bilgen qartqa qadar adamlar mında iştirak etecekler.

- Programmanı kim alıp baracaq?

- Şimdi men özüm alıp baracam.

- Yañı "El-ele" eski "El-ele"den nenen farqlanacaq?

- O vaqıt programma nasıl olğan olsa, öyle de olur. Cezveler qoyulır, adamlar toplanırlar. Belki, telefon vastası ile qonuşma da yaparmız. Çalğı taqımları davet etilecek. Kelecekte programmanı sadece studiyada degil de, açıq avada, güzel manzaralı yerde alıp barmaq planlaştırıla. Eminim, programma evelkisi kibi, öyle de tanılır ve halq sevgisini qazanır. İnşalla…

Fırsattan faydalanıp, qırımtatar tiliniñ saqlap qalınması içün fedakârane çalışqan "Yañı dünya" gazetasınıñ hadimlerine öz teşekkürimni bildirem.

Elmara MUSTAFAYEVA  subetleşti


Yañı Dünya gazetasından alınğan: http://www.yanidunya.org/?p=1662

Drupal tarafından desteklenir. Drupal,açık kaynak kodlu bir içerik yönetim sistemidir