"Qırım - menim Vatanım" konkursına yekün çekildi

Er yıl Qırım Tasil ve ilim nazirligi mektepler arasında "Tuvğan til eñ qıymetli barlığımız ve onıñ zenginligi bitmez-tükenmezdir" adlı festival ötkere. Mart 27 künü Qırım müendislik-pedagogika universitetinde bu festival çerçivesinde keçken "Qırım - menim Vatanım" mektep talebeleriniñ icadiy konkursına yekün çekildi. Mezkür konkurs onıñ ğayecisi şair Yunus Qandımnıñ adını taşıy.

Qırım Tasil ve ilim nazirligine yarımadamıznıñ 22 regionından 168 ­icadiy iş keldi. Çoq yazıq ki, yarışta Kefe, Yalta şeerleri ve Qurman rayonı iştirak etmedi. Jüri azaları konkursqa kelgen işlerni közden keçirip, I dereceli diplomlarnen "Şiiriyet" nominatsiyasında Bağçasaray rayonındaki Acı Bolat (Uglovoye) umumtasil mektebiniñ 6-ncı sınıf talebesi Nuriye Azizovanı, Qırım Tasil ve ilim nazirliginiñ istidatlı balalar içün gimnaziya-internatınıñ 8-nci sınıf talebesi Amethan Murtazayevni, "Nesir" nominatsiyasında Saqtaki 1-nci umumtasil mektebiniñ 8-nci sınıf talebesi Alyana Eminovanı ve Ermeni Bazar (Armânsk) şeerindeki 4-nci mektepniñ 10-ncı sınıf talebesi Elzara Muslâdinovanı taqdirlemek qararını aldı.

Yarışnıñ ekinci qısmında altı teatr kollektiviniñ ve altı KVN komandasınıñ çıqışları baqıldı. Konkurs çerçivesinde talebelerge ana tiline sevgi aşlağan ve yarışta iştirak etmek içün balalarnı azırlağan ocalar da Tasil ve ilim nazirligi tarafından fahriy yarlıqlarnen mukâfatlandılar.

Dinara RUMİYEVA


Yañı Dünya gazetasından alınğan: http://www.yanidunya.org/?p=1655

Drupal tarafından desteklenir. Drupal,açık kaynak kodlu bir içerik yönetim sistemidir