Muqaddes miras qaldırğan atamız

İsmail Gasprinskiyniñ doğğan künü munasebetinen

Er yıl mart ayında halqımız dünyaca belli maarifçimiz, mütefekkir İsmail Gasprinskiyniñ doğğan kününi keniş sürette qayd ete.

Mart 20 künü Milliy Meclis, "Maarifçi" birleşmesi, İ. Gasprinskiy adına cumhuriyet qırımtatar kitaphanesi, Qırımtatar sanat müzeyi ve yazıcılardan bir gruppa vekiller İ. Gasprinskiyniñ hatırasına itiram bildirerek, onıñ Aqmes­citteki eykeline  güldesteler qoydılar. Bundan soñ İ. Gasprinskiy adına kitaphanede "İsmail Gasprinskiyniñ pedagogik mirası" adlı tedbir olıp keçti. Tedbirde kitaphane direktorı Ayder Emirov İ. Gasprinskiyniñ bütün işleri teren ögrenilmek, halq içün hızmet etmek kerekligini qayd etti. Milliy Meclis medeniyet ve maarif idaresiniñ başı, "Maarifçi" birleşmesiniñ reisi Safure Kacametova İ. Gasprinskiy milliy tasilimizni sistem olaraq inkişaf ettirgeni hususında maruzanen çıqışta bulundı.

Kitaphane oquv zalınıñ  müdiri Leylâ Qadırova "İ. Gasprinskiyniñ pedagogik mirası" adlı sergini taqdim etken soñ, kitaphaneci Zarema İslâmova İ. Gasprinskiyniñ "Hoca-i subyan" dersligi bundan 125 yıl evelsi dünya yüzü körgenini bildirip, bu derslikniñ tarihını meraqlı tarifledi.İ. Gasprinskiy adına fondnıñ başı Ferit Ziyadinov ve Qırımtatar yazıcıları birliginiñ azası, belli nesirci Üriye Edemova İ. Gasprinskiyniñ eserleri türkiy alemde ayrı yer tutqanları aqqında salmaqlı çıqış yaptılar.Tedbirde İ. Gasprinskiyniñ işlerini yalı­ñız bilmek degil de, olarnı devam ettirmek de ne qadar müim olğanı ayrıca aytıldı. İşte, tedbirde milliy tasilimizniñ inkişafına büyük isse qoşqan oca ve şair Seyran Üseinovnıñ yañı çıqqan üç tilli lu­ğatı ve "Bala şiirleri" adlı kitabınıñ taqdimi olıp keçti. Qayd etmeli ki, mart ayı devamında İ. Gasprinskiyniñ doğğan künü munasebetinen Qırımnıñ bir sıra mekteplerinde büyük maarifçige bağışlanğan oquvlar olıp keçti. Özünden soñ muqaddes miras qaldırğan atamız unutılmağanı, halqımız bir kün ola bütün niyetlerine irişecegine ümüt bağışlay.

Seyran SULEYMAN


Yañı Dünya gazetasından alınğan: http://www.yanidunya.org/?p=1639