Qırım hanlığı devrinden levhalar

Sergiler zalında

Ebet, İnternette bulunmaq imkânı olğanlar Frenkistannıñ Lion şeerinde yaşağan semetdeşimiz Guliver Altinniñ Qırım ve qırımtatar halqı tarihına ait virtual müzeyiniñ eksponatlarınen tanışlar. Bundan bir qaç yıl evelsi Qırımdan Frenkistanğa köçken otuz yaşlı Guliver bey Allanıñ iradesi ve yardımı ile ğayet alicenap işniñ tübüne kirdi. Bir kün tüşünde o, çamurğa taptalğan, horlanğan milliy bayrağımıznı köre ve onı alıp bağrına basa, qorçalamaq istey. Mına beş yıldır ki, tüş ep kerçekleşmekte.

Müzeyniñ ilk eksponatı 2004 senesi fevral 14-te bir mezatta elde etilgen.

Ondan berli 300-den ziyade mezatlarğa qatılğan Güliver beyniñ "Larişes", yani "Baylıq" dep adlandırğan müzeyindeki eksponatlarınıñ sayısı bir biñden ­a­r­ttı. Bugünde-bugün o, dünyanıñ 30 devleti, 252 şeerinen bağ tuta, qayda qaysı hususiy kollektsiyalarda neler satılğanından aman haberdar ola, Qırım hanlı­ğına dair vesiqa, resim, haritalarnı er angi yollarnen elde etmege tırışa. Bu işinde oña ana-babası, ömür arqadaşı Ayşe hanım da yardımcı olmaqtalar.

Türkiyede belli milletperver insanımız İsmail Otar vefat etkende Guliver bey öz-özüne İsmail ağanıñ çırağını söndürmemege söz bergen. Ve o sözüni nasıl tutqanını mart 17 künü Qırımtatar sanat müzeyinde açılğan "Qırım hanlığı devrinden levhalar" adlı sergide kördik.  Müzeyniñ hadimleri, Qırım haberler agentligi, İstanbul dernegi ve bir sıra milletperver insanlarnıñ areketleri sayesinde sergide 70-ten ziyade unikal eksponatlarnıñ köçürme nushalarını seyir etmek şerefine nail oldıq. Rıq tolu sergi zalında alelhusus bir müit üküm sürmekte, sergide bulunğanlarnıñ qalplerini tarihımıznen iftihar duyğusı toldurmaqta edi.

Sergide Qırım hanlarınıñ, körümli devlet erbaplarınıñ portretleri, Qırım hanlığına ait nadir vesiqalar, yarlıqlar,  hanlıq tarihını tedqiq etken alimler ve seyaatçılarnıñ kitapları, qadimiy şeerlerniñ manzaralarını akis ettirgen fransız, alman, ingliz, türk ressamlarınıñ gravüraları, litografiyalarınıñ kopiyaları taqdim etildi.

Vaqtı kelip milliy sanat müzeyimiz yañı binağa köçkende bütün bu qıymetli eksponatlarnıñ asıl nushaları keniş sergi zallarında numayış etilecegine, Qırım hanlığınıñ şanlı devirini ögrenmege istegenler içün ünikal bir menbalar olacağına ümütimiz büyük.

Zera BEKİROVA


Yañı Dünya gazetasından alınğan: http://www.yanidunya.org/?p=1629