Bala qalbine yol açqan yazıcı

Naciye Ametova 50 yaşında

Bala yazıcılarımız arasında özüniñ büyük kölemli olmağan, amma balalar içün añlayışlı, meraqlı yazılğan eserlerinen tanılğan Naciye Ametova (Üseinova) müteşem baarde, Özbekistannıñ Sırdarya vilâyetindeki "Üzbekistan" kolhozında Refat ve Zevriye Ametovlarnıñ çoqbalalı qorantasında dünyağa keldi.

Naciye hanım 1976 senesi Telman adına 19 sanlı umumtasil mektepni bitirdi. 1977-1982 seneleri Nizamiy adına Taşkent devlet pedagogika institutınıñ rus ve qırımtatar fakultetinde aliy tasil aldı. Bunıñnen beraber, "Lenin bayrağı" muarririyetinde açılğan "Köy ve şeer mühbirleri universiteti" aqşamlıq kursunı bitirdi. İnstitutnı bitirgen soñ onı çalışmaq içün "Lenin bayrağı" gazetasına yolladılar. Birinci senesi mektüpler bölüginde esapçı, soñra sanat ve qurucılıq bölüklerinde mühbir olaraq çalıştı.1989 senesi yaş mütehassıs "Yıldız" mecmuasına işke avuştı. O, 1992 senesine, yani me­cmua Qırımğa köçürilgenge qadar, anda üyken muarrir vazifesinde çalıştı. 1995 senesi Qırımtatar muzıkalı-drama teatrinde qırımtatar tilinden ders berdi. Aynı vaqıtta, qırımtatar radiosında, balalar içün eşittirüvler programmasında ikâyelerinen sıq-sıq çıqışta bulundı. 1996 senesinden berli ise "Qırım" gazetasında sanat ve medeniyet bölüginde çalışa. Sanat, medeniyet, maarif, edebiyat mevzularını aydınlata, ter­cimeler yapa, balalar içün ikâye ve şiirler yaza. Gazetada  2004 senesinden başlap "Çoqraq" balalar saifesini azırlap çıqara.

Edibeniñ "Balqurtçıq" adlı birinci şiiri 1975 senesi "Lenin bayrağı" gazetasında derc olunğan edi. Bundan soñra onıñ balalar içün yazğan şiirleri ve ikâyeleri "Lenin bayrağı", "Qırım", "Suvdağ sesi", "Krımskaya svetlitsa" gazetalarında ve "Yıldız" mecmuasında basıldı.

1982 senesi Taşkentteki edebiyat ve sanat neşriyatında "Qarılğaçlar" kollektiv şiirler cıyıntığı çıqtı. Cıyıntıqqa Naciye Ametovanıñ da eserleri kirsetildi. 2000 senesi ise onıñ "Dağda bayram" ikâyeler ve masallar kitabı dünya yüzü kördi. Masallar ve ikâyelerinde büyüklerge ürmet, emekseverlik, dostluq kibi hususiyetlerni balalarğa bediiy obrazlar vastasınen aşlamağa areket ete.

Biz ürmetli Naciye Ametovanı 50 yaşınen hayırlap, uzun ömür, qaviy sağlıq, icadiy muvafaqiyetler tileymiz. Hayırlı yaşlar olsun!

Seyran SULEYMAN


Yañı Dünya gazetasından alınğan: http://www.yanidunya.org/?p=1620

Drupal tarafından desteklenir. Drupal,açık kaynak kodlu bir içerik yönetim sistemidir