Bekir Çoban-zade adına mukâfat komissiyasınıñ bildirüvi

Bekir Çoban-zade adına mukâfat Nizamnamesiniñ talabı boyunca  2008 senesi mukâfatı içün müellifler tarafından  taqdim etilgen eserler 2009 senesi mart 1-ge qadar qabul etildiler. Neticede, komissiyağa 22 eser tüşti.

Bekir Çoban-zade adına mukâfat komissiyasınıñ 2009 senesi  mart 11 künü keçirilgen nevbetteki toplaşuvında  komissiyağa tüşken eserler ve taqdimnameler közden  keçirilip, konkursqa 17 eser seçilip alındı. Konkursqa Bekir Çoban-zade adına mukâfatnıñ ayrı nominatsiyaları boyunca aşağıdaki namzetler seçildi:

1. Qırımtatar tilinde eñ yahşı şiirler kitabı (ya da şiirler destesi) içün.
a). İsa Abduraman. "Tamır". Şiirler, poemalar, balladalar cıyıntığı.
b). Bilâl Mambet. "Dağ çoqrağı". Efsaneler cıyıntığı.
с). Ayşe Kökiyeva. "Taliyim menim".  Şiirler cıyıntığı.
ç). Sadıq Aci-Selimov. "Keçken künler". Destan.  Müellifniñ özü tarafından resimlernen bezetilgen.
 

2. Qırımtatar tilinde eñ yahşı nesir (şu cümleden publitsistik) eserler içün.
a). Zakir Qurtnezir.  "Yürek ağrıları". Esse, publitsistika.
 

3. Qırımtatar tilşınaslığı (derslik, luğat) boyunca eñ yahşı ilmiy iş, qırımtatar edebiyatşınaslığı boyunca eñ yahşı tedqiqat ve eñ yahşı edebiy-tenqidiy eserler içün.
a). Şevket Yunusov. "Nazmiyetimiz ve nesirciligimiz". Tedqiqat.
b). A. Emirova, E. Ğaniyeva, N. Seydametova. "Tilşınaslıq terminleri luğatı".
с). Emine Ğaniyeva. "Qırımtatar tilşınaslıq terminleri". Luğat.
ç). Allahmanlı Mahmud.  "Aşıq Ümerniñ yaratıcılığı". Tedqiqat. Azerbaycan tilinde.
d). Enver Özenbaşlı.  "Aytımlar luğatı". Frazeologizmler (Söz birikmeleri luğatı).

4. Qırımtatar şairleriniñ şiiriy eserleriniñ başqa tillerge ve başqa millet şairleriniñ qırımtatar tiline eñ yahşı tercimeleri içün.
a). Azade-Ayşe Rorlih. İ. Gasprinskiy. Frenkistan ve Afrika mektüpleri".  İngliz tiline tercime.
 

5. Bekir Çoban-zadeniñ faaliyetini keniş teşviqat etüv (populârizlev) içün.
a). Merziye Halitova. "Квартет памяти Бекира Чобан-заде".  Strunnıy kvartet.
b). Fevzi Aliyev. "Bekir Çoban-zadeniñ yırları".  Bekir Çoban-zadeniñ şiirlerine yazılğan yırlar.

6. Qarasuvbazarnıñ keçmişini, bugüni ve kelecegini eñ yahşı sürette akis etken eserler, publikatsiyalar, tedqiqatlar içün.
a). Merziye Halitova. "Легенда Карасубазара. "Ак-Кая".  Fortepiano içün eser.

7. Qırımnıñ tarihı, etnografiya ve sanatşınaslıq saaları boyunca eñ yahşı tedqiqat içün.
a). İsmet Zaatov. "Крымскотатарские художники".  Cıyıntıq-albom.
b). Ülker Musayeva. "Народный учитель".  Документалный очерк деятельности выдаюшчегося крымскотатарского просветителя Усеина Боданинского.
с). Gülnara Bekirova. "Крымские татары. 1941-1991".  Опыт политической истории. 1-ci cılt.

Böylelikle, komissiyağa tüşken 22 eserden konkursta iştirak etmek içün 17 eser seçildi.

Komissiya icatkârlarnı aqımdaki 2009 senesi Bekir Çoban-zade adına mukâfat içün konkursta faal iştirak etmege çağıra.

Bunıñnen birge komissiya şunı da qayd ete ki, bazı müellifler konkursqa olduqça sade ve iç bir nominatsiyağa uymağan eserlerni taqdim etkenler. İleride müellifler ve eserlerni mukâfatqa resmiy sürette taqdim etkenler buña ayrıca emiyet bererek, birincide bu işke olduqça ciddiy yanaşmaq ve komissiyağa taqdim etilecek eserlerniñ bediiy seviyesi ve içtimaiy emiyeti yüksek derecede olmasını esapqa almaq kerekler. Ekincide ise, taqdim etilgen eserler mıtlaqa gazetalarda ilân etilgen mukâfat Nizamnamesinde kösterilgen bir-de-bir nominatsiyağa uyğun olmaları ve taqdimnamede şu konkret nominatsiya kösterilmesi şart.

Konkursqa seçilgen eserler aqqında fikirler komissiyağa mayıs 1-ge qadar yetkizilmeli. Komissiya, matbuatta da, husuan ana tilinde çıqqan gazetalarımızda bu eserler aqqında çoqça fikirler bildirilmesini ve bunda edebiyatşınaslarnıñ, tilşınaslarnıñ, tarihçılarnıñ, sanat erbaplarınıñ faal iştirak etmelerini bekley.

Mukâfat içün konkurs neticeleri mayıs ayınıñ başında ilân etilecek.

Eserler aqqında fikirlerni aşağıdaki adreske yollamalı:
Samokiş soqağı, 8. Simferopol ş. 95011 Ukraina 
e-mail - kitaphane@ismail.crimea.ua


 Yañı Dünya gazetasından alınğan: http://www.yanidunya.org/?p=1619