Ana tilimizde çıqacaq kitaplar keyfiyetli olmalılar

Mart 14 künü İ. Gasprinskiy adına kitaphaneniñ oquv zalında Qırımtatar yazıcıları birligi idaresiniñ kenişletilgen toplaşuvı olıp keçti.

Kün tertibine yazıcılarnı çoqtan raatsızlağan meseleler - ana tilinde neşir etilgen kitaplarnıñ ekseriy alda keyfiyetsiz, bir çoq yañlışlarnen çıqarılğanı, kitaplarnıñ redaktirlenmey neşir etilgeni, olarğa tecribesi olğan mahsus redaktorlar tayin etilmegeni, em de yazıcılarnıñ, müelliflerniñ aq-uquqları kibi meseleler qoyul­ğan edi.

Bu munasebetnen yazı­cılarnıñ toplaşuvına QMC milletlerara munasebetler ve sürgün olunğan grajdanlarnıñ işleri boyunca cumhuriyet komitetiniñ vekili, qırımtatar tilinde kitaplar neşir etken "Qırımdevoquvpedne­şir", "Tarpan", "Dolâ", ­"­O­caq", "Tezis" neşriyatlarınıñ reberleri davet etildiler.

Kitaplarnıñ keyfiyeti ve hususan tışqı bezetilüvi meselesi boyunca sözge çıqqan yazıcılar bir ağızdan keçken sene "Tarpan" neşriyatı tarafından çıqarılğan kitaplarnıñ, hususan, Şakir Selimniñ "Qırımname" adlı eki cıltlıq toplamınıñ 2-nci cıltınıñ, "Mustafa Cevheriy" kitabınıñ, Bilâl Mambetniñ "Dağ çoqrağı", Enver Selâmetniñ "Er şeyiñden, Vatan" ve diger kitaplarnıñ bezetilüvine ayrı­ca itiraz bildirip, neşriyatnı qattı tenqitke oğrattılar ve narazılıq bildirip, bu neşriyatqa qırımtatar yazıcılarınıñ kitaplarını çıqaruv içün sımarış berilmemesini talap ettiler.

Çıqarılacaq kitaplarğa kün-evelden mahsus redaktor tayinlev meselesi üzerinde de ciddiy laqırdı ve teklifler oldı. Çünki kitapnıñ yañlışsız, keyfiyetli çıquvında redaktornıñ rolü pek büyük. Tayin etilgen redaktor, eline qalem alıp, elyazmanı başından soñunace ­oqup çıqıp, közüne ilingen bütün yañlışlarnı, çubarlıqlarnı, manasız cümlelerni ve ibarelerni qayd etip, olarnı tüzettirmek içün müellifnen beraber çalışmağa mecbur ve kitapnıñ keyfiyeti içün o müellifnen beraber cevapkârdır.

Yazıcılar tarafından bu mesele de qattı-qattığa ortağa qoyuldı ve mıtlaqa böyle olması talap etilip, toplaşuvda iştirak etken neşriyat reberlerine yardım tari­qatında, kitap redaktirlevde tecribesi olğan yazıcılarnıñ cedveli tevsiye olaraq taqdim etildi. Neşriyatlar ileride ana tilinde kitaplar çıqarğanda, Yazıcılar birliginen bağlanıp, kitapnıñ janrına ve mevzusına köre redaktorı olaraq şu cedvelden bir de-bir yazıcını celp ete bileler.

Bunıñ kibi de kitaplarnı neşir etüvnen bağlı olğan bazı meselelerde yazıcılarnıñ aq-uquqları hususında da laf yürsetildi ve ayrı teklifler ortağa sürüldi.

Qırımtatar yazıcıları birligi idaresiniñ umumen gürdeli keçken bu toplaşuvında Milliy Me­clis reisiniñ muavini, Qırım Yuqarı Şurasında "Qurultay-Ruh" fraktsiyasınıñ başı Remzi İlyasov da iştirak etti.

Yañı dünyanıñ mühbirleri


 Yañı Dünya gazetasından alınğan: http://www.yanidunya.org/?p=1618