Kitapnen ösem - er şeyni bilem!

Mart 18 künü İ. Gasprinskiy adına cumhuriyet qırımtatar kitaphanesinde kiçkenelerimiz içün "Men kitapnen ösem" mevzusında tedbir ötkerildi.

Oquv zalınıñ müdiri Leylâ Qadırova alıp barğan bu tedbirde balaçıqlarımızğa kitaphanede mevcut olğan bala kitapları, şu cümleden, çetel edebiyatından tercime etilgen kitaplar aqqında ikâye etildi.

Tedbirni Aqmescitteki 4-nci umumtasil mektebiniñ 3-nci sınıf talebeleri yaraştırdılar. Olar şiirler oquğan soñ, "Elifbe bayramı" türküsini icra ettiler. Leylâ Qadırova ise balaçıqlarğa A. Puşkinniñ "Bağçasaray çeşmesi" kitabını bağışladı. Şaire Alyana Osmanova balaçıqlarğa yañı şiirleri ve tapmacalarını oqudı. Tapmacalarnı tapqan eñ faal talebege özüniñ "Tılsımlı qaside" kitabını ediye etti. Tapmacalarnı tapmağa balaçıqlarğa üykenler de yardım ettiler. Balalarnıñ ve üykenlerniñ yüzünde peyda olğan tebessüm tedbir ğayet güzel keçkenini tasdıqladı.

Elmara MUSTAFAYEVA


Yañı Dünya gazetasından alınğan: http://www.yanidunya.org/?p=1616