Üskütniñ keçken künleri

Sürgünlik deşetini on üç yaşında tatqan üskütli ressam Sadıh Aci-Selimov balalıq afızasına mıhlanğan körgen-keçirgenlerini öz resimlerinde akis ettirdi. Onıñ resimlerinde olğan vaqialar tasvirlenip, er biriniñ öz tarihı bar. Sadıh ağa resimlerini komendant rejiminiñ eñ qattı yıllarında sızdı, organlardan olarnı tavuq kümeslerinde, aranlarda saqladı. Aynı zamanda o, tillerde destan olğan dülber-dülber Üsküt köyüniñ facialı taqdiri aqqında şiiriy poemalar, masallar da yazdı.

Bundan yigirmi yıl evelsi men Sadıq ­a­ğanıñ bu resimleri ve eserleri, müellifniñ yüreginiñ eñ teren köşelerinde saqlanğan arzu-hayalları aqqında birinci olıp yazğan edim. Biz vaqıt keçip, bu şeyler mıtlaqa dünya yüzü körecegine, milliy müzeyde sergiler açılacağına ümütimizni cüratsız ifade etken edik. Şükürler olsun, Sadıh ağanıñ arzu-niyetleri ömürge keçti. Bıltır  Qırımtatar sanat müzeyiniñ hadimleri Üskütte ekspeditsiyada olğanlarında ressamnen tanış ola ve soñra onıñ birinci şahsiy sergisini teşkil eteler. Endi Sadıh ağanıñ arzusı - "Keçken künler" destanınıñ neşir etilmesi edi.

"Ömürim zaya keçmedi,
Halqıma hızmet  ettim.
Yaşlığımda başladım,
Maqsadıma keç yettim",

- dep başlay Sadıh ağa destanını. Hal­qımızda iç olmağandan keç olğanı yahşı, degenleri kibi tekrarlanmaz Üsküt şivesinde yazılğan destan ­aqiqiy vatanperver, milletperver insanlar Edem Dudakov ve Üsein Çakalnıñ maddiy yardımı, ülkeşınas Enver Özenbaşlınıñ muarrirligi altında "Dolya" neşriyatında dünya yüzü kördi.

Mart 5 künü milliy müzeyimizniñ hadimleri şu kitapnıñ çıqması munasebetinen  müzeyniñ sergiler zalında büyük bir bayram teşkilâtlandırdılar. Bu vaqia tek üskütliler içün degil de, er kes içün quvançlı ve emiyetlidir. Rıq tolu zalda bulunğan Milliy Me­clis, Müftiyat, Reskomnats hadimleri, universitet ocaları, milliy areket veteranları Sadıh ağanı samimiy hayırlap, böyle işniñ müimligi ve zarurlığını qayd ettiler.

Keyfiyetli kâğıtta, müellifniñ renkli resimlerinen, Üsküt köyüne ait aletlerniñ resimlerinen yaraştırılğan kitap Üskütniñ tarihınen meraqlanğanlar içün ­aqiqiy faydalı bir menba olacağına şübe yoqtır.

Zera BEKİROVA
 


Yañı Dünya gazetasından alınğan: http://www.yanidunya.org/?p=1553

Drupal tarafından desteklenir. Drupal,açık kaynak kodlu bir içerik yönetim sistemidir