Allah yolunda hızmet etmege qarar berdim

"Allah yolunda hızmet etmege qarar berdim" - dey Müftiyatnıñ eñ yaş hadimi Eskender Memet
 

Eskender MEMETOV 1982 senesi Özbekistandaki Taşkent vilâyetiniñ Yangiyul şeerinde doğdı. 1992 senesi ana-babasınen beraber Qırımğa köçip, Aqmescit rayonınıñ Trehprudnoye köyünde yerleşti. Mektepte, Qurman türk litseyinde oqudı. 1999 senesi, mektepten soñ, Azerbaycannıñ Baku islâm universitetine (Zakatala şeerindeki filialı) oqumağa kirdi.

Universitetni bitirip, imam hatip, islâmşınas, şeriat ocası mütehassıslığı boyunca diplom aldı. 2005 senesinden başlap, Qırım musulmanlarınıñ Diniy idaresinde din işleri boyunca hadim olaraq çalışa. Aynı zamanda Qırım Müendislik-pedagogika universitetiniñ qırımtatar ve türk tili ve edebiyatı şübesinde oqumaqta.

- İslâm dinimizge sen ne vaqıt ve nasıl qavuştıñ?
- İslâm dinine meraq mende ta balalıq çağından peyda oldı. Halqımız arasında keçirilgen dualarğa barmaq menim içün büyük bir quvanç edi. Başta, episi balalar kibi, men duada olğan tatlı şeylerni aşamağa seve edim. Bundan ğayrı, qartbabamnen bitam balalıqtan maña ufaq dualarnı ögretip, dualarğa alıp ketip, anda oquta ediler. Onıñ içün dua merasimlerinde iştirak etmege begene edim.
6-7-nci sınıflarda oquğan vaqtımda, tizemniñ oğlu medresege oqumağa kirdi. O, tatilge kelgende, maña dinimiz aqqında çoq şey añlatqan. Ağamnıñ meraqlı añlatuvları maña pek tesir etti. Elbet de, qorantamızda da İslâmnı ögrengenimni alğışlay ediler. Türk litseyinde oquğan maalde Quran oqumağa ve namaz qılmağa tamamınen ögrendim. Neticede, İslâm dinimizge merağım kün-künden artqanı sebebinden, İslâm universitetine oqumağa kirmek qararına keldim.


- Musulman olmaq ve islâm dinine hızmet etmek, yani islâmnen bağlı zenaatnı saylamaq biri-birinden biraz farq ete. Böyle ömür yolunı seçip almaq sen içün ne sebep oldı?
- 9-ncı sınıfta oquğanda, men, qartbabam ve bitam Bağçasaray rayonı Qarlı köyünde yerleşken Eskender azizine bardıq. Qurban çaldıq, dua oqudıq. O aziz yerde men molla olmaqnı arz ettim.
İslâm universitetine kirgen soñ, oquv devrinde milletimiz dinge ne qadar muhtac olğanını yahşı añladım. 0 vaqıt milletimizniñ İslâm qaideleri boyunca inkişaf etmesini doğru ve faydalı kördim. Bugün sovetlerniñ ğaflet yuqusından uyanğan qırımtatar milleti aqiqaten Haq dinimizge sarılmağa, diniy qaidelernen tanış olmağa, yavaş-yavaş ibadetlerni yapmağa başladı. Onıñ içün, vatandaşlarımız İslâmnı yahşı ögrenmeleri içün olarğa bilgili yardımcılar kerek. Bu sebepten diniy bilgiler almaq ve Allah yolunda hızmet etmege qarar berdim.


- Müftiyatta işiñ neden ibaret?
- Qırım musulmanları Diniy idaresinde vazifem diniy meselelerni al etmekten ibaret. Bundan ğayrı, Aqmescit rayonı boyunca cuma namazlarını alıp baram, çeşit diniy tedbirlerde iştirak etem. Kütleviy haber vastalarında, meselâ "Meydan" radiosınıñ "Ezan sedası" programmasında çıqışta bulunam.


- Sen yaş yigitsiñ. Seniñ aqranlarıñ biraz başqaca yaşaylar, zemaneviy tarzda raatlanalar: diskotekalarğa baralar, qızlarnen qatnaşalar. Sen özüñni sıñırlı bir şaraitte yaşağanıñnı sezmeysiñmi?
- Aqiqiy musulman olaraq yaşamağa tırışqan soñ, elbet de yaşayış tarzım aqranlarımnıñ yaşayışından farqlıdır. Men de bir insan olaraq şeñlenem, eglenem, amma bunı İslâm qaideleri boyunca yapam. Teessüf ki, bazı yaşlarımız bunı normal saymaylar, yani diskoklub ya da başqa bir eglence merkezlerine barmağa ve musulmanga yaraşmağan bir şekilde şeñlenmege lâyıq köreler. Albu ki, epimizge malüm, böyle eglenceler ekseriy allarda menfiy neticelerge ketire bile. Gençlernen çoq devamlı subetleştim ve böyle hulâsağa keldim: yaşlarnıñ çoqusı bir vaqıttan soñ, bu eglencelerni boş, faydasız ve zarar ketirici olğanını yahşı añlaylar ve olardan vazgeçeler.
Men bellesem, bugünki künümizde musulman adamına yaraşqan türlü-türlü eglence vastalar bar. Şahsen men olardan daima qullanam. Onıñ içün zemaneviy şaraitimizde özümni sıñırlı tarzda yaşayım, dep saymayım.


- Boş vaqtıñnı nasıl keçiresiñ?
- Muzıka diñleyim. Bir zamanda muzıka mektebinde oquğanım içün, kemanemni qoluma alıp çalam. Qorantamızda üç ağa-qardaşmız, yani qız bala yoqtır. Bu sebepten anama ev işlerini yapmağa yardım etem. Cumaertesi ve bazar künleri bostanda çalışam. Dua merasimine çağırılsam, duağa qoşulam. İstegenlerni Quran oqumağa ögretem. Sportnen oğraşqanıma (kyokuşinkay karate) büyük emiyet berem.


- Qırım gençleri nasıl olğanını ister ediñ?
- Qırımtatar gençlerini dinge sarılğan, urf-adetlerimizge qıymet kesken, ana tilimizni saqlağan bir nesil olaraq körmek ister edim.
Til meselesine yanaşsaq, bugün bu saada büyük bir müşküllik bar. Milletimiz içinde ana tilinde az laf etile, ve yazıq ki, ket-kete laf etkenlerniñ sayısı azlaşa. Bu da bizim içtimaiy müşkülliklerimizge yol açqan birinci sebeptir. Bazıları ana tilimizde laf etmege bile utanalar.

Bu meseleni tek genç nesilimiz al ete bile, çünki temiz tilde laf etken qartbaba-bitalarımıznıñ sayısı kün-künden azlaşa. İster edim ki, yaşlarımız bu müim problemge ciddiy yanaşsınlar. Ana tilini saqlasalar, urf-adetlerimizni bilseler, soñra milletimizni qorçalarlar. Bu da dinimizge köre yaşamağa vesile olur.

Subetleşken Sevil ABDURAHMANOVA


Qırım gazetasından alınğan

Drupal tarafından desteklenir. Drupal,açık kaynak kodlu bir içerik yönetim sistemidir