Kitaphane yañılıqları

İ. Gasprinskiy adına kitaphaneniñ qıymetli kitapları fondunda saqlanılğan kitaplar arasında 1944 senesine qadar Qırımda neşir olunğan derslikler ayrıca yer tutalar. Bu derslikler arasında ana tili, edebiyat, coğrafiya, endese, riyaziyat, fizika, himiya fenleri boyunca kitaplar bar. Olar arap, latin ve kiril urufatlarında basılğanlar. Kitaplar neşir olunğan devir tahminen 1910-1944 senelerni qaplap ala.

Kitaphaneniñ informatsion-bibliografik bölügi tarafından qırımtatar tili ile bağlı "Ana tili derslikleri (Cenkten evel qırımtatar tili boyunca neşir olunğan derslikler ve oquv kitaplarınıñ cedveli)" adlı bibliografik köstergiç azırlanıldı.

Cedvelge 100-ge yaqın derslikniñ bibliografiyası kirsetilgen. Olarnıñ arasında elifbeler, birinci basamaq ve ekinci basamaq mektepleri içün ana tilinden derslikler (grammatika, orfografiya, morfologiya, sintaksis ve punktuatsiya bölüklerine ait) ve oquv kitapları barlar.

Dersliklerniñ müellifleri, tertip eticileri arasında bir sıra belli adamlarımıznıñ, cümleden, maarifçi İ. Gasprinskiy, ocalarımız Y.N. Bayburtlı, A. Odabaş, Z. Abbasova, U. Acı-Asan, E.A. Qurtmollayev, U. Kürkçi, R. Mullina ve digerlerniñ adlarını körmek mümkündir.

Bibliografik cedvel ve kitaplarnen kitaphanede tanış olmaq mümkün.

İnsanğa merametlik, Vatanğa sevgi, cümertlik kibi çizgiler balalıq ça­ğından aşlana. Bu yüksek vazifelerni al etmege bediiy edebiyat yardım ete.

Qırımtatar edebiyatında balalar içün edebiy eserler yaratuv XIX asırdan başlap keniş yol aldı. Cenkten soñki devirde de bayağı eserler yaratılğanı bellidir.

Balalarnı bu edebiyatnen tanış etmek içün İ. Gasprinskiy adına kitaphaneniñ informatsion-bibliografik bölügi tarafından "Bir zamanda bar eken, bir zamanda yoq eken… (Balalar içün tevsiye etilgen edebiyat)" bibliografik cedveli azırlandı. Bu bibliografik cedvelge qırımtatar ve çet edebiyatına mensüp şair ve yazıcılarnıñ eserleri, destanlar ve masallar, tapma­calar, yırlar kirsetildi.

Bala edebiyatı saasında icat etken Asan Çergeyev, Abdureim Altañlı, Ziyadin Cavtöbeli, Cemil Ken­ce, Enver Selâmet, Eşref İbraim, Nuzet Ümerov, Seyran Üseinovnıñ eserleri, işte, bu cedvelde akis olunğanlar.

Bediiy söz ustaları tarafından yaratılğan eserler, halq ağız yaratıcılığı eserleri balalar içün quvançlı eyecan çoqrağıdır ve er taraflama terbiyelev, inkişaf etüv, ösüv esnasında müim vastadır.

Bibliografik cedvel ve balalar içün yazılğan kitaplarnen kitaphanede tanış olmaq mümkün.

Qırım cumhuriyet müessisesi "İ. Gasprinskiy adına qırımtatar kitaphanesi"niñ informatsion-bibliografik bölügi

Kitaphaneniñ tehnikiy ceetten donatılması güzelleşti

Milletlerara munasebetler ve sürgün olunğan grajdanlarnıñ işleri boyunca cumhuriyet komitetniñ qoltutuvı sayesinde İ. Gasprinskiy adına qırımtatar kitaphanesiniñ tehnikiy donatılması bayağı güzelleşti. Kitaphaneniñ sımarışınen emiyetli kitaplarnıñ sergisini keçirmek içün mahsus dolap yapıldı. Yedi zemaneviy kompyuter em oquyıcılarnıñ, em kitaphane hadimleriniñ işini bayağı tezleştirip, qılavuz-bibliografik apparatınıñ mükemmelleştirilmesine hızmet ete.

Milliy kitaphanemizniñ ağımdaki seneniñ devamında Reskomnatsnıñ maddiy yardımı sayesinde öz tehnikiy imkânlarını daa da kenişletip, yañı leyhalarğa irişmek imkânı olur, degen ümüt etemiz.

Kitaphaneniñ hadimleri ve oquyıcıları Milletlerara munasebetler ve sürgün olunğan grajdanlarnıñ işleri boyunca cumhuriyet komitetine öz minnetdarlığını bildire.

İ. NURULLAYEVA,
İ. Gasprinskiy adına kitaphaneniñ müdir muavini


Yañı Dünya gazetasından alınğan: http://www.yanidunya.org/?p=1520