Eşref Şemi-zadeniñ 100 yıllığı munasebetinen azırlanğan biobibliografik köstergiç

Biobibliografik köstergiç qırımtatar klassik edebiyatınıñ körümli sıması olğan şair, edebiy tenqitçi, terciman, muarrir ve teren entsiklopedik bilgili insanğa  - Eşref Abduraman oğlu Şemi-zadeniñ 100 yıllığı munasebetinen azırlanğan. Köstergiç şair aqqında neşir etilgen bibliografik materiallarnı toplap, talil ve tertip etüvinde ilk tecribedir.

Köstergiçniñ esas maqsadı - edipniñ şiiriy, edebiy-tenqidiy, publitsistik eserlerini em de ayatı ve faaliyeti ile bağlı bibliografik menbalarnı taqdim etmektir. Bu menbalar 1926-2008 senelerini qaplap ala, kirsetilgen malümatlar ise qırımtatar, rus, ukrain ve özbek tillerinde berileler.

"Eşref Şemi-zade" adlı köstergiç tertip etilgende İ. Gasprinskiy adına qırımtatar kitaphanesiniñ katalogı ve kartotekası, kitaphaneniñ elyazma ve arhiv materiallar bölüginiñ menbaları qullanıldı. İhtimal, E. Şemi-zadeniñ ayatı ve faaliyeti ile bağlı diger menbalar köstergiçke kirmeyip de qala bildiler.

Köstergiç hronologik şeklinde tizilip, E. Şemi-zade yazğan eserleri em de onıñ ayatı ve faaliyeti ile bağlı eki bölükten ibarettir.

Taqdim etilgen bibliografik köstergiç edebiyatşınaslar, mektep ve aliy oquv yurtlarnıñ ocaları, student ve aspirantlar, kitaphane hadimleri ve oquyıcılarınıñ keniş dairesi içün tevsiye etile.

İ. Gasprinskiy adına cumhuriyet qırımtatar kitaphanesiniñ informatsion-bibliografik bölügi

Yañı Dünya gazetasından alınğan: http://www.yanidunya.org/?p=1483