Ana tilinde bediiy edebiyatnı neşir etüv keñeşi elyazmalarnı qabul ete

Qırım Yuqarı Şurası 2006 senesi iyün 21-de "Sürgün olunğan halqlarnıñ Qırım Muhtar Cumhuriyetinde 2006-2010 seneleri yerleşüvi ve içtimaiy-medeniy inkişafı programması" qararı imzalanğan edi. Bu qararğa binaen ana tilinde bediiy edebiyatnıñ basılması içün Cumhuriyet bücetinden sermiya ayırıla­caq.

Milletlerara munasebetler ve sürgün olunğan grajdanlarnıñ işleri boyunca cumhuriyet komiteti yanında Ekspert-konsultativ keñeş meydanğa ketirildi. Keñeş sürgün olunğan halqlarnıñ vekilleri olğan müelliflerniñ eserlerini Ukraina ve QMC büceti esabına neşir etüv meselesinen oğraşıp, basılacaq bediiy edebiyatnıñ cedvelini tizecek. Mezkür Keñeşke S. Saliyev (reis), Y. Kürkçi (reisniñ muavini), azalar - R. İlyasov, N. Abdulvaapov, S. Abdurahmanov, İ. Zaatov, İ. Kerimov, Ş. Memetov, A. Seytosmanov, Ş. Hublarân, A. Emirov, A. Ablâtipov, S. Kacametova ve R. Fazıl kireler.

Bediiy edebiyatnı neşir etüv ile bağlı işler öz vaqtında ve keyfiyetli eda etilmesi maqsadınen Cumhuriyet komiteti sürgün olunğan halqlardan olğan müelliflerniñ elyazmaları qabul etilip başlanğanını ilân ete. Olar bu yılnıñ mart 1 kününe qadar qabul etilecek. Müellifler eserleriniñ elyazmalarını basma ve elektron variantta, eki taqrizni, pasport ve identifikatsion kodnıñ kserokopiyalarını teslim etmeliler. Muqavele boyunca 2007-2008 seneleri basılması kerek olğan, amma QMC büceti esabına basılmağan eserlerniñ müelliflerini kelip, muqaveleni ğayrıdan tizmekni rica etemiz.

Şunı ilâve olaraq bildiremiz ki, Keñeşniñ qararı tevsiye şekilinde berile. Basılacaq edebiyatnıñ cedveli eserlerniñ aktualligine, emiyeti ve üstünligine köre tizile.

Server SALİYEV, Cumhuriyet komitetiniñ reisi.

Yañı Dünya gazetasından alınğan: http://www.yanidunya.org/?p=1445