Şiir sözü baqiydir

Aqmescitte Yunus Qandımnıñ "Yüreknen qaplanğan yer" adlı kitabınıñ taqdimi olıp keçti

Bir felsefeci: "İnsan öyle yaşamaq kerek ki, o dünyağa ağlap kelgende er kes külsün, o dünyadan külip ketkende er kes ağlasın", - dep aytqan edi. Zanımca, şu sözler bundan bir qaç yıl evelsi dünyadan va­qıtsız ketken sevimli şairimiz, ustazım Yunus Qandımğa tamamile aittir. Y. Qandım aramızda olmasa da, onıñ ölmez eserleri artıq halqımıznıñ variyetine çevirildi.

Kiyevde yaşağan şair Mikola Miroşniçenko ve Y. Qandım arasında çoq yıllar devamında sürgen dostluq bir sıra müim neti­celer berdi. Olar ekisi qırımtatar şiiriyeti ve nesiri antologiyalarını (qırımtatarca ve ukraince), Yunus Temirqaya, Şeryan Ali ve diger şairlerimizniñ eki tilli kitaplarını azırlap, Kiyevde neşir ettirdiler. Y. Qandımnıñ vefatından soñ M. Miroşniçenko şairniñ ömür arqadaşı Sabriye Qandım ile beraber Y. Qandımnıñ eserler toplamını azırlap başladılar. ­Aqiqaten de, dost qadrini dost bilir degeni budır. İşte, keçende Kiyevde Y. Qandımnıñ "Yüreknen qaplanğan yer" adlı kitabı çıqtı. Kitapqa şairniñ şiirleri ve poemaları kene de eki tilde - qırımtatarca ve ukraince (terciman M. Miroşniçenko) kirsetildi.

Fevral 6-da İ. Gasprinskiy adına cumhuriyet qırımtatar kitaphanesinde işbu kitapnıñ taqdimi olıp keçti. Taqdimde Sabriye Qandımova, yazıcılar Şeryan Ali, Ablâziz Veliyev ve Üriye Edemova çıqışta bulunıp, şairniñ icadı edebiyatımızda ayrı yer tutqanını qayd ettiler. "Dağ yanında tursañ, onıñ büyükligini körmezsiñ, dağnıñ büyükligi uzaqtan körüne. Yunus Qandım icadınıñ, işiniñ qıymetini de vaqıt keçer eken daa ziyade añlap başlarmız", - dedi öz çıqışında Şeryan Ali. Tedbirde "İlham" edebiy klubınıñ azası Emine Üsein şairge bağışlap yazğan şiirini oqudı. Bütünukrain informatsion-medeniy merkeziniñ başı V. Yermakov öz çıqışında Y. Qandımnıñ edebiy ve ilmiy eserlerini teren ögrenip çıqmaq, olarnı neşir etmek kerekligi hususında ayttı. Tedbirde şairniñ şiirleri ana tilimizde ve ukrain tiline tercimede oquldı. Kitaphane oquv zalınıñ müdiri Leylâ Qadırova tedbirni ustalıqnen alıp barıp, onı samimiy, sıcaq müitte keçirdi.

Bugün edebiyatımızğa adım atayatqan er bir qalem saibi bu edebiyatnıñ yaşaması içün fedakârane çalışqan ediplerni, şu cümleden Yunus Qandımnı, unutmamaq, olarnıñ eserlerini bilmek kerekler.

Seyran SULEYMAN
 

Yañı Dünya gazetasından alınğan: http://www.yanidunya.org/?p=1448