Aqqımızda

Soñki seneleri internette bir çoq çeşit-türlü qırımtatar saytı meydanğa çıqtı (çoqusını bağlantılar bölügimizde tapıp olasıñız). Olarnı ziyaret etip közden keçirsek, eki meraqlı şey qayd etermiz. Birinciden, deyerlik bütün saytlar ya rusça, ya da türkçe. Bir-eki dane esapqa almasaq, cümlesinde pek az olğan qırımtatarca yazılğan metinler rastkele. Ekinciden, şu saytlardaki malümatnıñ çoqusı soñki haberlerge, vaqialarğa, siyasiy ve iqtisadiy yaşayışqa ait, qırımtatar medeniyeti ve tiline ise pek az diqqat berile.

Bu meseleni çezmek içün bu saytnı yaptıq. Onıñ adı Alem-i Medeniye eski qırımtatar tilinden “medeniyet alemi” olaraq çevirile. Mında siyaset yoqtır, faqat çoq diger şey bar. Meselâ, ilk internetteki qırımtatar kitaphanesi, rusça-qırımtatarca ve qırımtatarca-rusça luğatı, kiril urufatından latin urufatına ve aksine çevirici programma, qırımtatar tilini ögrengenlerge yardım etecek qullanmalar, eski Qırımnıñ fotoresimleri… İleride sayt inkişaf etip yañı malümatnen toldurılacaq. Eger siz saytımıznıñ inkişafına öz isseñizni qoşıp yardım etmege isteseñiz, mıtlaq bizge haber beriñiz.

Bundan da ğayrı bu saytnıñ sabıq Şuralar Birliginde yaşağan qırımtatarlar ve Türkiye, Romaniya, Bulğaristan, AQŞ qırımtatar diasporaları içün ortaq munasebet yeri olmasını isteymiz. Bunıñ içün saytımızda forum bar. Kiriñiz, yazğanlarıñızdan memnün olurmız.
 

Drupal tarafından desteklenir. Drupal,açık kaynak kodlu bir içerik yönetim sistemidir