Edebiyat erbapları -Zaira Zeynetdinova

[suurtash]

Zaira Zeynetdinova 1980 senesi  yanvar 9-da Aqmescit şeerinde doğdı.
Ilk tasilini 1987 senesi Taşkent vilâyetiniñ Yañıyol şeerindeki 12-nci mektepte aldı, soñ oquvını Qırımda Mazanka, Alma-Tarhan, Teberti koy mekteplerinde devam ettirdi. 1997 senesi mektepni bitire ve Aqmescitteki 15 sanlı oquv yurtunda tikicilik kurslarında yarım yıl devamında oquy, onı alâ işaretlernen bitirip, 1998 senesi Qırım muendislik-pedagogika institutınıñ qırımtatar tili ve ehdebiyatı bolügine, ğıyabiy oqumağa kire. Aynı şu yılı Bağçasaraydaki "Marama" milliy örnek sanaatı teşkeliyatına talebe olaraq qabul oluna. Anda 2002 senesine qadar qatnay. Qırımtatar el sanatı saibi ola. Alâ-bügün bu sevimli işinen oğraşa. Bunen birge 1999-2003 seneleri Bağçasaraydaki 5-nci mektepte, soñ ise Teberti koy mektebinde çalışa.
2004 senesi Qırım müendislik-pedagogika universitetini bitire. 2005 senesi anda qırımtatar ve türk filologiyası kafedrasınıñ qadimi olaraq işke qabul oluna. Bügün ise o, qırımtatar ve türk edebiyatı kafedrasınıñ aspirantı.
Qırımda otkerilgen el sanatı sergileriniñ, Romaniyada Halqara medeniyet künleriniñ(2009), Türkiyede olıp keçken seminarlarınıň(2010) ve 2011senesi Türkiyede keçirilgen XI Halqara(Uluslararası) Sapanca şiiriyet aqşamlarınıň iştirakçisi. Bir sıra gazeta ve mecmua maqaleleriniñ muellifi. Aynı vaqıtta şiir yaza. 2008 senesi onıñ "Sevgen yürek aldatmaz" adlı ilk şiirler cıyıntığı dünya yüzü kördi.

[suurtash]

Заира Зейнетдинова 1980 сенеси  январь 9-да Акъмесджит шеэринде догъды.
Ильк тасилини 1987 сенеси Ташкент виляетининъ Янъыёл шеэриндеки 12-нджи мектепте алды, сонъ окъувыны Къырымда Мазанка, Алма-Тархан, Теберти кой мектеплеринде девам эттирди. 1997 сенеси мектепни битире ве Акъмесджиттеки 15 санлы окъув юртунда тикджилик курсларында ярым йыл девамында окъуй, оны аля ишаретлернен битирип, 1998 сенеси Къырым муэндислик-педагогика институтынынъ къырымтатар тили ве эдебияты болюгине, гъыябий окъумагъа кире. Айны шу йылы Багъчасарайдаки «Марама» миллий орьнек санaаты тешкелятына талебе оларакъ къабул олуна. Анда 2002 сенесине къадар къатнай. Къырымтатар эль санaты саиби ола. Аля-бугунь бу севимли ишинен огъраша. Бунен бирге 1999-2003 сенелери Багъчасарайдаки 5-нджи мектепте, сонъ исе Теберти кой мектебинде чалыша.
2004 сенеси Къырым муэндислик-педагогика университетини битире. 2005 сенеси анда къырымтатар ве тюрк филологиясы кафедрасынынъ хадими оларакъ ишке къабул олуна. Бугунь исе о, къырымтатар ве тюрк эдебияты кафедрасынынъ аспиранты.
Къырымда отькерильген эль санаты сергилерининъ, Романияда Халкъара медениет куньлерининъ(2009), Тюркиеде олып кечкен семинарларынынъ(2010)  ве 2011 сенеси Тюркиеде кечирильген XI Халкъара(улусларарасы) Сапанджа шиириет акъшамларынынъ иштиракчиси. Бир сыра газета ве меджмуа макъалелерининъ муэллифи. Айны вакъытта шиир яза. 2008 сенеси онынъ «Севген юрек алдатмаз» адлы ильк шиирлер джыйынтыгъы дюнья юзю корьди

[suurtash]

VATAN
                                        Dünya qocaman, bilem men,
                     Lâkin Vatanımnı sevem!
      Aqranı yoq Qırımım,
      Ogüñde men baş egem!

      Milletimniñ negizi sen,
      Halqım mında tamır atqan!
      Nice horluqlar çekse de,
      Vatan deye saña qaytqan.

      Yelkenleri yelnen tolğan,
      Necatını sende tapqan!
      İradesi bükülmezdir,
      Seniñ içün tökken al qan.

      Yeşil Ada – Tuvğan Qırım!
      Vatanımsıñ, еm de yırım!
      Yeşil Ada – ana Yurtum,
      Menim temelim, ğururım!
                         12.12.2007 s.
UMÜT-ÖMÜR                                                                             

Umüt yipi ep uzana,
Ğalba soñu olmaycaq.
Ömür onı yavaş-yavaş
Tüyümçikke bağlaycaq.

Sadef tüslü incilerni
Birer-birer toplaycam.
Ömür boyu boyuncaqnı
Boynumdan çıqarmaycam.

Ömrüm umüt ile keçe,
Bilmem soñunda ne bar,
Umüt-ömür, ömür-umüt –
Yaz, küz, qış em de bahar.

Ayatımnıñ er bir künü,
Dersiñ inci danesi.
Boyuncaqnıñ özü ise,
Ömrümniñ neticesi.             09.02.2010 s.                                                                                                               
 
SENSİZ       
  Sensiz ayat ayat degil –
  Ğam ve keder deryası.
   Sensiz künler bahtlı degil –
   Olar tek baş belâsı.
   
  Sensiz güller, güller degil –
   Sanki tiken bağçası.
   Sensiz bülbül yırcı degil –
   Bayquş – süküt padişası.
   
  Sensiz deñiz quvanç degil –
   Asretlikniñ mekânı.
   Sensiz dağlar işanç degil –
   Umütsiz çöl er yanı.
 
  Sensiz küneş sıcaq degil –
  Suvuq aynıñ alqası.
  Sensiz yelçik hafif  degil –
  Suvuq qış furtunası.
 
  Sensiz bahar, bahar degil –   
  Yalancı bir alemdir.   
  Sensiz yayla yeşil degil –
  О, menim bir nalemdir.   
 
  Sensiz alem, аlem degil –
  Suvuq qaya, qırlardır.
  Sensiz ömür, ömür degil –
  Tek ağlatqan yırlardır.
 
  Sensiz olmaq yaşav degil –
  Меnim içün azaptır.
  Sennen ömrüm bağlansa –
   Меnim içün yır, sazdır.   
                   
                                    01.03-08.2009 s.







SENİÑ TEBESSÜMİÑ
(Dilyaver Mamutovğa bağışlayım)
Seniň tebessümiň,
Sanki bahar, sanki yaz.
Seniň tebessümiň,
Daldaki ballı kiraz.

Seniň tebessümiň,
Saba doğğan ilk küneş.
Seniň tebessümiň,
Yürek yaqqan bir ateş.

Seniň tebessümiň,
Aynıň yarıq gecesi.
Seniň tebessümiň,
Göňlümniň eglencesi.

Seniň tebessümiň,
Nazlı maqam, şeň bir saz.
Seniň tebessümiň,
Men içün daima az.
Seniň tebessümiň,
Melevşe ile sırdaşır.
Seniň tebessümiň,
Оldı maňa bir yoldaş.

Seniň tebessümiň,
Er vaqıt hayalımda.
Seniň tebessümiň,
Yaşay menim aňımda.

12-18.10.2011 с.


SÖZ BEREM
Oyım, tüşüncem,
Ruyam, hayalımsıň.
Butün barlığım,
Em tayançımsıň.

Allağa biň şukür,
Sen meni taptıň.
Bağrıňa basıp,
Ohşadıň, sardıň.

Men saňa daim
Sadıq olacam.
Söz berem, qalbiňni
İç soldırmaycam.

Seniň namusıň,
Ğururıň olacam,
Sennen er daim,
Bir nefes alacam.

Ömür yolunda
Biz sennen ekimiz,
Bir adım atıp
Maqsadqa yetermiz.                          19.07.2011 s.

UMÜT
Baqışıňda umüt kördim,
Er sözüňde umüt duydum,
Nefesiňde umüt sezdim,
Сanım, umüt ile kezdim.

Umüt degen duyğu – vahşıy,
O insanğa qanat taqa.
Onı köklerge köterip,
Özü çetten baqıp külip baqa.

Umüt işançnlar bağışlay,
Adamlarnı böyle sınay.
Yüreklerge iman bere,
Özü çetten baqıp küle.

Zor zamanda yıldız kibi,
Işıq yaqıp yardım ete.
Lâkin yardım etmek degil,
Tuzaqlarnı açıp kete.

Eminim, çoq kişi oňa,
Can-yürekten inanğandır.
Gece-kündüz umüt ile,
İşanç ile yaşağandır.
Cümlemizge men isterim,
Umüt bizni sınamasın.
Qalbimizde doğsa eger,
Kerçekleşsin! Qırılmasın!

Umüt doğa, umüt öle,
Umüt yana, umüt söne,
Umüt kele, umüt kete,
Ayat umüt ile döne.

22-23.10.2011 ss.

[suurtash]

http://www.youtube.com/watch?v=t7VvvkJNA4k&feature=related