БИР АВУЧ ТОПРАКЪ
Бир авуч топракънынъ къадри ольченир
Юртундан айрылгъан къальп дуйгъусынен.
Юртдашым юртунда олып мусафир,
Явлугъына топракъ ала коюнден...
Нечюн сагъынмасын, шу топракъ узьре,
Балалыкъта чапкъан, секирген тайдай.
Джан-къанына синъген бунда эр зерре,
Сонъ еллер учургъан къамгъакъ, къорайдай.
Коюнинъ авасы, топракъ къокъусын
Унутып олалмай бала чагъындан.
Серин саиллернинъ саба юкъусын
Арз этип яшай о гъурбетте чокътан.
Эр бир халкъ озь ерин севмесе джандан,
Садакъат догъармы буюк Ватангъа?
Бу севги кечмекте эр имтиандан,
Бу севги къуветтир дамарда къангъа.
Ватан топрагъы деп, юрт севгиси деп,
Коклерде йылдырым олды Аметхан.
Шу топракъ кетмеди козь огюнден эп,
Алиме юртум деп, бергенде яш джан!..
Нечюн сагъынмазсынъ дервизаларны,
Тепреч къалакъайын, ешилъ джапларны?
Яйдакъ алашанынъ серт ялларыны,
Культёпе устюнде шакъа лафларны...
Къыдырлез куньлери яйлялар кезсенъ,
Язманынъ леззети айт, кимге тиер!
Озюнъни эр даим халкъынънен сезсенъ,
Юртунъа севгинъ де чокъракъдай иер!..
Далгъалы денъизге бакъа сукъланып,
Дерсинъ асретликтен чынълай Арзы-къыз.
Къаяларны якъын субетдеш санып,
Мусафир юртдашым ой сюре янъгъыз...
Ялы сельбилери оны селямлай,
Шувулдап сёз къата, анъласанъ тилин!..
Тек къарын токълугъына адам яшамай,
Нефесин дуймаса озъ ана илин.
Кундюк къаным тамгъан ярым адагъа
Кельдим опьмек ичюн юрт ташларыны.
Къулакъ асам мында эр бир садагъа,
Олар манъа анъдыра юртдашларымны.
Деделер рухуны дуймагъан эвлят
Акъреби джоюлгъан саатке бенъзер.
Эдждатлар арайлар бизлерден имдат,
Рухларны шад эткен ниетке ирер!..
Коюмиз четинде олгъан мезарлыкъ
Аля хатырамда тикташ дюрбелер.
Шу къадар къулан чёль эттими тарлыкъ,
— Мезарымыз къайда, къайда сюргенлер?!
Бу ерде анъылмай бизим эсаме,
Санарсынъ, олмагъан кърымтатары.
Аювдагъдай къатып къалгъан эфсане,
Халкъымыз гуя саврулгъан тары!
Кърым ёлларында далам хаялгъа,
Аблямит копюри пек ашагъыда.
Янъы бояларнен кечмиш боялгъан,
Бизим изимизнинъ чокътыр шааты.
Энди явлугъыма тюймем мен топракъ,
Онъа эп сыгъынам, сюртем козюме.
Энди къайтмаз олып келирмиз мытлакъ,
Машалла айтырлар бизим тизимге!
ОН ЭКИЛЕР
Дагъларны инълеткен бу фаджианы
Сыгъдырып олурмы дестан баблары.
Бизим джоюкъларнынъ эсапсыз саны,
Энди толдурмалы сийрек сафларны!
Асып-кесмек деври, дургъунлыкъ деври
Шукюр, артта къалды къоркъунчлы тюшдай.
Энди язмалымыз юрек эмири,
Ильхам къанат кере сербест, урь къушдай.
Язмакъ къайда эди Кърым сёзюни,
Атта ава булут демеси ясакъ!
Адалет, акъикъат ачты козюни,
Энди тек яшамакъ, керек яшамакъ!
Юрегим дертлидир кечкен аллардан,
Эп сызып ташлайман язгъанларымны.
Ич бир анъ чыкъмайсыз сиз хаяллардан,
Он экилер, динъленъиз аизарымны!..
Сиз олгъан олсанъыз, биз аджемилер,
Уйдурып отурмаз эдик бейитлер.
Иджатта биз къайыкъ, сизлер гемилер,
Ватан огъурында кеткен шеитлер!
Сиз дженкке кеткенсиз видждан эмринен,
Бир къолда автомат, биринде къалем.
Яралар сызлады сизинъ тенлерден,
Оюнъыз: «Сагъ къалсын, Ватаным, балам!
— Сиз къалемдешлерим, явны ургъанда,
Ана юртунъыздан сюрдилер халкъны.
Яранъыздан къанлар тамлап тургъанда,
Гъурбетлик ёлуна бурдылар халкъны.
Бизлер къапалгъанда, вагон-къафеске,
Сизинъ къуршунлардан геберди душман.
Ватан, Сталин деп, сонъки нефесте
Садакъат ёлунда джан бердинъиз, джан!..
Сизлер савулмагъан он эки ярам,
Айтылмагъан сёзюм ве чыкъмагъан сесим!
Он экилер, сизге буюк итирам,
Сизден къанатлана курешчен неслим.
Шаирсиз халкъ олмай, халкъсыз иджаткяр,
Эм юрттан айрылдыкъ, эм де сизлерден.
Бу элем, асретлик юреклер якъар,
Теселля тапамыз сизинъ сёзлерден!
Эбедий алевнинъ ялынларында
Шиирлеринъизнинъ арарети бар.
Рухунъыз бар денъиз ялыларында,
Къальбинъизге бенъзей раатсыз далгъалар!
Тойда, джыйында янъгъырай йырынъыз,
Бизлер де джошамыз, гонъюлъ юкселе.
Къонамыз башында бардыр еринъиз,
Сизинъ изинъизден яш эвлят келе.
КОПЮРЛЕР, КОПЮРЛЕР...
Таныш копюрлерден кечкенде илле,
Хаялым туташа узакъ ёлларгъа.
Огюмизде беклей нурлу саиллер,
Копюрдай къол берем къыз-огъулларгъа.
Копюрлер, копюрлер, букюльмез беллер,
Инсан такъдирине сиз де такъдирдаш.
Копюрлер, копюрлер коръдинъиз нелер,
Адамдай инъледи сизде демир, таш.
Душман сизлерни де якъты атешке,
Дерсинъ, инсан киби атты, къырдылар.
Копюрлер де тюшти явнен курешке,
Елларны енъишке къурап турдылар.
Биз киби къувулгъан халкълар кечкенде,
Артымыздан куськюн бакъкъан, копюрлер.
Къуршун излери бар сизинъ де тенде,
Теляшлы йылларны такъкъан, копюрлер!
Сизлерге расткелъсем, ойларгъа далам,
Сиз манъа якъынсыз къальби ташлардан.
Сизлерден тюкенмез илъхамлар алам,
Эх, нелер кечмеди бизим башлардан.
Гонълюмизде аля даа сызлай яралар,
Майыс 18-ни хатырлаталар.
Энди дертимизге дерман арайлар,
Энди тюзетилир дюнъки хаталар.
Эвлерине къайтты бутюн эсирлер,
Базы сюргюн халкълар къайтты эвине.
Юртуна асреттир бизим несиллер,
Асрет о, айрылгъан джан-юрегине.
Ана-юрт юректир, халкъ онынъ тени,
Ватан инсанларгъа таяныч, дирек.
Эгер эпкин еллер учурса сени,
Озюне чекеджек кене юрт — юрек!
Тек Ватан багърында гонъюлъ юкселир,
Ана озъ тилинде айнени айтыр.
Гуя ер багърындан садалар келир:
— Эр шей ахыр сонъу аслына къайтыр!
Къушлар ынтылгъандай озъ сачагъына,
Нечюн ынтылмайыкъ ана земинге.
Бизлер де къайтырмыз юрт къучагъына,
Бинъ шукюр, аз къалды козъайдын кунъге!
Копюрлер, бенъзетем сизге озюмни,
Гонъюллер къавуша бейитлеримнен.
Истегим: адамлар окъуп сёзюмни,
Ниетлер бир кельсин ниетлеримнен!..
Кунълеримиз дерсинъ, ташкъын бир озен.
Шу озен ичинден кече ёлларым.
Озенге копюрдай яслана сёзюм,
Кечмишнен ярынны багълай къолларым.
Къызыл китапларгъа кирген тилимнен
Достларгъа багъланам, копюр къурам мен.
Достлукънынъ къадрине еткен илимнен
Адалет сесине къулакъ бурам мен.
Инанам, динълерлер меним сесимни,
Бизим копюрлерден достлар кечерлер.
Огъурлы ёлгъа атлангъан неслимни
Мензилъде корерлер, машалла, дерлер!..
ХАТИМЕ
Окъуйыджым, санъа ачтым гонълюмни,
Озюнъсинъ сырдашым, озюнъ ильхамджым.
Ашкярлыкъ нуруна бурдым ёлумны,
Язгъанларым даа къальбимде тамчы.
Тек санъа ачам мен гонълюмнинъ сырын,
Озюнъе айтаджакъ чокъ лафым бардыр.
Эгер ольченильсе, халкълар сабыры,
Энъ сабырлысы кърымтатардыр!
Озъ юртунда девран сюрип оламай,
Излери ювулгъан юртдашлар акъкъы.
Озъ эвине озю кирип оламай,
Къапыдан къувулгъан юртдашлар акъкъы.
Къальблерден къальблерге копюр олайым,
Гонъюллер саили багълансын къавий.
Тувгъан саиллерге тамыр олайым,
Эр кес яшагъандай, юртта мусавий.
http://tatar.orgfree.com/index.php?option=com_content&view=article&id=184:seryan-aliev&catid=90:yildiz&Itemid=147
Dilber MC Theme by HarzeM