Balalarnıñ köşesi

[Bayrach]

Sayım:
Çıqtım Kefe coluna,
Kefe colu bit-bazar,
bit-bazarda ayu bar,
ayu menı qorqızdı,
qulaqlarnı sarqıttı,
antar, mantar çıq ayağın qanatar.

[AlperenKIRIM]

http://www.youtube.com/watch?v=CQppMFhkxF8

Adile Kurt Karatepe - Ay Nenni (Kırım)

[suurtash]

Mına ne taptım: http://rutube.ru/tracks/885810.html?v=54faf0d1b60a01ea1d36cb565b7501c5&autoStart=true&bmstart=81

Qırım devlet teleradiokomaniyasında seslendirilgen "Prostokvaşino". Amma yazıq ki, tolu degil, tek bir parçası.(Alessandro)

[suurtash]

Алмалар

Багъчагъа бугунь бардыкъ
Бир сепет алма джыйдыкъ,
Ал янакълы алмалар,
Ашап тойды балалар.

Almalar

Bağçağa bugün bardıq
Bir sepet alma cıydıq,
Al yanaqlı almalar,
Aşap toydı balalar.


Армутлар
Меним адым татлы армут,
Армутлыкътыр эвимиз,
Кель сен, Мамут, узь де аша
Бал киби эр биримиз.

Armutlar
Menim adım tatlı armut,
Armutlıqtır evimiz,
Kel sen, Mamut, üz de aşa
Bal kibi er birimiz.


Шефтали

Багъчанынъ шефталиси,
Сап-сары эр бириси.
Эм лезетли, эм ири,
Тойдура онынъ бири.

Şeftali

Bağçanıñ şeftalisi,
Sap-sarı er birisi.
Em lezetli, em iri,
Toydura onıñ biri.

[RiverRat]

Balalarğa İslâm dininiñ temellerini ögretken-añlatqan güzel kitapçıqlar (Qırımtatarca, Kiril elifbesinde):
1. Peyğamberimni ögrenem   http://www.scribd.com/doc/20798173/Tatarca-Peygamberimi-O%C4%9Freniyorum
2. Kitabımnı ögrenem   http://www.scribd.com/doc/20796887/Tatarca-Kitabımı-Oğreniyorum
3. Dualarımnı ögrenem   http://www.scribd.com/doc/20796578/Tatarca-Dualarımı-Oğreniyorum
4. Oğlum Memetke on eki nasiat   http://qirimmuftiyat.org.ua/downloads/books/oglum_memet/oglum_memet.pdf

[RiverRat]

Han ve Yılan

Masal

Qırımda bir yılan bar eken. Pek qorqunçlı, balaban bir yılan olğan. Halqlar o yılandan pek yaman qorqa ekenler. Dersiñ, olar yılannıñ yüregini, onıñ neler tüşüngenini bile ekenler.
Yılanğa haber kelgen: Hannıñ bir qızı bar eken. Han da:
-Qızımnı özümden, baylığımdan, padişalığımdan daa ziyade sevem - dep, maqtanıp yüre eken,- deyler.
Yılan, Hannıñ yalancı yüregini teşkerip baqmağa qarar bergen.
Mına, künlerden bir kün yılan, Hannıñ sarayına han yuqlağanda barıp kirgen. Hannıñ qulağına yaman-yaman sızğırıp, onı yuqusundan uyantqan. Han pek qorqqan.
Yılan, ondan:
-Han degenleri sensiñmi, şu? - dep sorağan.
Han:
-Ebet, menim - dep cevap bergen.
Yılan, tekrar olaraq handan:
-Aytqanlarına köre, sen qızıñnı özünden ziyade seve ekensiñ, doğrumı? - dep sorağan.
Han:
-Doğru, - degen lâkin yılan, hannıñ yalan aytqanını duyğan ve onıñ ayneciligine qarşı olaraq bir kereden kestirip:
-Şay olsa, - degen, - qızıñnı maña qadınlıqqa bereceksiñ. Eger, bermeseñ, tutar da bütün padişalığıñnı yıqar çıqarım, sarayıñnıñ taşı üstünde taş qaldırmay, özüñni ise tilenci yaparım, yer yüzünde tilenir yürersiñ, lâkin haberiñ olsun - saña kimse bir tilim ötmek bermez, çünki ötmekni çalışıp qazanmaq kerek, amma sen iç bir şey yapmağa bilmeysiñ, - degen.
Bunı eşitip, han daa ziyade qorqqan, lâkin ne yapacaqsıñ, yalancı yürek doğrusını aytmağa alışmağan.
Han bir daa:
-Men qızımnı özümden ziyade sevem, - dep tekrar etken.
-Yahşı, - degen yılan. - Şay olsa, aqşam olğanda, sen öz padişalığıñnı, küller içinde köreceksiñ.
Bunı eşitken han, qorqusından tap ağlağan:
-Al, qızımnı degil, canımnı da al da, tek padişalığıma, baylığıma tiyme. Yalvaram... - degen.
Cirenüvniñ ne olğanını bilmegen yılannıñ yüreginde birden-birge cirenüv duygusı doğğan:
-Yılan yüreginden daa beter eken yüregiñ, han! - degen. - Menim qızım olıp da onı menden tutıp almaq içün sen, han, demir bir süngü alıp, onı ateşke qızdırsañ, em bütün vucudımnen oña sarılır, bir yerimde degil, biñ yerimde, bütün barlığımda ağırı duyar, bütün mal-mülkümden ayırılır, lâkin qızımnı saña bermez edim. Yalancı eken seniñ yüregiñ, Han! Yüregiñde aqiqatqa yer yoq eken! Maña köre, endiden soñ insanlar yılan aqqında degil de han aqqında aytsınlar, yılannıñ degil de Hannıñ yüregine baqsınlar. Üstüñe baqmağa cirenem, Han!
Yılan bunı aytqan da, yer yüzü boyu yılışıp, Hannıñ zeerli yüreginden keçip, qobasına qaçqan.

http://qirimtatartili.blogspot.com/2009/10/han-ve-ylan-qrm-tatar-halq-masallar.html
Nuriye Kerim qızı Camanaqlı Emirsuinova, Qırımtatar Halq Masalları

[batugeray]

                NENİYİM (BÜTÜN ANNELERİMİZE)
 
Ak Neniyim, Neniyim; saga ömrüm beriyim.
Ömrüm saga az kelır, iste canım beriyim.

Ak süttüñmen sıyladıñ, men egeşip cıladım;
Kene maga tözülmiy, öz Balam dep sıypadıñ.

Teran östüm şımardım, şaşıñ tartıp oynadım;
Sen ogada kızmadıñ, öz Balam dep Sıypadıñ.

Ötmek salıp toyurduñ, camanlıktan kayırdıñ;
Maga ne? Dep aytmadıñ; öz Balam dep Sıypadıñ.

Babayımnı kızdırdım, soñ ortadan coytuldum;
Koteknı sen aşadıñ, kene betım sıypadıñ.

Caş boldum men üylendım, saga kart dep eglendim;
Sen ogada kızmadıñ, kene betım sıypadıñ.

Kartayganda avurduñ, Neniy neşın aytmadıñ?
Men tuyganda cuvurdum; kene betım sıypadıñ.

Camanlasada kelın, üyümnüñ törü senıñ;
Sen kelemem dep ayttıñ, kene betım sıypadıñ.

Men bonlarga karayman, muñlanıpta cılayman;
Slekiyim şıbırtıp, Neniyim dep mañgrayman.

Mezar başında toñdum, sanma olgende ondum;
Bırden tatlı cel estı, men tüşünüp añnadım;
Kene betım sıypadıñ.

Yazan: Cihangir BORAN
Tarih:  01. 02. 2010
Sakarya (Tırnaksız) Köyü.

[suurtash]

Юнус Юнусов
"Чипчелерим"

http://museum.qirim.org/ekspo/multiki/chipchelerim.swf

Умер Мурадасилов
"Ашхане" v1.0

http://museum.qirim.org/ekspo/multiki/ashane/ashane.swf

[RiverRat]

Naciye AMETOVA

Baar

Keskin saban tişlerinen aqtarılğan topraqlar,
Qar tübünde raatlanıp, bayağı qabardılar.
Künler qıza, qarlar iriy, çubarlana tarlalar,
Cümert topraq üzerinden köterile dım buvlar.
- Baq tarlağa, em qırlarğa, küneş nuru tavlana,
Ana yerde bol bereket zemini azırlana, -
Dep, qartbaba topraq ala nasırlı qollarına,
Zevqnen qoqlap, devam ete sözüni torunına:
- Topraq azır gür emekniñ şefqatını sezmege,
Bu devirde er kes aqlı feraqlanıp kezmege.
Baq etrafqa, ayat qaynay tarlalarda, ülkede,
Baar - emek mevsimi bu, yılnıñ yükü yelkede.


Baqa

Baqaçıq dey: - Vaq, vaq, vaq,
Çeviril de maña baq.
Men pek güzel yaldayım,
Aqşam olsa yırlayım.
Sıçramağa da bilem,
Suv tübünde çoq yürem.
-Vaq, vaq,vaq, - dey, - baqaçıq,
Tüş yalığa oğlançıq,
Ekimiz dost olayıq,
Suvda yaldap oynayıq.


Emineçik

Mavı közlü qoqlasın
Aldı eline,
- Aşasın da yuqlasın, -
Dedi Emine.
Çanaçıqqa toldurıp,
“Botqa” ketirdi.
Üfürip em suvutıp,
“Çay” da içirdi.
Temiz sürtip ağzını
Bizim Emine,
“Yuqu sarğan” Arzını
Aldı eline.
Beşigine yatqızdı,
Örtti üstüni.
Qoqlasına sarıldı,
Yumdı közüni.
Emineçik boldurğan
Pek tez yuqladı.
Qoqla ise yanında
İç köz yummadı.


Perdalez

Perdalez, ep yel üfüre,
Qarnı toqtamay üyüre.
Qar boranı arasından,
Evler zornen körüne.

Etrafta qış üküm süre,
Küneş ep yüksekten yüre.
Amma zayıfça nurları,
Qar içinde sürüne.

Suvuq yel birazdan tındı,
Küneş yıltırap köründi.
Onıñ sıcaq şavleleri,
Yer yüzüni qızdırdı.

Ayaz sıcaqnı iç sevmey.
Kün qızğanını istemey.
Kene suvuq yeller esti,
Qış baarge yol bermey.


Işıq

Evimizde yaşay mışıq,
Adını qoydım Işıq.
Yata, yuqlay, çapa, oynay,
Sıçanlarnı iç tutmay.
Anam ondan pek bezdi,
- Kerekmey, tembel, - dedi.
Eline çırpı aldı,
Mışıqnı evden quvdı.
- Quvmañız, - dep anama,
Bardım mışıq yanına,
- Olmasa o ne yapsın,
Sıçannı qaydan tapsın?
Anamnı inandırdım,
Onı evde qaldırdım.
Bizim küçüçik mışıq,
Portaqal tüs bir ışıq.
Çapqalay, sanki nurçıq,
Tutsañ teni sıcaçıq.


Yardımcılar

Mektepten kelgen tatam,
Dedi maña: - Yür qadam,
Anam işten kelgence,
Soğannı ince-ince,
Etip, dülber doğrayıq,
Tepsini toldurayıq.
Anama qolay olur,
Tez-tez dolma toldurır.
Tatam aldı pıçaqnı,
Men ise çaqıçıqnı,
O arçiy, men doğrayım,
Ağlamağa başlayım.
Közlerimiz acıttı,
Közyaş tığırıp tüsti,
Soğannı çetke attıq,
Tepsini toldurmadıq.
Tatam dedi: - Vay, qadam,
Nasıl dayana anam?!


Bayram

Bugün bayram, Remziye
Doğğan künün qayd ete.
Zevriye, Gülümziye
Qurabye pişire.
Qurtseyit, Seyithalil
Ketirdi şekerqıyıq,
Bağışladı bir top gül,
Em de güzel bir qıyıq.


Hatice

Menim adım Hatice,
Parmaqlarım pek ince.
Yünden kilim toquyım,
Mektepte yahşı oquyım.
Nağışlarım gülgüli,
Örgen şalım topuzlı.
Sanatımıznı sevem,
Avesnen tez ögrenem.

http://www.kalgaydergisi.com/index.php?sayfa=yazaryazidetay&yazi=950

[suurtash]

  MEN SEVERIM. QIRIMTATAR BALALAR
http://www.youtube.com/watch?v=o4y0-UPa-dU

HOŞ KELDINIZ- BALALARGA
http://www.youtube.com/watch?v=EDnxIe6UqIk&feature=related

Qirimtatar aşları-balalarga
http://www.youtube.com/watch?v=dUjqayhawxk&feature=channel

[suurtash]

  Çipçeler- QIRIM TATAR BALALAR
http://www.youtube.com/watch?v=XR-gJvRui94&feature=youtube_gdata

  QIRIM TATAR BALA QAYTARMASI
http://www.youtube.com/watch?v=KJudhA3K08M&feature=channel

QIRIM TATAR BALALARNI YIRI- YIRLAMAGA MEN SEVEM
http://www.youtube.com/watch?v=mRj8bHtweVs&feature=channel

  MEN ANAMNEN LAF ETEM, MEN BABAMNEN LAF ETEM..
http://www.youtube.com/watch?v=wsiIQx37VOQ&feature=channel

[suurtash]

PAPIIM
http://www.youtube.com/watch?v=XmY6rd6eTC8

 EGIZLER- BALALARGA
http://www.youtube.com/watch?v=WTwbeVsYGiM&feature=related

CRIMEAN TATAR Lullaby
http://www.youtube.com/watch?v=rNAAKagJnJA

[RiverRat]

NAR QAMIŞ
(masal)

Bir zamanda bar eken, bir zamanda yoq eken, fuqare bir aqaynıñ bir de apaqayı bar eken. Olar adam barmağan bir adada yaşay ekenler. Olarnıñ bir qızı eki de oğlanları bar eken, amma dünyada olarnıñ qızıday dülber qız yog eken. Künlerniñ birinde, anav qız qartayıp qalmasın dep, öz araları sözleşip qıznı üyken ullarına bermek qararına keleler. Bo qararnı qıznıñ kiçkene qardaşı eşitip tatasına cuvurıp bara.
- Tatam, anamman babam seni balaban aqama qocağa bermek istiyler, - diy.
Qız nege oğrağanını bilmegen, öz özünden utangañ. Bo qız cerden qoluna suv taşığan savutlarından birini alıp çeşmege kete. Çeşmeniñ başında balaban bir göl bar eken, gölniñ içersinde de qamışlıq öse eken. Qız, bo qamışlıqnıñ canına barıp cılay-cılay:
- Canım qamış, açıl qamış, artıq meñ bo dünyanıñ yüzüni körmek istemiymen, -dep calbara. Qamış açıla. Qız qamışnıñ içersine kire de:
- Cabıl qamış, - diy. Qamış cabıla.
Qıznıñ aqası bekliy-bekliy, qardaşı kelmiy. Oñı qarap çığa. Qıdıra-qıdıra tabalmay. Tabalmağan soñ, ğayipten qaber bergen cadığa bara. Cadı oğa qardaşınıñ çeşme başındaki gölde ösken nar qamışlardan biriniñ içinde ekenini ayta.
Oğlan nar qamışlarınıñ canına kele. Şo sözlerni aytıp cırlay:
«Nar, nar qamış, nar qamış,
Açılsa da bir qarış!
Şo qamışnıñ içinde,
Menim yarem bar eken!»
Qamış içinden qız oğa:
«Nar, nar qamış, nar qamış,
Açılmasın şo qamış!
Qardaşına yar degen
Bo dünyada bar eken!» - dep, cevap bere.
Anası da qamışnıñ canına kelip calbarmağa başlay:
«Nar, nar qamış, nar qamış,
Açılsa da bir qarış!
Şo qamışnıñ içinde
Caş kelinim bar eken», - diy.
Qız da qarşısına:
«Nar, nar qamış, nar qamış
Açılmasın şo qamış!
Balasına kelin degen
Bo dünyada bar eken», - diy.
Anasıman aqası cılay-cılay üyge qaytalar. Birazdan közyaşın çıbırtıp kiçkene qardaşı kele ve qamışqa calbarmağa başlay:
«Nar, nar kamış, nar kamış
Açılsa da bir qarış!
Şo qamışnıñ içinde
Menim tatam bar eken», - diy. Qamış açıla. Qız qamış içerisinden çığa. Qardaşınıñ qolundan tutıp, ekisi de o cerden çıqıp keteler. Kete-kete bir suvğa rastkeleler. Qardaşı:
- Tataçığım, şo suvdan bir cutum içiyimmi? - dep soray. Tatası da:
«Eger mından suv içseñ
Toru atqa dönersiñ,
İnsan bolıp ösmezsiñ da,
Bir ayvanğa dönersiñ», - dep cevap bere.
Bala tatasın sözünden çıqmay ve olar collarına devam eteler. Bir köp vaqıt keçken soñ daa bir suvğa rastkeleler. Bala bek susap tatasınıñ suv içmesine izin bermesini istiy. Tatası:
«Eger mından suv içseñ,
Ala qaşqırğa dönersiñ,
Avcıların qolundan
Sopa aşap ölersiñ», - diy.
Bala bonı da dıñnay ve suv içmemege qarar bere. Biraz vaqıt keçken soñ, bir temiz suv bolğan yerge keleler. Qardaşı suv içmek içün tatasından tekrar razılıq soray. Tatası:
«Eger mından suv içseñ,
Aq qozuğa dönersiñ,
İnsan bolıp cürmezsiñ,
Pıçaq aşap ölersiñ», - diy.
Balanıñ da o qadar suv içkisi kele ki, başqa iç dayanalmay. Tatası artına qaramay dep tüşünip, suv aldına bara da, bir qaç cumut suv içe. Şo arada bir qozuğa döne. Tatasınıñ artından qozu sesimen baqırmağa başlay. Tatasınıñ qatına bara, o da qardaşı qozuğa döngenini korüp cana. Qatsin endi, artıq iç bir çare qalmay. Qozu tatasınıñ artından taqılğan. Collarına devam eteler ve bir bağçağa barıp ceteler. Bağça içinde balaban bir terek köreler. Terekniñ tübünde de padşanıñ suv içken çoqrağı bar eken. Qız, qozuçıqnı terek tübüne otlamağa cibere. Özü ise terekniñ töbesine çığıp otura.


(Devamı bar)

[suurtash]

Хатидже Мамут

Манъа оны (масалны) балалыгъымда битамнен къартбабам чокъ айта эдилер.

Бир заманда бар экен, бир заманда ёкъ экен. Бир койде Учкюндюрбаш лагъабыны ташыгъан адам къорантасынен яшай экен. Шу лагъапны онъа, бильмем, я башы шу себзе ошагъаны ичюн бергенлерми, я да бираз анъкъавджасына озюни алып баргъанынамы, амма, о лагъапкъа сеслене экен ве койдешлерине джан агърысы тутмайып юрьген.

Бир кунь Учкюндюрбашымызнынъ апайы онъа къомшу койге барып туз кетирмекни буюртыра. Учкюндюрбаш апайына: "Я не къадар кетирейим?", - деп сорай. Апайы: "Бир авуч." дей. "Я,  мен баргъанджек унутырым да бу ольчевни", - деп эфкярлана Учкюндюрбаш. "Унутмазсынъ!", - деп тынчандыра оны апайы. "Сен ёл бою юреяткъанда, токътамайип: "Сынъыр авуч-къоч авуч!" деп текрарла да, ойлеликнен, баргъанджек эзберлерсинъ шу ольчевни!" Не чареси бар бизим Учкюндюрбашымызны?. Ёлгъа чыкъа ве текрар-текрар: "Сынъыр авуч-къоч авуч", - деп айта бере. (Бесебелли, бир шейни аз микъдарыны козьде тутмакъ, бу сёзлер.) Ёл бою Учкюндюрбашкъа бир богъдайлыкъ (поле, на котором растёт пшеница)  ве онынъ чалгъыджылары (косари) расткеле. Учкюндюрбаш оларгъа: "Селям алейкум! Сынъыр авуч-къоч авуч!", - деп къычыра. Чалгъыджылар, бу сёзлерни  тилек беллеп (как пожелание накосить мало пшеницы), онъа ачувланып, Учкюндюрбашны тутып котеклейлер. Учкюндюрбаш янбашларыны окъалап, чалгъыджылардан "Я, ойле олса, мен не сёйлейим?", - деп сорай. Чалгъыджылар онъа: "Сен ёлда изде корьген инсанларгъа селям-келямдан сонъра, илле "Берекетли олсун!", - деп сёйле"- дейлер. "Адамлар сенинъ тилеклеринъни хошнутлыкъ иле къабул этер."

Учкюндюрбаш ёлуны девам эте. Онъа бир дженазе юрюши расткеле. Мевтаны табут устюнде алып кетеяткъан адамларгъа Учкюндюрбаш: "Селям алейкум, беректли олсун!", - деп бутюн сесинен къарышлай. Мерхумнен ведалашмагъа чыкъкъан адамлар Учкюндюрбашны тутып котеклейлер ве ачувланып онъа "Сен, ахмакъ, бизлер ичюн  не тилейсинъ Юдже Алладан?" "Вай, я мен не айтайым?", - кене айретке къала Учкюндюрбаш. "Сен, дейлер дженазе иштиракчилери, - бойле алда селям дегиль, "Вай, корьмегейди козьлерим, эшитмегейди къулакъларым, бу къара куньлерни, Алла сакъласын, сабыр этинъиз!", деп айтаджакъсынъ.

Учкюндюрбаш разы ола ве ёлуны девам эте. Къаршына той мерасими раст келе. "Той саиплерине ве мусафирлерге Учкюндюрбаш  сесини котерип: "Вай, корьмегейди козьлерим, эшитмегейди къулакъларым, Алла косьтермесин, озю йыракъ этсин, сабыр этинъиз!", - деп къычыра. Той саиплери Учкюндюрбашны тутып дёгелер ве ачувланып: "Сен не ичюн бизге ойле ярамай сёзлер айтасынъ, бизим тоюмызны бозасынъ?", - деп сорайлар. Учкюндюрбаш исе: "Я не дейим?" деп сорай. "Шарра-гурра!", - деп къычырып кетеджексинъ, дейлер тойджулар. Не чареси бар?

 Юре бере бизим гъарип Учкюндюрбашымыз.  Онынъ огюне бир орман расткеле. Орман ичинде авджы отура. Къоянны корип оны нишанъа алып (прицеливаться) тюфегини тиклеп тюшюнджюлерге дала: "Бу къоянны атсам, этини ве терисини сатсам, парасына къой алсам, оны остюрип сатсам, парасына сыгъыр алсам, оны остюрип сатсам, парасына ат алсам, онынъ устюне отурып къомшу койге барып анавы бир Зейнеп деген гузель къызны нишан этсем, тоюмызны япып, эвиме кетирсем... деген терен татлы арзу-ниетлеринден оны "Шарра-гурра!"  къычырыкълавлары айындыра. Къоян, эльбет де,  къача, авджы Учкюндюрбашны тутып сопалай, онъа пыса-пыса юреджексинъ, деп озгъара. "Ниает, насыл юреджегими бильдим!", -  деп Учкюндурбаш багъ-багъча ичине келип чыкъа. Къаравул исе узакътан пыса-пыса келеяткъан адамны корип, оны якъалай ве урмагъа истей. "Урма мени!", - дей  Учкюндюрбаш. "Я  сен хырсызсынъда!" деп къабаатлай оны къаравул. "Ёкъ, мен элял сют эмген инсаным,  мен эвге къайтам!", дей Учкюндюрбаш, бу дарбелерден энди ёлуны да вазифесини унутып. "Эвинъе барсанъ тим-тик олып бар!", - дей къаравул.

Гедженинъ бир маалинде эвине къайткъан Учкюндюрбаш къапыны къакъа. Апайы оны корьмейип, "Ким о?", -  деп сорай. "Бу меним, Тимтиким!", - деп сеслене, адыны биле унуткъан Учкюндюрбаш. "Бурада Тимтик яшамай, кет пезевенк!", - деп къувалай оны танымагъан апайы.

Учкюндюрбаш джамиге бара ве анда геджелей. Сабанынъ сааринде джамиге молла келип мусульманларны  эзан айтып намазгъа   чагъыраджакъ ола. Джамининъ босагъасында Учкюндюрбашнынъ корип, онъа: "Учкюндюрбаш, джамининъ босагъасында бу заманда не япасынъ, я?", - деп сорай. "Оджам, Алла сагълыгъынъызны берсин, сиз мени адымны тапып бердинъиз!", - дей, къуванып Учкюндюрбаш, ве эвине тузсуз, амма сагъ-селямет къайта.

[RiverRat]

Nuzet Ümerov

Çiberek

Bitam pişire çiberek,
Sayıñ oña ne kerek?
Un kerek,
Et kerek,
Yağ kerek
Tuznen birge – beraber,
Soğan kerek ve biber.
Hamır ve qıtma qonada,
Aytıñ, ne kerek daa?
Elbette, kerek eñ azdan –
Oqlav, çığırıq ve qazan.
Kerek ocaqta küneş –
Sıcaq alevli ateş.
Çır-çır çırılday çiberek,
Aytıñ, oña kim kerek?
Bitamnıñ torunı kerek,
O aşaycaq çiberek!