Сабийчиклер лугъатчыгъы

[RiverRat]

Белли ки, сабийчиклернен ве тили энди чыкъкъан балаларнен сёйленгенде тюрлю худжур сёзлер къулланыла. Оларны ич бир лугъатта тапмассынъыз. Хатырлагъанымны мында яздым. Буюрынъыз, джемаат, бильгенинъизни къоша беринъиз.


А
айнанай (айланай) – озь балачыгъым, севимли балам
ами-ами – дува
ат-та – къолгъа бармакъ, тышкъа чыкъмакъ


Б
бабу – бадие
бебий (беби, биби) – сабийчик, кичкене бала
боти (бути) – ботий

Д
доп бар! – сакът ол, йыкъылырсын!
доп олмакъ/этмек – йыкъылмакъ

Дж
джи-джи – йылтырагъан я да зынъырдагъан бир шей
джу-джу – ювунмакъ

К
кок-кок – къораз, тавукъ, юмурта
коку – кокюслик

Къ
къха – кирли бир шей
къокъу – яхшы къокъугъан бир шей
къокъу-къокъу этмек – къокъламакъ


М
мати – бугъа, сыгъыр, бузав
мамай (мам-мам) – аш
меми (меме, мими) – эмчек


П
попи  – аякъкъап
пыш – сыджакъ бир шей
пыш олмакъ – пишмек
пых – уджлы бир шей
пых этмек – кесмек, кесип агъыртмакъ

С
сасыкъ – айнанай, ширин бала
сычкъакъ (чычкъакъ) – сычкъакълагъан бала


Т
тати – аякъ
тат-тат – шамар
тищ этмек – сиймек
тоть – коть
тыгърий баш олмакъ – башны анда-мында саллатмакъ


Ч
чапи – къол
чапин-чапин (чапин-чапин къолакъай) – къол чалмакъ
чоми (чуми) – чочакъ
чыджан – чокъ сийген бала, штанына сийген бала
чипи – чипче


Ш
шамар – ачыкъ къолман берильген котек
шамар бермек/сильмек  – котеклемек
шамар ашамакъ –  котек ашамакъ


Э
эркечик олмакъ – бурунны бурюштирип тез-тез нефес алмакъ

[Bayrach]

RiverRat, бек къувандырдылар сёзлер: джу-джу, мати, тищ этмек, мамай. Бирден акъылыма балалыкъ вакъытлар кельди 

[Bayrach]

та бир сёз акъылыма кельди: "аню" - самолет =), амма беким бу сёз тек меним къорантада

[RiverRat]

бокълы бокъ (бокъолыбокъ) - ярамаз бала, зиянкяр
шымпыр-къампет - пек дюльбер этип кийинильген къызчыкъ, мот олгъан бала

[RiverRat]

айя - юкъу
айя олмакъ - юкъламакъ

[RiverRat]

Тети (тити) - эт

[RiverRat]

Какай - къампет, татлы

[Bayrach]

a-ay - barmağa kenefke balabanca

[RiverRat]

дом-дом - музыка
дом-дом этмек - оюнгъа тюшмек, ойнамакъ

[RiverRat]

бу баланы машалласы бар - бу бала сагълам, такъатлы
пом-пом - шишман, томалакъ бала
козь-мочакъ - козь тиймесин деп такъылгъан амайыл, назарлыкъ

[Bayrach]

ap etmek - aşamaq

[RiverRat]

ёл бакъмакъ/къарамакъ - тонъкайып турып аякъ арасыдан анда-мында бакъынмакъ
Алямет: бала "ёл бакъса" эвге мусафир келеджек.

[RiverRat]

джи-джи къапай - дюльбер урба
ятсырамакъ (джатсырамакъ) - ят кишиден утанмакъ
ялдамакъ (джалдамакъ) - астына яхшы этип сиймек

[Bayrach]

джав-джав - джавун джава;
сютика - молоко;

[Bayrach]

Dalmatış - дневное чудовище, которым пугают маленьких детей;
Mentaray - ночное чудовище, которым пугают маленьких детей;