Forum qaideleri

[Alessandro]

Ürmetli forum azaları, bizim forumımıznıñ qaidelerine boysunmalısıñız. Lütfen, diqqatnen oqup çıqıñız, birevniñ qaide bilmegeni onı cevapkârlıqtan boşatmay.
 
1. Umumiy nizam ve tevsiyeler.

1.1. Forumımızda qayd olunıp da bare bir beyanat yazıp siz qaidelerimiznen razı olasıñız.
 
1.2. Eger aza qaideni bilmeyip onı bozsa, o qabaatsız olmaycaq. Aksine, böyle yapqanı qabaatını büyütken sebeptir.

1.3. Bizim forumda subetdeşniñ noqta-i nazarını ürmet etmek ve er bir adamnıñ öz fikri aqqı bar olğanını unutmamaq adeti bar; öz yazğanıñıznıñ doğru ve nezaketli olğanına diqqat etmek kereksiñiz.

1.4. Yazğanıñız mümkün olğanı qadar isbatlı olmaq kerek. Siz bir mesele aqqında öz fikriñizni bildirgende onıñ öz fikriñiz olğanını bildirmege unutmañız.

1.5. Forumdaki ğaye ve fikirlerniñ bütün müelliflik aqlarına olarnıñ müellifleri saip.

1.6. Forumnıñ qaidelerini bozğan adamlarğa qulaq asmañız. Olarnı eriştirip qozğamañız, diqqatnıñ yoq olğanı – munaqaşanı bitirmege eñ yahşı usuldır. Forum qaidelerini bozuv aqqında idarege haber bermege idareciler ya da moderatorlardan birisine şahsiy beyanat yollamaq mümkün.
 
1.7. Çeşit adamlarnıñ mizah duyğusı farqlıdır, onıñ içün ciddiy olmağan beyanatlarnı smaylnen başlañız.

1.8. Bu forumnıñ esas tili Qırımtatar tilidir. Forumcılardan Qırımtatarca yazması rica etile. Tiliñiz biraz bozuq ve hatalı olsa da, edebiy til olsa da, öz şiveñiz olsa da, büyük zararı yoq - tek Qırımtatarca olsun. Qırımtatarca iç bilmeseñiz ya da Qırımtatarca añlamağan bir forumcığa cevap berseñiz başqa tillerde de yaza bilesiñiz.

1.9. Forum qaidelerini bozuv rastketirgen olsañız, moderatorğa bildirmek kereksiñiz.

2. Forumda yasaqlı şeyler.

2.1. Bir kereden ziyade esap açmaq (klon yapmaq). Parol unutqan olsañız ya da lağabıñıznı deñiştirmege isteseñiz, yañı bir esap açmağa kerekmey – idarecilerge haber beriñiz – olar paroliñizni yañıdan tiklemege ve lağabıñıznı deñiştirmege yardım etecekler.

2.2. Çeşit türlü tesadufiy añlaşılmağan işaretlernen ariflerden ibaret olğan lağaplar almaq, diger saytlarğa bağlantı, e-mail adresi şeklinde, küfürli ve sögünçli lağaplar, milliy, diniy islerini aqaretleyici ve ahlâqiy normalarğa kelişmegen sözlerden ibaret lağaplar qullanmaq.

2.3. Tarikiy /provokatsion/ avatarlarnen resimlerni qullanmaq (depressiv, suitsid, sadistik terkipli: qan, cesetniñ  müçeleri ve ilâhre.).

2.4. Bir-de-bir azanıñ anonimligini bozğan şahsiy malümatını ruhsetsiz tarqatmaq: aqiqiy adını bildirmek, fotoresimlerini yüklemek, içtimaiy ağlardaki (odnoklassniki.ru, vkontakte.ru ve ilâhre) qullanıcı saifelerine bağlantılar bermek.

2.5. Qanunlarnı bozdurğan davetli malümatnı, dinlerara ve milletlerara zıddiyetini çıqarğan beyanatlarnı yazmaq.

2.6. Küfür sözler, aqaretler, forum azalarınıñ namusına toqunğan beyanatlar. Forum azalarınıñ adlarını ve lağaplarını olarnı açuvlandırmağa aselet hatanen yazmaq da mümkün degil. Diqqat! Aqaretlernen sögünç iç bir alda qullanılmamalı, bu cümleden diger aza tarafından aqaretke ve sögünçke cevap olaraq da. Birevniñ qaide bozucı bir beyanat diger qullanıcınıñ tarikine /provokatsiyasına/ cevap olaraq yazğanı onı aqlamay.

2.7. Bir-de-bir malümatnıñ yalan olğanını bilip onı forumda yazmaq.

2.8. Forum azaları soramağan bir-de-bir reklamanı yerleştirmek.

2.9. Mevzudan tış olğan şeyler yazmaq (offtopic). Muzakere etilgen mevzunen doğrudan bağlı olmağan bir şey aqqında laf etmege isteseñiz ayrı bir pıtaq açıñız.

2.10. Manasız malümat yazmaq (flud) (meselâ tek smayllardan ibaret beyanat).

2.11. Tamamınen ya da deyerlik tamamınen BÜYÜK ARİFLERNEN yazılğan beyanatlar. Öyle beyanatlar idare tarafından istenilmegen ses çıqaruv kibi sayıla.

2.12. Ziyade alınma yazmaq (overquoting). Beyanatqa cevap yazmağa isteseñiz, tek kerekli ifadelerni alınma etip yazıñız, bütün beyanatnı alınma etip yazmağa kerekmey.

2.13. Bir mevzunı çeşit bölüklerde bir qaç kere açmaq. Eger siz bir-de-bir mevzunı uymağan bölükte açqan olsañız – idarecilerge ya da moderatorlarğa muracaat etiñiz – olar bu mevzunı avuştıracaqlar.

2.14. Evelde idare tarafından yoq etilgen beyanatlarnı kene yazmaq ve yoq etilgen mevzularnı muzakere etmek.

2.15. Evelde muzakere etilgen mevzularnı yañıdan açmaq. Başta evelde muzakere etilgen mevzular arasında qıdırıp baqıñız, tapılmasa bu mevzunı açıp olasıñız.

2.16. Eksik manalı serlevası olğan mevzular açmaq (meselâ: "İmdat!", "Acele!", "Müim!" ve ilâhre). Mevzu serlevasında mıtlaq meseleniñ aslını belgileñiz.

2.17. Aselet moderatorlarnıñ sözlerine qulaq asmayıp areket etmek ve başqa türlü usulnen qaba şekilde forumnıñ çalışuv nizamını bozmaq.

2.18. Açıq şekilde moderatorlarnıñ areketlerini muzakere etip olarğa qarşı çıqmaq. Moderatorlar areketlerinen bağlı bütün meseleler forumda degil de, özlerinen ya da idarecilernen şahsiy mektüpleşüvde muzakere etile.

2.19. Qızıl tüsnen beyanatlar yazmaq. Qızıl tüs tek moderatorlar tarafından resmiy beyanatları yazmaq içün qullanıla.

3. Moderatorlarnıñ aqları.

3.1. Forumnıñ qaidelerine boysunuvğa idarecilernen moderatorlar közete. Moderatorlar forumğa ya da forumnıñ bazı bölüklerine közete.
Olarnıñ aqları: beyanat deñiştirmek ve yoq etmek, forumnıñ öz bölüklerinde mevzular qapatmaq, azalarnı tenbilemek. İdareciler bütün bölüklerde moderatorlarnıñ aqlarına saip olıp azalarnı blok etmek ve yoq etmek (ban etmek) aqqı bar.

3.2. Moderatorlarnıñ fikrince forum qaidelerine uymağan beyanatlar ve muzakere mevzularını yoq etmek aqqı bar.

3.3. Moderatornıñ er angi bir mevzunı qapatmaq aqqı bar.

3.4. Qullanıcı öz beyanatlarını yañlış formatlasa (yañlış yazılğan alınmalar, tüsnen belgilev, büyük arifler ve ilâhre), moderator o beyanatlarnı deñiştirip ola.

3.5. Moderatornıñ resmiy beyanatları ve ihtarları qızıl arifnen yazılğan metindir. Başqa allarda moderator adiy forum qullanıcısı kibi yaza. Qızıl tüsni tek moderatorlar resmiy beyanatlarında qullanıp ola, başqa qullanıcılarğa bu tüsni qullanmaq mümkün degil.

4. Qaide bozuv içün cezalar.

4.1. Bozuvnıñ ciddiyetine köre forum idaresi öyle cezalar qullanıp ola:

4.1.1. ihtar (ciddiy aqibetsiz, aza moderatornıñ ihtarına boysunmağa mecbur);

4.1.2. tenbi (bir qaç tenbi olğan soñ aza ban etile);

4.1.3. qaideni bozğan beyanat ve onıñ qısmını yoq etüv;

4.1.4. qaideni bozğan azanı "tek oquv" (ban) rejimine vaqtınca ya da müddetsiz keçirüv;

4.1.5. azanıñ esabını yoq etüv.

4.2. Bir aza moderator etken cezasını aqsızlıq dep bellese, moderatorğa muracaat ete bile, ondan ğayrı lütufnı da istey bile.

4.3. Forumda moderatornıñ areketleri muzakere etilmey. Apellâtsiya ve muracaatlar moderatorlarğa tek şahsiy beyanatta yazılıp ola. Moderatornıñ resmiy beyanatlarını tefsir etüv ve ondan alınma etip yazuv forumda moderatorlıqnı muzakere etüv sayılıp qaideni bozuv demektir.

4.4. DİQQAT: qaba qaide bozuv içün (sögünç, küfür sözler, diger azalarnı aqaret etüv) aza tenbisiz ban oluna bile!