Milliy müzeyimizge qıymetli eksponatlar berildi

Bizim Qırımtatar sanat müzeyi içün er bir yañı eksponat - milliy variyetimizniñ degerli bir parçaçığıdır. Bunıñ içün müzeyimizge bir-de-bir şeyni bağışlağan semetdeşlerimizge çoqtan-çoq minnetdarmız.

Aqmescitte yaşağan şaire Alyana Osmanova bu künlerde müzeyimizge eki qıymetli şey bağışladı. Birincisi - tüş tabiridir. Qırımtatar tilinde, amma arap urufatında çıqqan bu kitapçıqnıñ saifeleri ipransa da, böyle neşir müzeyimizniñ ayrıca diqqatqa lâyıq eksponatlarından birisine çevirilecegine eminim. Ekinci bahşış ise - eski degirmendir. Bu eki şey Alyana hanımğa rametli anası, Büyük Muskomiyalı Zera İbraimden qalğan. O, eski zamanlarda Aqyar tarafında belli Mırza Ametniñ sülâlesinden ola.

Ürmetli Alyana hanımğa müzeyge yapqan bahşışları içün teşekkür bildirip, ­eyilikleri Alladan qaytmasını tileymiz.

Ayşe MEMETOVA,

Qırımtatar sanat müzeyiniñ hadimi


Yañı Dünya gazetasından alınğan: http://www.yanidunya.org/?p=1664

Powered by Drupal, an open source content management system