Edebiy sözge meraqnı arttırmaq içün. Studentler yazıcı Nuzet Ümerovnen körüştiler.

Mart 18-de Tavriya milliy universitetitiñ qırımtatar ve şarq filologiyası fakultetinde zemaneviy nazik lirik ve nesirci Nuzet Ümerovnen körüşüv teşkil etildi. Qırımtatar edebiyatı kafedrasınıñ Planı mücibi keçirilgen bu tedbirni aynı şu kafedranır müdiri  dotsent Şevket Yunusov açtı ve alıp bardı.

Şair özüniñ lirikası ve tercimelerinden misaller ketirip, yaş filologlarnıñ edebiy sözümizge mera­ğını arttırdı, çünki oqulğan aman-aman er bir şiirinden soñ samimiy elçırpmalar yañğıradı. Söz kelimi, fakultetniñ musafiri bala şiiriyeti üzerinde toqtalıp, onıñ tizilişi, muayyen bir strukturası, mevzuları aqqında fikir yürsetip, kene de öz icadından misaller ketirdi. Aynı bu körüşüvde Nuzet Ümerovnıñ bediiy eserleri ve tercimelerinden ibaret ol­ğan kitapları taqdim etildi.

Bu insannıñ edebiyatımız içün qıymeti şunda ki, o, öz vaqtında M. Gorkiy adına edebiyat institutını bitirgen, atta Bella Ahmadulina, Oljas Suleymenov, Robert Rojdestvenskiy kibi şahıslarnen beraber oquğan. Bu ise Nuzet Ümerov lirikasınıñ kâmilligine tesir etkendir. Ekinci taraftan ise, o, Şamil Alâdin, Yusuf Bolat, Raim Tınçerov, Reşid Murad kibi aqsaqal ­icatkârlarımıznıñ tesirini tatqan. İşte, bu körüşüvni kerçekleştirmekten maqsad - ileride qırımtatar tili ve edebiyatı mütehassısı olacaq studentlerge canlı subet keçirmek ve bugünki edebiyatımıznıñ ayrı şahıslar esabına küçüni köstermektir.

Tedbirniñ soñunda talebeler Nuzet efendige eki demet çeçek bağışladılar ve hatıra resimi çıqarıldı.

Ş. BELBEKLİ


Yañı Dünya gazetasından alınğan: http://www.yanidunya.org/?p=1660

Powered by Drupal, an open source content management system