Avdet

Syndicate content
Updated: 4 hours 27 min ago

Canköyniñ beş sakini qırımtatar halqı sürgünligine bağışlanğan mitingde iştirak etkenleri içün mahküm etilecek

Thu, 22/06/2017 - 17:53

Canköyniñ beş sakini 2017 senesi mayıs 18-de keçirilgen merasimlerde nasıl ve ne içün iştirak etkenlerini añlatmaları içün politsiyağa çağırıldı. Hususan laf şeerde eki hatıra abidesine çiçek qoyulması aqqında yürsetile.

Bu aqta iyün 22-de iştirakçilerniñ biri Ruslan Kurtseitov bildirdi.

«Olar bizni Rusiye Memuriy qanun bozuvı aqqında kodeksiniñ 20-ci maddesi 2-ci qısmı (Toplaşuv, miting, numayış, yürüş ya da piketniñ teşkil etilüvi ya da keçirilüvi qaideleriniñ bozuluvı) boyunca qabaatlaycaq olalar, amma, fikrimizce, ne miting, ne de yürüş oldı. Adamlar keldi, çiçek qoydı, taştan demiryol vokzalına ketti, elbet, safqa turıp, perronğa, levhağa çiçek qoymaq içün bardı. Bunıñ miting, yürüş keçirilmesi olğanını saydılar, bu sebepten beş adam politsiyağa çağırıldı», – dep añlattı Kurtseitov «Qırım.Aqiqatqa».

Onıñ bildirgenine köre, çiçek qoymaq içün kelgen qırımtatarlarnıñ yerli Qırım akimiyeti tarafından planlaştırılğan miting aqqında haberi yoq edi.

«Belli oldı ki, yerli akimiyet temsilcileri saat 10:00-da miting keçire edi, çiçekler qoya edi. Amma bizge kimse haber etmedi. Biz bir şey bilmedik. Biz er sene, 30 yıl devamında, çiçek qoymağa baramız. Soñra Aqmescitke mitingge ketemiz», – dep qoştı Kurtseitov.

Belli olğanına köre, politsiya hadimleri işbu davalarnı mahkemege teslim etecek ola, ve mahkeme olarnıñ qabaatını tanısa, Canköyniñ beş sakini 10-dan 30 biñge qadar ruble para cöremesinen cezalana bile.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Qırım mahkemesi Ahtem Çiygoznıñ apiste bulunma müddetini oktâbr 8-ge qadar devam ettirdi

Thu, 22/06/2017 - 13:40

İyün 22-de Qırım Yuqarı mahkemesi qırımtatar faali Ahtem Çiygoznıñ işi boyunca toplaşuvda bundan evel prokuror tarafından taqdim etilgen şefaat arizasını qanaatlendirdi ve qabaatlanğannıñ apiste bulunma müddetini üç ayğa, yani oktâbr 8-ge qadar devam ettirdi.

Bu aqta toplaşuvnıñ birinci qısmından soñ Çiygoznıñ adliyecisi Nikolay Polozov bildirdi.

«Mahkeme, tahminen bir yarım saat devamında muşavere odasında tevsiyeleşip, imaye tarafınıñ iç bir delilini köz ögüne almayıp, prokurornıñ şefaat arizasını qanaatlendirdi», – dep ayttı Polozov.

Teneffüsten soñ imaye tarafınıñ şaatları sorğuğa çekilecek. Bundan da ğayrı, adliyeciler bir sıra şefaat arizalarını berecek ola, dep bildire «Qırım.Aqiqat».

Avdetniñ evel bildirgenine köre, iyün 20-de  Qırım Yuqarı mahkemesinde qırımtatar faali Ahtem Çiygoznıñ işi boyunca toplaşuvda Qırımdan senator Olga Kovitidi ve Sergey Tsekov izaat berdi.

Hatırlatamız ki, Ahtem Çiygoznı iyün 20-de Qırım Yuqarı mahkemesinde keçirilgen mahkeme toplaşuvınıñ teneffüsi olğan vaqıtta sırlı olaraq Aqmescit (Simferopol) SİZO-sından Bağçasarayğa ağır hasta anasınen körüşmege alıp kettiler.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

KrımSOS Qırım sakinlerine uquq saasında yardım etmek içün Skype bağını teşkil ete

Thu, 22/06/2017 - 11:30

KrımSOS cemaat teşkilâtı Qırım sakinlerine uquq saasında yardım etmek içün Skype bağını açtı.

Teşkilât azalarınıñ Avdetke bildirgenlerine köre, işbu bağ tek yarımada sakinleri içün açıq olacaq.

Muracaat etilecek akkaunt: krymsos_legal.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Qırımtatar yaşları Bayraq kününe bağışlanğan kvestte iştirak etecek

Thu, 22/06/2017 - 10:45

Qırım yaşları Qırımtatar bayrağı kününe bağışlanğan oyun-kvestte iştirak etecek.

Soñki yıllar devamında kvest Bayraq kününe bağışlanğan esas merasimlerden biri oldı.

Bütün iştirakçiler, taqımlarğa bölünip, Aqmescitniñ (Simferopol) çeşit köşelerinde icadiy vazifelerni çezecek.

«Bu oyunda iştirak etüv yaz mevsimiñizniñ eñ parlaq merasimlerinden biri ola bile», – dep ayttı teşkilâtçılar.

İştirak etmek içün kvest qaidelerinen tanış olmaq, bunen beraber, anketanı toldurmaq kerek, bu, taqımnı online şekilde qayd etmek imkânını berecek.

Bundan da ğayrı, taqım azaları «Bilgi Quveti» adlı kvestte ilk sefer iştirak etmeli. Teşkilâtçılarğa olğan suallerge cevap almaq içün nevbetteki elektron poçtağa yazıñız: quest@bayraq.info.

Hatırlatamız ki, bunen beraber, aqıl oyunı da keçirilecek.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Qırımtatar yaşlar teşkilâtlarınıñ azaları «Avdet künü»ne qarşı çıqtı

Wed, 21/06/2017 - 14:03

Qırımtatar yaşlar teşkilâtlarınıñ temsilcileri ve genç faaller «Avdet künü» adlı yañı milliy bayramnıñ qayd etilmesine qarşı çıqtı.

Hatırlatamız ki, bundan evel «Medeniy Qırım» gençler areketiniñ yetekçisi Emir Kerimov «Avdet künü»ni qayd etmege teklif etti.

Yaşlar teşkilâtları temsilcileriniñ fikrince, şimdi yañı bayramlarnıñ peyda oluvınıñ zamanı degildir. Bundan da ğayrı, olarnıñ sözlerine köre, milliy seviyedeki yañı hatıra ya da bayram künleriniñ peyda oluvı boyunca qararlarnı almaq ayrı şahıslar gruppasınıñ degil de, qırımtatar halqınıñ saylanılğan vekâletli temsilci organı, yani Qurultaynıñ aqqı bar.

«Biz, qırımtatar faalleri, gençler ve cemaat teşkilâtları temsilcileri, işbu merasimge qatiyen qarşımız, ve, halqımıznıñ bugünki vaziyetini, bunen beraber, Qırımdaki vaziyetni köz ögüne alıp, işbu bayramnıñ qayd etilmesini mümkün olmağanını sayamız», – dep aytıla beyanatta.

İçtimaiy ağlarda Facebook, VkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Qırım sakinlerine Ukrainağa biometrik pasportlarnı almaq içün barmaqtan saqınmağa tevsiye etildi

Wed, 21/06/2017 - 12:30

Qırım ükümeti baş naziriniñ muavini, Rusiye prezidenti yanındaki Qırım Cumhuriyetiniñ daimiy temsilcisi Georgiy Muradov ilân etti ki, Avropa birligi devletlerine vizasız kirmek aqqını bergen biometrik pasportnı almaq içün Ukrainağa ziyaret rusiyeli Qırım ğayelerine nisbeten hainlik sayılır.

Baş nazir muavininiñ fikrince, bu, tek Qırım sakinlerine degil de, Donetsk ve Lugansk halq cumhuriyetleri sakinlerine bağlıdır.

Bunen beraber, Muradov emin ki, ukrain ükümetiniñ Qırım sakinlerini o yerde kerekli vesiqalarnı almaq çağıruvı provokatsiyadır

«Adamlarğa bu, açıq provokatsiya, em de büyük telüke olğanını aytmağa isteyim. Yarısı yaqalanır, soñra adamlar, ağlap, aytacaq: «Ne yaptım men?!». Bu provokatsiyalardan uzaq turmaq kerek», dep bildire «RİA Novosti» Muradovnıñ sözlerini.

Avdetniñ evel bildirgenine köre, Ukraina vatandaşları olğan Qırım sakinleriniñ de Avropağa vizasız barmağa imkânı olur. Bunıñ yekâne şartı şu ki, ukrain ükümeti organları tarafından berilgen biometrik pasport olması kerek.

Aprel 6-da, Avropa parlamenti deputatları Strasburgda keçirilgen umumiy toplaşuvda Ukraina vatandaşlarına qısqa müddetke Avropa birligi devletlerine vizasız kiriş aqqını bergen qanun leyhası içün rey berdi. Avropa Birligi Nazirler Şurası mayıs 11-de Ukrainağa vizasız nizam berilmesi aqqında qararnı taqdirledi.

Avropa Birliginiñ fikrince, vizasız nizam Ukrainanıñ bütün vatandaşları içün çalışmalı.

İçtimaiy ağlarda Facebook, VkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Qırımğa Rusiye prezidenti kelecek

Wed, 21/06/2017 - 11:50

Rusiye prezidenti Vladimir Putin iyün 24-te, cumaertesi künü Qırımdaki «Artek» Halqara bala merkezini ve Aqyarnı (Sevastopol) ziyaret etecek.

Bu aqta RBK, Kremlge yaqın olğan menbalarnıñ malümatına esaslanıp, bildire.

Prezidentniñ matbuat kâtibi Dmitriy Peskov mühbirlerge ziyaret aqqında malümatnı tasdıqladı.

Putin «Artek» lagerinde park yolunı açacaq, dep haber etti menbalarnıñ biri.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Kovitidi «Çiygoznıñ işi» boyunca izaat berdi

Tue, 20/06/2017 - 22:15

İyün 20-de Qırım Yuqarı mahkemesinde qırımtatar faali Ahtem Çiygoznıñ işi boyunca toplaşuvda Qırımdan senator Olga Kovitidi izaat berdi.

Adliyeci Nikolay Polozovnıñ sözlerine köre, Kovitidi «ekspressiv şekilde» izaat berdi.

«O, Yuqarı Rada binasına zornen barıp yetti, çünki Meclisniñ (Rusiyede 29.09.2016 mahkeme qararınen yasaq etilgen, – Avdet) tecavuziy tarafdarları oña keçmek imkânını bermegen edi… Nasıldır aqay kişi onı «Ukrainağa şan-şeref olsun!» şiarına – «Qaramanlarğa şan-şeref olsun!» dep cevap bermege zorlay edi, soñra onıñ betine tükürdi. Amma o, Yuqarı Rada binasına kirip oldı», – dep bildire adliyeciniñ sözlerini «Qırım.Aqiqat».

Bunen beraber, şaat ayttı ki, sanki Refat Çubarov tarafından qorquzmalar oldı, amma o vaqıt Çubarov deputat oldımı ya da yoq hatırlap olamadı.

«Añlattı ki, zalğa Refat Çubarov sürip kirdi, ve o, sessiya keçirilgen alda bina tışında bulunğan adamlar parlament binasına sürip kireceginen qorquza edi. Ve sessiyanı başlamamağa talap etken edi, lâkin, Çubarovnıñ böyle qararınıñ sebeplerini aytıp olamadı… Çubarov sessiya keçirilmesini istemegeniniñ sebebi – bu, Ukraina devlet ükümetiniñ, regional olsa da – Qırım Muhtar Cumhuriyetinde, resmiy organı Kiyevde yüz bergen vaqialarnıñ ükümet avdarması olğanını, ameldeki ükümetni ise qanunsız olğanını aytsın», – dep bildirdi adliyeci.

Şaat Çiygoznı «qırımtatar tilinde emirler bergen megafon ile adam» olaraq tasvir etti, bundan soñ «miting iştirakçileri daa faal ve tecavuziy areket etmege başlağan edi». Adliyeci bildirdi ki, böyle deliller aqiqat degil.

Bundan da ğayrı, Polozov qayd etti ki, sorğu keçirilgen vaqıtta mahkemeciler, Kovitidige mahkemede izaat berüv qaidelerini añlatmaq içün, bir qaç sefer şaatnı toqtata edi. Sorğu yekünlenmedi, devam etecek.

Avdetniñ evel bildirgenine köre, qırımtatar faali Ahtem Çiygoznı iyün 20-de Qırım Yuqarı mahkemesinde keçirilgen mahkeme toplaşuvınıñ teneffüsi olğan vaqıtta sırlı olaraq Aqmescit (Simferopol) SİZO-sından Bağçasarayğa ağır hasta anasınen körüşmege alıp kettiler.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Ahtem Çiygoz ağır hasta anasınen körüşti

Tue, 20/06/2017 - 18:00

2014 senesi fevral 26-da kütleviy nizamsızlıqnı teşkil etüvnen qabaatlanıp eki yıldan ziyade SİZO-da bulunğan qırımtatar faali Ahtem Çiygoznı iyün 20-de Qırım Yuqarı mahkemesinde keçirilgen mahkeme toplaşuvınıñ teneffüsi olğan vaqıtta sırlı olaraq Aqmescit (Simferopol) SİZO-sından Bağçasarayğa ağır hasta anasınen körüşmege alıp kettiler.

Bu aqta «Radio Svoboda» mühbiri Anton Naumlük bildirdi.

«Toplaşuvnıñ teneffüsi olğan vaqıtta alıp kettiler, anasınen 10 daqqa körüşmege imkân berdiler. Şimdi endi SİZO-ğa alıp keteler. Bu, ğaliba, nasıldır qalabalıqqa yol bermemek içün, aman-aman sırlı olaraq yapıldı, kimse bu aqta bilmedi», – dep ayttı mühbir, bildire «Qırım.Aqiqat».

Bu malümatnı Twitterde Çiygoznıñ adliyecisi Nikolay Polozov da tasdıqladı ve Çiygoznıñ anasınen körüşmege yardım etken er keske teşekkür bildirdi.

Молния! Ахтема Чийгоза сегодня привезли в Бахчисарай и он смог попрощаться с умирающей матерью. Спасибо всем кто помогал и переживал!

— Николай Полозов (@nikolai_polozov) 20 июня 2017 г.

Avdetniñ evel bildirgenine köre, Ahtem Çiygoznıñ anası Aliyeniñ qısqaç hastalığı bar, bu hastalıq inkişaf etmege başladı ve endi ameliyat keçirilmesi mümkün degil. O, ağrını yoq etken şiddetli ilâclarnı içe.

Hatırlatamız ki, yedi yıl evel Aliye ve Zeytulla Çiygozlar büyük oğlunı defin etti. Rustem Çiygoz 2010 senesi yanvar 3-te infarkt neticesinde vefat etti.

Ahtem Çiygoznıñ anası Aliye onıñ doğğan kününde dua ete, Qırım, 2017 senesi, fevral 12, Foto: Qırım.Aqiqat

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Aqmescit ava limanında uçaqnıñ köpçegi bozuldı

Tue, 20/06/2017 - 11:15

İyün 19-da aqşam saat altıda Qırım ava limanından çıqmaq kerek olğan Aqmescit-Voronej uçağı bir qaç saatqa keçiktirildi.

Bu aqta RİA Novosti, sefer yolcularınıñ malümatına esaslanıp, bildirdi.

Yolcularnıñ haber etkenlerine köre, qayd etüv yekünlengen soñ sefer başta aqşam saat doquzğa keçirildi, amma bu sefer yapılmadı.

«Bizge haber etildi ki, uçaqnıñ köpçegi bozuldı, ve oña yañı köpçek ketirilmesini beklemek kerek. Bütün yolcular, yani 135 adam, olarnıñ arasında olğan balalar da, Novofödorovkadaki musafirhanede yerleştirildi», – dep ayttı yolcularnıñ biri.

«Simferopol» ava limanı matbuat hızmetiniñ bundan evel bildirgenine köre, müessise 2017 senesi tehnika parkınıñ zemaneviyleştirilmesine 700 million ruble yatırım ete.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Aqmescit civarındaki Fontanı köyünde merkeziy suvnen teminlev sisteması qurulacaq

Tue, 20/06/2017 - 09:19

Aqmescit (Simferopol) civarındaki Verhniye Fontanı 1,2 qasabasında, bunen beraber Novonikolayevka qasabasınıñ 2, 3-ci mikrorayonlarında tışqı suvnen teminlev sistemasınıñ qurulması planlaştırıla.

Añlaşmanıñ fiyatı 30,9 million rubleni teşkil ete.

«Suvnen teminlev sistemasınıñ yollarınıñ uzunlığı tahminen 10,22 kilometrni teşkil ete», – dep aytıla Devlet satın alımı saytındaki beyanatta.

Tamir ve qurucılıq işleri bu sene dekabr 1-ge qadar yekünlenmek kerek, dep bildire «Krıminform».

Avdetniñ evel bildirgenine köre, Aqmescit civarındaki Bor Çoqraq (Fontanı) qasabasında eñ yaqın vaqıtta yañı yol qurulıp başlaycaq.

İçtimaiy ağlarda Facebook, VkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Ukrainada eki Qırım kütleviy haber vastasınıñ qapatılması teklif etildi

Mon, 19/06/2017 - 20:21

Ukraina Malümat siyaseti nazirligi devlette yasaq etilmesi tevsiye etilgen saytlarnıñ cedvelini paylaştı.

Cedvelge eki Qırım kütleviy haber vastası da kirdi – «Krımskaya pravda» ve 1tvcrimea.ru («Pervıy Krımskiy» telekanalınıñ saytı).

«Ukrain qanunlarına köre tarqatılması yasaq etilgen malümat olğan saytlarnıñ cedveli», – dep aytıla vesiqada.

Bunen beraber, bu cedvelde «Russkaya vesna», RN, News Front, «Novorossiya», Nahnews.org, «Antifaşist», «Antimaydan», Lugansk informatsion merkezi, Novorossia Today, «Ukraina qurtaruv komiteti», Novoross.info, freedom.kiev.ua, «PolitNavigator», «Odna rodina», «Za SSSR», «Russkaya pravda», «Lugansk Online» ve «Russkoye yedinstvo» saytları qayd etile.

Bu saytlarnıñ blok etilmesi teklif etilgeniniñ sebepleri arasında «milletlerara munasebetlerni bozuv, anayasa nizamını yoq etmek çağıruvlar ve Ukraina topraq bütünligini bozmaq çağıruvlar» oldı.

Bu cedvel müessise yanındaki ekspert şurası tarafından baqıldı ve Ukraina Havfsızlıq hızmetine teslim etildi.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Avropa birligi Qırımğa nisbeten sanktsiyalarnı devam ettirdi

Mon, 19/06/2017 - 13:30

Avropa birligi Qırımğa nisbeten sanktsiyalarnı bir yılğa devam ettirdi.

Bu aqta Avropa birligi Şurasınıñ beyanatında söz yürsetile, onıñ toplaşuvı bazarertesi künü Lüksemburgda keçirile. Beyanatta qayd etile ki, sanktsiyalar 2018 senesi iyün 23-ke qadar uzattırıldı.

Hatırlatamız ki, Qırımğa nisbeten sanktsiyalar yarımadanıñ Rusiye Federatsiyası terkibine kirmesi tanılmaması Avropa strategiyası çerçivesinde devam ettirile. Qırımğa nisbeten sanktsiyalar çerçivesinde Avropa birligi öz şirketlerine yarımadada bulunğan rusiyeli şirketlernen ticaret alıp barmağa ve er angi maliye munasebetlerini qurmağa yasaq ete.

Bundan da ğayrı, AB Qırımda alınğan rusiyeli tışqı pasportlarnıñ saiplerine kiriş vizalarını bermekni yasaq ete, bunen beraber, öz gemilerine yarımada limanlarına kirmege, uçaqlarına ise Qırım ava limanlarına, acele vaziyetlerden ğayrı, qonmağa yasaq ete.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

UEFA mahsus komiteti sentâbr ayında Qırımnı ziyaret etecek

Mon, 19/06/2017 - 13:15

Avropa futbol assotsiatsiyaları birliginiñ (UEFA) Mahsus komiteti sentâbr başında Qırımnı ziyaret etecek.

UEFA milliy assotsiatsiyaları bölüginiñ müdiri Zoran Lakoviçniñ bildirgenine köre, Qırım aqqında laf etkende, Hersonnı da hatırlamamaq mümkün degil. UEFA mahsus komitetiniñ Qırım ve Hersonğa ziyareti sentâbr ayında keçirilmek kerek.

«UEFA – bu, siyasiy bir teşkilât degil, biz siyasiy meselelerni çezip olamaymız, – dep ayttı Lakoviç. – Qırım – bu, Avropada siyasiy ceetten Avropada problemalı regionlardan yekânesi degil. Vazifemiz – siyasetke kirişmek degil de, futbolnı inkişaf ettirmektir».

Avdetniñ evel bildirgenine köre, mart ayında Avropa futbol assotsiatsiyaları birligi Qırım futbol birligine yarımadada futbol inkişafına €1 million ayırdı.

Qırım futbol birliginiñ UEFA mahsus statusı bar. Teşkilât 2015 senesi iyül ortasında resmiy olaraq qayd etildi. Birinci Qırım çempionatı 2015 senesi avgust 22-den 2016 senesi iyün 4-ke qadar keçirilgen edi. O vaqıt çempionatta sekiz taqım iştirak etti. Aqmescitli «Tavriya» futbol klubı ğalip çıqtı.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Londondaki cami yanında maşna adamlarnı urdı

Mon, 19/06/2017 - 12:19

Britaniya paytahtınıñ şimal-şarqında Finsbury-park rayonında avtomobil qaldırımğa çıqtı ve o yerde camiden gece namazından çıqqan adam sürüsine uruldı. Neticede eñ azdan bir kişi elâk oldı ve on adam yaralandı.

Vaqia iyün 19-ğa keçer gecesi yerli vaqıtnen saat 00:20-lerde yüz berdi. Avtomobil dümeni başında bulunğan 48 yaşındaki aqay kişi maşnadan çıqtı, onı vaqia şaatları tuttı ve bundan soñ o, politsiya tarafından yaqalandı. Bir qaç adam Britaniya kütleviy haber vastalarına bildirdi ki, umumen olaraq maşna içinde üç kişi bar edi, amma ekisi qaçtı.

Büyük Britaniya baş naziri Tereza Mey yapqan beyanatında qayd etti ki, politsiya bu vaqiağa «ola bilgen terakt» olaraq baqa.

«Bu saba fevqulade toplaşuv yapacam. Bütün fikirlerim qurbanlar, olarnıñ qorantalarınen bağlı», – dep ayttı Mey.

Avdetniñ evel bildirgenine köre, iyün 3-te aqşam üç aqay kişi London köprü rayonında maşnanen piyadelerni urdı, bundan soñ, Boro bazarına barıp, o yerde avtomobilden çıqıp, keçken adamlarğa pıçaqlarnen ücüm etmege başladı.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Qırımtatar qorantasınıñ evinde yanğın yüz bergen vaqıtta divardaki dualar nasıldır saqlanıp qaldı

Mon, 19/06/2017 - 09:37

Qurman (Krasnogvardeyskoye) rayonındaki Novozuyevka köyünde Appazovlar qorantasınıñ evinde yanğın yüz bergen vaqıtta bütün eşyalar yandı, amma divardaki eki dua saqlanıp qaldı.

Bu aqta qırımtatar faali, «Armançıq» mecmuasınıñ baş muarriri Ediye Muslimova añlattı, o, bu qorantağa urba ve diger maddiy yardımnı alıp ketmek içün bardı.

Onıñ sözlerine köre, yanğın kündüz yüz berdi, o vaqıt büyükler işte edi, balaları ise qomşu soqaqta yaşağan qartbaba-bitasında buluna edi. Vaqia gece yüz bergen olsa edi, kimse qurtarılmaz edi.

Eşyalardan tek yañı suv qızdırıcını qurtarmağa imkân oldı. Qalğan episi yandı.

Qomşulardan biri qorantağa öz boş turğan evini berdi. Şimdi Susanna Appazova aqayınen onı abadanlaştıra.

«Bu qorantağa tanış ve tanış olmağanlar tarafından ketirilip berilgen er şeyni balalar, Susanna ve onıñ ana-babası memnüniyet ile qabul etti. Olar yardım etken er keske teşekkür bildire!» – dep yazdı Ediye Muslimova.

Avdetniñ evel bildirgenine köre, Appazovlarnıñ üç balalı qorantası, öyle de fuqarelerden olıp, yanğın neticesinde ev ve vesiqalarsız qaldı. Yüz bergen yanğınnıñ sebebi bozulğan elektrik ağları oldı.

Appazovlarnıñ qorantasına yardım istegenler nevbetteki bank kartına para yollay bile:

6054 7000 3476 3737

Appazova Munere Rustemovna (Susannanıñ anası)

Susanna Appazovanıñ telefon nomerası: +79780976919.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Qırımtatar göñüllileri Qırımnıñ uzaq qalğan köylerinde iftarlar keçire

Sun, 18/06/2017 - 14:24

Keçken afta devamında qırımtatar göñüllileri Qırım musulmanları diniy idaresinen beraberlikte Sudaq civarındaki Qapsihor (Morskoye), Curçı (Pervomayskoye) rayonındaki Yudendorf (Oktâbrskoye) ve Sarıbaş, Bağçasaray rayonındaki Büyük Qaralez (Krasnıy mak) köylerinde iftarlar keçirdi.

«Köyde iftar ilk sefer» aktsiyası çerçivesinde 9-cı iftar Curçı köyünde berildi.

İyün 20-de iftar Bağçasaray rayonındaki Kökköz (Sokolinoye), iyün 21-de Büyük Özenbaş (Sçastlivoye), iyün 22-de Canköy rayonındaki Aq Çora (Vasilyevka) köyünde keçirilecek.

Avdetniñ evel bildirgenine köre, bu kibi iftarlar Bağçasaray rayonındaki Büyük Süyren (Tankovoye), Qarasuvbazar rayonınıñ Melek (Nekrasovo), Alevke (Annovka), Canköy rayonındaki Teñ Suv (Maslovo) köylerinde teşkil etildi.

Foto: «Açıq yürekler»

İçtimaiy ağlarda FacebookVkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Qara deñizniñ tüsü deñişti

Sat, 17/06/2017 - 20:50

Amerikalı arbiy yoldaş Qara deñizniñ tüsü deñişkenini qayd etti.

Bu aqta malümat NASA saytında peyda oldı, dep bildire «Novosti Krıma».

Aqua satellite kâinat yoldaşından fotoresimlerde körüne ki, deñiz feruze tüsüne boyalandı – deñizde büyük feruze lekeler körüne. Eñ açıq tüsler Romaniya, Bulğaristan ve Ukraina yalıları yanında belgilendi.

Mütehassıslarnıñ malümatına binaen, bundan evel kâinattan yapılğan fotoresimlerde Qara deñizniñ tüsü qoyu mavı edi, renkniñ deñişkeni ise, fitoplanktonnıñ kütleviy peyda olmasınen bağlıdır.

Eger bu kerçek olsa, deñizdekiler içün oksigen miqdarı azlaşır.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Bor Çoqraq qasabasında yañı yol qurulacaq

Sat, 17/06/2017 - 19:20

Aqmescit (Simferopol) civarındaki Bor Çoqraq (Fontanı) qasabasında eñ yaqın vaqıtta yañı yol qurulıp başlaycaq.

5 kilometrlik yol Alime Abdennanova adına mektepke oñaytlı ve havfsız areketni teminleycek. Qurucılıq işleri kelecek sene aprel ayına qadar yekünlenmek kerek.

Avdetniñ evel bildirgenine köre, Bor Çoqraq qasabasında niayet mektep quruldı, oña Rusiye qaramanı, efsaneviy qırımtatar istihbaratçısı (razvedkacı) Alime Abdennanovanıñ adı berildi.

Foto: Avdet

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Aqmescit akimiyeti qanunsız ticaretke qarşı küreş reydleri er kün keçirilecegi aqqında haber etti

Sat, 17/06/2017 - 18:05

Aqmescitte (Simferopol) qanunsız ticaretke qarşı küreş çerçivesinde bir qaç reyd keçirildi.

Bu aqta iyün 17-de şeer memuriyetiniñ matbuat hızmeti bildirdi.

«Keçirilgen reyd neticesinde qanun bozğanlarına nisbeten memuriy qanun bozuvı aqqında protokollar tizildi. Yanında şahısnı belgilegen vesiqaları olmağan şahıslar İçki işler nazirligi bölüklerine şahıs belgilenmesi ve memuriy mesüliyetke celp etilüvi meselesi çezilmesi içün ketirile edi. Bugün keçirilgen reyd çerçivesinde ayvan mahsulatı yoq etilmek içün alınğan edi», – dep bildirdi matbuat hızmeti.

Müessisede qayd eteler ki, endiden soñ qanunsız ticaretke qarşı küreş çerçivesinde reydler er kün keçirilecek.

Hatırlatamız ki, mayıs soñunda Aqmescitte qanunsız ticaretke qarşı küreş çerçivesinde büyük reyd keçirildi. O vaqıt şeerniñ Merkez bazarı ve Kuybışev bazarı ve Borodina soqağı rayonları «temizlendi».

Foto: Aqmescit memuriyeti matbuat hızmeti

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.